ബൂരി പൈപ്പ് ലൈന്‍ സ്‌ഫോടനം: നാല്​ തീവ്രവാദികള്‍ പിടിയില്‍ 

മനാമ: ബൂരി പൈപ്പ് ലൈന്‍ സ്‌േഫാടനത്തിലുള്‍പ്പെട്ട ഏതാനും തീവ്രവാദികളെ പിടികൂടിയതായി ആഭ്യന്തര മന്ത്രാലയം അറിയിച്ചു. ‘ഫെബ്രുവരി 14 കൂട്ടായ്മ’ എന്നറിയപ്പെടുന്ന തീവ്രവാദ ഗ്രൂപ്പിൽപ്പെട്ടവരാണ് പിടിയിലായത്. ബൂരി പൈപ്പ് ലൈന്‍ സ്‌ഫോടനം ആസൂത്രണം ചെയ്തതടക്കമുള്ള തീവ്രവാദ പ്രവര്‍ത്തനങ്ങള്‍ക്ക് ഇവരാണ് നേതൃത്വം നല്‍കിയിട്ടുള്ളതെന്നാണ് അറിയുന്നത്. രാജ്യത്തി​​െൻറ ഉന്നത താല്‍പര്യങ്ങള്‍ക്കും ജനങ്ങളുടെ സുരക്ഷക്കുമെതിരെയുള്ള പ്രവര്‍ത്തനമാണ് സംഘം നടത്തിയതെന്ന്​ മന്ത്രാലയം പ്രസ്​താവനയിൽ പറഞ്ഞു. 
ആഭ്യന്തര മന്ത്രാലയത്തി​​െൻറയും എണ്ണ മന്ത്രാലയത്തി​​െൻറയും പ്രദേശവാസികളുടെയൂം സഹായത്തോടെ ബൂരി സ്‌ഫോടനത്തി​​െൻറ ആഘാതം കുറക്കാന്‍ സാധിച്ചതായും മന്ത്രാലയം വ്യക്തമാക്കി. സംഭവത്തെത്തുടര്‍ന്ന് നടത്തിയ വിവിധ തലങ്ങളിലുള്ള അന്വേഷണത്തിനൊടുവിലാണ് നാല് പേരെ പിടികൂടാന്‍ സാധിച്ചത്. 
ഫാദില്‍ മുഹമ്മദ് ജഅ്ഫര്‍ അലി, അന്‍വര്‍ അബ്​ദുല്‍ അസീസ് ജഅ്ഫര്‍ അല്‍മിശൈമിഅ്, മുഹമ്മദ് അബ്​ദുല്ല ഈസ അബ്​ദുല്ല മഹ്‌റൂസ്, ആദില്‍ അഹ്​മദ് അലി അഹ്​മദ് സാലിഹ് തുടങ്ങിയവരാണ് പിടിയിലായത്. ഇതില്‍ രണ്ട് പ്രതികള്‍ക്ക് ഇറാനില്‍ നിന്നുള്ള ശക്തമായ പരിശീലനം ലഭിച്ചിട്ടുണ്ടെന്ന് തെളിവുകള്‍ ലഭിച്ചതായും മ​ന്ത്രാലയം വെളിപ്പെടുത്തി. 
ബഹ്‌റൈനില്‍ നിന്ന് നേരെത്തെ രക്ഷപ്പെട്ട ചില പ്രതികളാണ് ഇവര്‍ക്ക് പരിശീലനത്തിന് നേതൃത്വം നല്‍കിയത്. ഇവര്‍ക്ക് യാത്രക്കും പരിശീലനത്തിനുമാവശ്യമായ സംഖ്യ മതപരമായ സന്ദര്‍ശനത്തി​​െൻറ പേരിലാണ് കരസ്ഥമാക്കിയത്. കലാഷ്‌നിക്കോവ് തോക്കടക്കമുള്ള ആയുധങ്ങളുടെ ഉപയോഗത്തെക്കുറിച്ച് ഇവര്‍ക്ക് പരിശീലനം ലഭിച്ചതായി വിവരമുണ്ട്. 
ബഹ്‌റൈ​​െൻറ സാമ്പത്തിക മേഖലക്ക് കനത്ത ആഘാതമേല്‍പിക്കാനുദ്ദേശിച്ചാണ് പൈപ്പ് ലൈന്‍ സ്‌ഫോടനം ആസൂത്രണം ചെയ്തത്. സംഘത്തിലൂള്‍പ്പെട്ട മൂന്ന് പേരെകൂടി പിടികൂടാനുള്ളതായും മന്ത്രാലയം വ്യക്തമാക്കി. ഹബീബ് അബ്​ദുല്ലത്തീഫ് മഹ്ദി, അബ്​ദുല്ല ജഅ്ഫര്‍ അഹ്മദ് അല്‍മദനി, മുഹമ്മദ് അലി ഇബ്രാഹിം ഖലീല്‍ എന്നിവരാണിവര്‍. പ്രസ്തുത പ്രതികള്‍ നിലവില്‍ ഇറാനിലാണുളളതെന്നും രേഖകള്‍ വ്യക്തമാക്കുന്നൂവെന്ന് അധികൃതര്‍ കൂട്ടിച്ചേര്‍ത്തു.