ആശൂറ ആചരണം:​ ​​ബഹ്റൈനിൽ ഒരുക്കം പൂർത്തിയായി

മനാമ: ആശൂറ ചടങ്ങുകൾ വിജയകരമായി നടത്തുന്നതിന്​​ പൊലീസ്​, ട്രാഫിക്​ വിഭാഗങ്ങളും കമ്യൂണിറ്റി പൊലീസും സഹകരിച്ച്​ ബഹ്റൈനിൽ ഒരുക്കം പൂർത്തിയാക്കി.

അശൂറയുടെ പ്രധാന ചടങ്ങുകൾ ഇന്നാണ്​ നടക്കുന്നത്​. ഇതിന്‍റെ പശ്ചാത്തലത്തിൽ വിവിധ ഗവർണറേറ്റുകളിലെ ​പൊലീസ്​ ഡയറക്​ടറേറ്റുകളും ട്രാഫിക്​ വിഭാഗവും തമ്മിൽ സഹകരിച്ച്​ പ്രവർത്തിക്കാനും കമ്യൂണിറ്റി പൊലീസിന്‍റെ സേവനം നൽകാനും തീരുമാനിച്ചു.

ചൊവ്വാഴ്ച രാവിലെ വിവിധ മഅ്​തമുകൾ കേ​ന്ദ്രീകരിച്ച്​ ചടങ്ങുകൾ നടക്കും. മഅ്​തമുകളിൽനിന്നുള്ള ഘോഷയാത്രകൾ ഒരിടത്ത്​ സമ്മേളിക്കും. വിവിധ ​പ്രദേശങ്ങളിൽ നടക്കുന്ന ചടങ്ങുകൾക്കുള്ള ഒരുക്കങ്ങൾ വിലയിരുത്തുന്നതിന്​ അവിടങ്ങളിൽ പൊലീസ്​ അധികാരികൾ സന്ദർശിക്കുകയും ​സുരക്ഷ വിലയിരുത്തുകയും ചെയ്യും. മഅ്​തമുകൾക്കു​ ചുറ്റും ആവശ്യമായ സംവിധാനങ്ങളൊരുക്കുകയും സുരക്ഷ ഉറപ്പാക്കുകയും ചെയ്യുമെന്ന്​ അധികൃതർ അറിയിച്ചു.

ഘോഷയാത്ര കടന്നുപോകുന്ന റോഡുകളിൽ ഗതാഗത നിയന്ത്രണമേർ​പ്പെടുത്തുന്നതിനുള്ള​ നടപടികൾ ട്രാഫിക്​ വിഭാഗം സ്വീകരിച്ചതായി ട്രാഫിക്​ ഡയറക്​ടർ ​ബ്രിഗേഡിയർ ശൈഖ്​ അബ്​ദുറഹ്​മാൻ ബിൻ അബ്​ദുൽ വഹാബ്​ ആൽ ഖലീഫ വ്യക്തമാക്കി.

മഅ്​തമുകളിലും മഅ്​തമുകൾക്കു​ സമീപമുള്ള റോഡുകളിലും കറുത്ത കൊടികളും പ്രവാചക പൗത്രൻ ഹുസൈന്‍റെ കർബലയിലെ രക്തസാക്ഷിത്വത്തിന്‍റെ മഹത്ത്വം വിളംബരംചെയ്യുന്ന വചനങ്ങൾ ആലേഖനംചെയ്​ത കറുത്ത ബാനറുകളും സ്​ഥാപിച്ചിട്ടുണ്ട്​.

കർബലയിൽ നടന്ന ​ക്രൂരമായ സംഭവത്തെ അനുസ്​മരിച്ചാണ്​ എല്ലാ വർഷവും മുഹർറം 10ന്​ ശിയാ വിഭാഗം പലതരത്തിലുള്ള ചടങ്ങുകളും സംഘടിപ്പിക്കുന്നത്​. അയൽരാജ്യങ്ങളിൽനിന്നുള്ള പണ്ഡിതരെ പ്രഭാഷണങ്ങൾക്കായി കൊണ്ടുവരുന്ന രീതിയുമുണ്ട്​. സർക്കാർ സംവിധാനങ്ങൾ മികച്ച സഹകരണമാണ്​ ഇ​പ്രാവശ്യവും ആശൂറ ചടങ്ങുകൾക്ക്​ നൽകുന്നത്​.

കഴിഞ്ഞ ദിവസങ്ങളിലായി വിവിധ ഗവർണർമാർ അതത്​ പ്രദേശങ്ങളിലെ മഅ്​തമുകൾ സന്ദർശിക്കുകയും ഹുസൈനിയ്യ കമ്മിറ്റികളുമായി ആലോചിച്ച് സംവിധാനങ്ങളൊരുക്കുന്നതിന്​ നടപടി സ്വീകരിക്കുകയും ചെയ്​തിരുന്നു.