ഇസ്രായേൽ അതിക്രമങ്ങൾ തടയാൻ അന്താരാഷ്​ട്ര സമൂഹം ഇടപെടണമെന്ന്​ ബഹ്​റൈൻ 

മനാമ: ഫലസ്​തീനികൾക്കെതിരെ ഇസ്രായേൽ നടത്തുന്ന അതിക്രമങ്ങൾ തടയാൻ അന്താരാഷ്​ട്ര സമൂഹം ഇടപെടണമെന്ന്​ ബഹ്​റൈൻ യു.എന്നിൽ ആവശ്യപ്പെട്ടു. എല്ലാ അന്താരാഷ്​ട്ര മര്യാദകളും ഉടമ്പടികളും ലംഘിച്ചുള്ള നടപടികളാണ്​ ഇസ്രായേലി​​​െൻറ ഭാഗത്തുനിന്നുണ്ടാകുന്നത്​. ജറൂസലമി​​​െൻറ പദവി സംബന്ധിച്ച യു.എൻ നിർദേശങ്ങളും അവഗണിക്കപ്പെടുകയാണ്​. ഫലസ്​തീൻ ജനതക്കെതിരായ മനുഷ്യത്വ രഹിതമായ നടപടികൾ തടയേണ്ടതുണ്ടെന്നും ബഹ്​റൈൻ വ്യക്​തമാക്കി. യു.എന്നിലെ സ്​ഥിരം പ്രതിനിധി അംബാസഡർ ജമാൽ ഫാരിസ്​ റു​വൈഇ സുരക്ഷാസമിതിയിൽ നടത്തിയ പ്രസംഗത്തിലാണ്​ ഇങ്ങനെ പറഞ്ഞത്​. പശ്​ചിമേഷ്യയിലെ സ്​ഥിതിഗതികൾ സംബന്ധിച്ച തുറന്ന ചർച്ചയിൽ സംബന്ധിക്കുകയായിരുന്നു അദ്ദേഹം. ഇതിലാണ്​ ഫലസ്​തീൻ പ്രശ്​നവും ചർച്ചയായത്​. ചൈനയുടെ സ്​ഥിരം പ്രതിനിധി ലിയു ജിയേയി അധ്യക്ഷനായിരുന്നു. 
  അൽ അഖ്​സയിൽ പ്രാർഥന തടഞ്ഞ നടപടിയിൽ ബഹ്​റൈൻ ശക്​തമായി പ്രതിഷേധിച്ചു.ഇത്​ മതസ്വാതന്ത്ര്യത്തിന്​ വിരുദ്ധമായ നീക്കമാണ്​.  ഇതിനെതിരെ ലോകമെമ്പാടുമുള്ള മുസ്​ലിം സമൂഹത്തിൽ പ്രതിഷേധമുണ്ട്​.അൽ അഖ്​സ പള്ളിയിലുണ്ടായ സംഘർഷവും അപലപനീയമാണ്​. പള്ളി എല്ലാ വിശ്വാസികൾക്കുമായി അടിയന്തരമായി തുറന്നുകൊടുക്കണം. ഫലസ്​തീൻ പ്രശ്​നത്തെ ബഹ്​റൈൻ ആഗോളതലത്തിലുള്ള പ്രധാന വിഷയങ്ങളിലൊന്നായി കാണുന്നത്​ തുടരും. ഇവിടെ നീതിയിലധിഷ്​ഠിതമായ, ദീർഘകാലത്തേക്ക്​ നിലനിൽക്കുന്ന പരിഹാരമുണ്ടാകണം. ഇരു രാഷ്​ട്രങ്ങളും സമാധാനപരമായി കഴിയുന്ന സാഹചര്യമുണ്ടാകണം. ഇതിനായുള്ള അറബ്​ മേഖലയുടെ ശ്രമങ്ങൾ മാനിക്കപ്പെടേണ്ടതുണ്ട്​. കിഴക്കൽ ജറൂസലം തലസ്​ഥാനമായി 1967 ജൂണിലുള്ള അവസ്​ഥയിൽ ഫലസ്​തീൻ രൂപവത്​കരിക്കുകയെന്നതാണ്​ സ്​ഥായിയായ സമാധാനത്തിനുള്ള പോംവഴി. എല്ലാ ഫലസ്​തീൻ പ്രദേശങ്ങളിൽ നിന്നും ഇസ്രായേൽ അധിനിവേശം തടയണം. അവരുടെ കുടിയേറ്റവും അവസാനിപ്പിക്കണമെന്ന്​ ബഹ്​റൈൻ വ്യക്തമാക്കി. ഇസ്രായേൽ ഫലസ്​തീനുനേരെ നടത്തുന്ന അതിക്രമങ്ങൾക്കെതിരെ എന്നും ശക്​തമായ നിലപാട്​ സ്വീകരിച്ച രാജ്യമാണ്​ ബഹ്​റൈൻ. 
