കണക്​ഷൻ ഫ്ലൈറ്റിൽ എത്തി ‘പൂസായ’മലയാളിക്ക്​ യാത്രാനുമതി നിഷേധിച്ചു

മനാമ: കുവൈത്തിൽ കണക്ഷൻ ​ഫ്ലൈറ്റിൽ തിരുവനന്തപുരത്തേക്ക്​ പോകാൻ ബഹ്​റൈനിൽ എത്തിയ മലയാളി മദ്യപിച്ച്​ ലക്കുകെട്ടതിനെ തുടർന്ന്​ വിമാന കമ്പനി അധികൃതർ യാത്രാനുമതി നിഷേധിച്ചു. എന്നാൽ അടുത്ത ദിവസം അധിക ചാർജ്​ അടച്ച്​ വിമാനത്തിൽ സീറ്റ്​ ഉറപ്പാക്കിയ ഇയ്യാൾ വിമാനത്തിലേക്ക്​ പുറപ്പെടുംമുമ്പ്​ എത്തിയത്​ വീണ്ടും മദ്യലഹരിയിൽ.

ഡ്യൂട്ടി ഫ്രീഷോപ്പിൽ നിന്നും വാങ്ങിയ ഉപയോഗിച്ച്​ ബാക്കിയായ മദ്യവും ഇയ്യാളുടെ കൈവശം ഉണ്ടായിരുന്നു. കുവൈത്തിൽ നിന്നും  ബഹ്​റൈൻ വഴി നാട്ടിലേക്ക്​ പുറപ്പെട്ട ആൾ  നിശ്​ചിത സമയം കഴിഞ്ഞിട്ടും എത്താത്തതിനാൽ ബന്​ധുക്കൾ ആശങ്കയിലായി ബഹ്​റൈനിലെ സാമൂഹിക പ്രവർത്തകനായ ബഷീർ അമ്പലായിയെ വിവരം അറിയിച്ചു. തുടർന്ന്​ നടത്തിയ അന്വേഷണത്തിലാണ്​ വിമാനത്താവളത്തിൽ മദ്യലഹരിയിലായിരുന്ന ഇയാളെ കണ്ടെത്തിയത്​. ഇന്നലെ അർധരാത്രിക്കുള്ള വിമാനത്തിൽ ഇയാൾ മടങ്ങിയതായാണ്​ വിവരം.