പ്രധാനമന്ത്രിക്കും കിരീടാവകാശിക്കും  ഹമദ് രാജാവ് സ്വീകരണമൊരുക്കി 

മനാമ: ഖത്തര്‍ സന്ദര്‍ശനത്തിന് ശേഷം ബഹ്റൈനില്‍ തിരിച്ചത്തെിയ പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫയെയും കുവൈത്ത് സന്ദര്‍ശനം കഴിഞ്ഞത്തെിയ കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ഖലീഫയെയും രാജാവ് ഹമദ് ബിന്‍ ഈസ ആല്‍ഖലീഫ സ്വീകരിച്ചു. 
സഖീര്‍ പാലസില്‍ നടന്ന കൂടിക്കാഴ്ചയില്‍ രാജാവ് സന്ദര്‍ശന വിവരങ്ങള്‍ ആരാഞ്ഞു.കുവൈത്ത്, ഖത്തര്‍ എന്നീ രാജ്യങ്ങളുമായി വിവിധ മേഖലകളില്‍ സഹകരണം ശക്തിപ്പെടുത്തുന്നതിന് സന്ദര്‍ശനം കാരണമായെന്നും കൂടിക്കാഴ്ചയില്‍ വിലയിരുത്തി. 
കുവൈത്ത് അമീര്‍ ശൈഖ് സബാഹ് അല്‍അഹ്മദ് അല്‍ജാബിര്‍ അസ്സബാഹുമായി നടത്തിയ കൂടിക്കാഴ്ച്ച ആശാവഹമായിരുന്നുവെന്ന് ശൈഖ് സല്‍മാന്‍ പറഞ്ഞു. 
വിവിധ ജി.സി.സി രാഷ്ട്രങ്ങളുമായുള്ള തുറന്ന സൗഹൃദം മേഖലക്ക് കരുത്തു പകരുമെന്നും വെല്ലുവിളികളെ നേരിടാന്‍ പ്രാപ്തമാക്കുമെന്നും രാജാവ് പ്രതീക്ഷ പ്രകടിപ്പിച്ചു.