ബി.ഡി.എഫി​െൻറ പുതിയ​ സ്​പെഷൽ ബറ്റാലിയൻ ക്യാമ്പ്​ ഹമദ്​ രാജാവ്​ ഉദ്​ഘാടനം ചെയ്​തു 

മനാമ: ബി.ഡി.എഫി​​െൻറ പുതിയ​ സ്​പെഷൽ ബറ്റാലിയൻ ക്യാമ്പ്​ രാജാവ്​ ഹമദ്​ ബിൻ ഇൗസ ആൽ ഖലീഫ ഉദ്​ഘാടനം ചെയ്​തു.ക്യാമ്പിലെത്തിയ രാജാവിനെ ബി.ഡി.എഫ്​ കമാൻറർ ഇൻ ചീഫ്​ ഫീൽഡ്​ മാർഷൽ ശൈഖ്​ ഖലീഫ ബിൻ അഹ്​മദ്​ ആൽ ഖലീഫ, പ്രതിരോധ മന്ത്രി ലഫ്​.ജനറൽ യൂസഫ്​ ബിൻ അഹ്​മദ്​ അൽജലാമ, റോയൽ ഗാർഡ്​ കമാൻറർ ബ്രിഗേഡിയർ ജനറൽ ശൈഖ്​ നാസർ ബിൻ ഹമദ്​ ആൽ ഖലീഫ തുടങ്ങിയവർ ചേർന്ന്​ സ്വീകരിച്ചു. 
ഉദ്യോഗസ്​ഥരുമായി ഹസ്​തദാനം ചെയ്​ത രാജാവ്​ ശിലാഫലകം അനാവരണം ചെയ്യുകയും 83ാം ബറ്റാലിയ​​െൻറ കൊടി ഉയർത്തുകയും ചെയ്​തു. സേവനത്തിനിടെ ജീവൻ വെടിഞ്ഞ ഭടൻമാരെ രാജ്യം എന്നും സ്​മരിക്കുമെന്ന്​ അദ്ദേഹം പറഞ്ഞു. 
ബി.ഡി.എഫിനെ എല്ലാ അത്യാധുനിക സാ​േങ്കതിക വിദ്യകളും ആയുധങ്ങളും കൈവശമുള്ള ​മികച്ച സേനയായി നിലനിർത്തും. 
ഭീകരത ഉൾപ്പെടെയുള്ള ഭീഷണികളെ നേരിടാനായി ജി.സി.സിയും മറ്റ്​ സൗഹൃദരാജ്യങ്ങളുമായും മെച്ചപ്പെട്ട ​ബന്ധം ഉറപ്പാക്കുമെന്നുംഅദ്ദേഹം കൂട്ടിച്ചേർത്തു.