അഫ്​സൽ നാളെ നാട്ടിലേക്ക്​: എല്ലാവർക്കും ഹൃദയം നിറയെ നന്ദി 

മനാമ: മോഷ്​ടാക്കൾ രണ്ടാംനിലയിൽ നിന്ന്​ താഴേക്ക്​ തള്ളിയിട്ട്​ ശരീരം തളർന്ന കൊല്ലം നിലമേൽ സ്വദേശി അഫ്​സൽ (29) ഒരുമാസത്തെ ആശുപത്രി വാസത്തിനുശേഷം നാട്ടിലേക്ക്​ മടങ്ങുന്നു. എന്നാൽ നിർധന കുടുംബാംഗമായ അഫ്​സലിനെ തണൽ പ്രവർത്തകർ ചികിത്​സക്കായി ഏറ്റെടുത്ത്​ കോഴിക്കോടേക്ക്​ കൊണ്ടുപോകും. വ്യാഴാഴ്​ച രാത്രി എട്ട്​ മുപ്പതിനുള്ള ഗൾഫ്​ എയറി​​​െൻറ കൊച്ചി വിമാനത്തിലാണ്​ യാത്ര. അവിടെ നിന്നും ആംബുലൻസിൽ കോഴിക്കോടേക്ക്​ കൊണ്ടുപോകും. കൂട്ടിരിപ്പിന്​ ആളെ ഉൾപ്പെടെയുള്ള ചികിത്​സ സൗകര്യങ്ങളാണ്​ തണൽ നൽകുക.

കഴിഞ്ഞ ഫെബ്രുവരി ഒമ്പതിനാണ്​ രാത്രി അഫ്​സലിനുനേരെ സാമൂഹ്യ വിരുദ്ധരുടെ ആക്രമണം ഉണ്ടായത്​.  സെൻട്രൽ മനാമയിലെ ‘അയ്​ക്കൂറ പാർക്ക്​’ എന്നറിയപ്പെടുന്ന  താമസസ്ഥലത്ത് ഭക്ഷണം വാങ്ങാൻ നടന്ന​ുപോകു​േമ്പാൾ, പണം തട്ടിപ്പറിച്ചോടിയവരെ പിന്തുടർന്നതി​​​െൻറ പേരിലാണ്​ ഇൗ ദുരിതാവസ്ഥ ഉണ്ടായത്​. രണ്ടാംനിലയിൽ നിന്ന്​ കവർച്ചക്കാർ താഴേക്ക്​ തള്ളിയ അഫ്​സൽ താഴെ നിലയിലെ ഷീറ്റിൽ വന്നുവീണശേഷമാണ്​ റോഡിലേക്ക്​ വീണത്​. ഇതുകാരണം വീഴ്​ചയുടെ ആഘാതം കുറയാനും ജീവൻ രക്ഷിക്കാനുമായി. സംഭവം ഗൾഫ്​ മാധ്യമം തുടർച്ചയായി പ്രസിദ്ധീകരിച്ച വാർത്തകളുടെ അടിസ്ഥാനത്തിലാണ്​ മലയാളി സമൂഹത്തി​​​െൻറ സജീവ ശ്രദ്ധയിലേക്ക്​ ഇൗ വിഷയം കടന്നുവന്നത്​.

തുടർന്ന്​ അറബ്​ മാധ്യമങ്ങളിലും വാർത്തയായി. മനാമ എം.പി അബ്​ദുൽ വാഹിദ്​ കറാത്ത ആശുപത്രിയിലെത്തി അഫ്​സലിനെ സന്ദർശിക്കുകയും വിഷയം പാർലമ​​െൻറിൽ ഉന്നയിക്കുമെന്ന്​ അറിയിക്കുകയും ചെയ്​തു. ഇന്ത്യൻ എംബസി അധികൃതരാണ്​ അഫ്​സലിന്​ വിമാനടിക്കറ്റ്​ എടുത്തുനൽകിയത്​. നിരവധി മലയാളി സാമൂഹിക പ്രവർത്തകർ അഫ്​സലി​​​െൻറ വിഷയത്തിൽ കാട്ടിയ ശുഷ്​ക്കാന്തിയും ശ്രദ്ധേയമാണ്​. ആശുപത്രിയിൽ കൂട്ടിരിക്കുകയും വേണ്ട സഹായം ചെയ്​ത്​ കൊടുക്കാനും നിരവധിപേർ മുന്നിട്ടിറങ്ങി. അദ്ദേഹത്തിന്​ ഭൂമിയും വീടും യാഥാർഥ്യമാക്കാനുള്ള ശ്രമത്തിലാണ്​ പ്രവാസലോകത്തെ മലയാളികൾ.