തൊഴിൽ മന്ത്രിയും ഇന്ത്യൻ അംബാസഡറും കൂടിക്കാഴ്​ച നടത്തി 

മനാമ: തൊഴിൽ, സാമൂഹിക വികസന മന്ത്രിയും ലേബർ മാർക്കറ്റ്​ റെഗുലേറ്ററി അതോറിറ്റി (എൽ.എം.ആർ.എ) അധ്യക്ഷനുമായ ജമീൽ ബിൻ മുഹമ്മദലി ഹുമൈദാൻ ഇന്ത്യൻ അംബാസഡർ അലോക്​ കുമാർ സിൻഹയുമായി ചർച്ച നടത്തി. തൊഴിൽ, സാമൂഹിക വികസന രംഗത്തെ ഉഭയകക്ഷി സഹകരണം കൂടിക്കാഴ്​ചയിൽ ചർച്ചയായി. ബഹ്​റൈനിലെ ഇന്ത്യൻ പ്രവാസി സമൂഹം നൽകി വരുന്ന സേവനങ്ങൾ മഹത്തരമാണെന്ന്​ മന്ത്രി പറഞ്ഞു. 

ഇന്ത്യൻ തൊഴിലാളികളുടെ നിയമപരമായ എല്ലാ അവകാശങ്ങളും ഉറപ്പാക്കും. ഇരുരാജ്യങ്ങളുടെയും പൊതുതാൽപര്യങ്ങൾക്കായി മന്ത്രാലയം നിലകൊള്ളുമെന്നും അദ്ദേഹം വ്യക്തമാക്കി. ഇന്ത്യൻ തൊഴിലാളികളുടെ വിവിധ പ്രശ്​നങ്ങൾ പരിഹരിക്കുന്നതിൽ മന്ത്രാലയം മാതൃകാപരമായ നടപടികളാണ്​ സ്വീകരിക്കുന്നതെന്ന്​ അംബാസഡർ പറഞ്ഞു.      തൊഴിൽ വിപണിയുടെ പുരോഗതിക്കായി എൽ.എം.ആർ.എ സ്വീകരിക്കുന്ന നയങ്ങൾ പ്രശംസനീയമാണെന്നും അദ്ദേഹം വ്യക്തമാക്കി.