ഇസ്രായേല്‍ അതിക്രമങ്ങള്‍ക്കും ബൈത്തുല്‍ മുഖദ്ദിസില്‍ നടത്തിയ സൈനിക നടപടിക്കുമെതിരെ കഴിഞ്ഞ ദിവസം ബഹ്​റൈനിലെ ഫലസ്​തീൻ എംബസിയിൽ ഐക്യദാര്‍ഢ്യ സംഗമം സംഘടിപ്പിച്ചിരുന്നു. ഇതിൽ വിദേശകാര്യ മന്ത്രാലയ അണ്ടര്‍ സെക്രട്ടറി വഹീദ് സയ്യാര്‍, വിവിധ ഗൾഫ്​ രാജ്യങ്ങളുടെ അംബാസഡർമാർ, ബഹ്‌റൈനിലെ റഷ്യന്‍ അംബാസഡര്‍, രാഷ്​ട്രീയ, സാമൂഹിക സംഘടന പ്രതിനിധികള്‍, ബഹ്‌റൈനിലെ ഫലസ്തീന്‍ പ്രവാസികള്‍ തുടങ്ങിയവര്‍ സന്നിഹിതരായിരുന്നു. ബഹ്‌റൈന്‍ എന്നും ഫലസ്തീനികള്‍ക്കൊപ്പമാണ് നിലകൊള്ളുന്നതെന്നും ഇസ്രായേല്‍ നടത്തുന്ന അതിക്രമങ്ങള്‍ അവസാനിപ്പിച്ച് ഫലസ്തീനില്‍ സമാധാനം നിലനിര്‍ത്താനാവശ്യമായ നടപടികളുണ്ടാകണമെന്നും ഇൗ യോഗത്തിൽ വഹീദ് സയ്യാര്‍ ആവശ്യപ്പെട്ടിരുന്നു. 
തുടർന്ന്​, ഫലസ്തീന്‍ ജനതക്കും രാജ്യത്തിനുമായി നിലകൊള്ളുന്ന ഹമദ് രാജാവിനും ബഹ്‌റൈന്‍ ജനതക്കും ബഹ്‌റൈനിലെ ഫലസ്തീന്‍ അംബാസഡര്‍ ത്വാഹ മുഹമ്മദ് അബ്​ദുല്‍ ഖാദര്‍ നന്ദി പ്രകാശിപ്പിച്ചു. ഖുദ്‌സിന് നേരെയുള്ള കൈയേറ്റം പൊറുക്കാനാവാത്തതാണെന്നും അവിടെ ഫലസ്തീനികള്‍ക്ക് സ്വതന്ത്രാധികാരം ലഭിക്കുന്നത് വരെ പോരാട്ടം തുടരുമെന്നും അദ്ദേഹം പറഞ്ഞു.  രാഷ്​ട്രീയപരമായ സംഘട്ടനത്തെ മതപരമാക്കി മാറ്റുന്നതിനെതിരെ ജാഗ്രത പാലിക്കണമെന്നും അദ്ദേഹം പറഞ്ഞിരുന്നു.