ടിഷ്യുകള്‍ച്ചര്‍ ഈത്തപ്പന വൻതോതിൽ ഉല്‍പാദിപ്പിക്കാന്‍ ലബോറട്ടറി സ്ഥാപിക്കും –മന്ത്രി 

മനാമ: വര്‍ഷം തോറും 10,000 ടിഷ്യു കള്‍ച്ചര്‍ ഈത്തപ്പന ഉല്‍പാദിപ്പിക്കുന്നതിനുള്ള ലബോറട്ടറികള്‍ സ്ഥാപിക്കുമെന്ന്  പൊതുമരാമത്ത്, മുനിസിപ്പല്‍, നഗരാസൂത്രണകാര്യ മന്ത്രി ഇസാം ബിന്‍ അബ്​ദുല്ല ഖലഫ് വ്യക്തമാക്കി. കഴിഞ്ഞ ദിവസം ആധുനിക സാങ്കേതിക വിദ്യ ഉപയോഗപ്പെടുത്തി സ്ഥാപിച്ച ടിഷ്യു കള്‍ച്ചര്‍ പദ്ധതി ഉദ്ഘാടനം ചെയ്​ത്​ സംസാരിക്കുകയായിരുന്നു അദ്ദേഹം. രാജ്യത്തെ കാര്‍ഷിക മേഖലയുടെ വളര്‍ച്ചക്ക് ആധുനിക സാങ്കേതിക വിദ്യകള്‍ ഉപയോഗപ്പെടുത്തി മുന്നോട്ട് പോകും.

കാര്‍ഷിക മേഖലയില്‍ പ്രവര്‍ത്തിക്കുന്നവര്‍ക്ക് പരിശീലനവും പ്രോത്സാഹനവും നല്‍കി ഈ മേഖലയില്‍ തന്നെ നിലനിര്‍ത്തുന്നതിന് ശ്രമിക്കുകയും ചെയ്യുമെന്ന് അദ്ദേഹം ചൂണ്ടിക്കാട്ടി. 2004 മുതല്‍ ടിഷ്യൂകള്‍ച്ചര്‍ ഈത്തപ്പന കൃഷി ആരംഭിച്ചതായി മന്ത്രി വ്യക്തമാക്കി. രോഗങ്ങളില്ലാത്ത ഈത്തപ്പന കൃഷിക്ക് ഇത്​ അനിവാര്യമാണ്. നിലവില്‍ 1000 മുതല്‍ 1500 വരെ ടിഷ്യൂകള്‍ച്ചര്‍ ഈത്തപ്പനകളാണ് ഉല്‍പാദിപ്പിക്കുന്നത്. ഈത്തപ്പന കൃഷി വ്യാപകമാക്കുന്നതി​​​െൻറ ഭാഗമായി വൻ തോതിൽ ടിഷ്യൂ കള്‍ച്ചര്‍ ഇനങ്ങള്‍ ഉല്‍പാദിപ്പിക്കുന്നതിനാണ് പദ്ധതിയെന്നും അദ്ദേഹം കൂട്ടിച്ചേര്‍ത്തു.