സമാജത്തില്‍ വിദ്യാഭ്യാസ മന്ത്രിയുമായി ഓണ്‍ലൈന്‍ മുഖാമുഖം

മനാമ: ബഹ്റൈന്‍ കേരളീയ സമാജം സാഹിത്യവിഭാഗം പ്രസംഗവേദിയുടെ നേതൃത്വത്തില്‍ വിദ്യാഭ്യാസ്യ മന്ത്രി പ്രഫ. സി.രവീന്ദ്രനാഥുമായി ഓണ്‍ലൈന്‍ മുഖാമുഖം സംഘടിപ്പിക്കുന്നു. ‘പുതിയ സര്‍ക്കാര്‍, പുതിയ മന്ത്രി’ എന്ന പരിപാടിയുടെ ഭാഗമായി നടക്കുന്ന അഭിമുഖം 28ന് വൈകീട്ട് അഞ്ചുമണിക്ക് സമാജം ഹാളിലാണ് സംഘടിപ്പിക്കുന്നത്. ‘വിദ്യാഭാസം ലാഭനഷ്ടക്കണക്കില്‍ പെടുത്തണോ?’എന്ന പേരില്‍ നേരത്തെ നടത്തിയ പരിപാടിയുടെ തുടര്‍ച്ചയാണിത്.  
ഇതില്‍ ബഹ്റൈന്‍ സ്കൂളുകളില്‍ മലയാളം പഠിക്കുന്ന കുട്ടികളെയും അധ്യാപകരെയും കേരളീയ സമാജം മലയാളം പാഠശാലയിലെ കുട്ടികളെയും പങ്കെടുപ്പിച്ച് ഏറ്റവും നല്ല ചോദ്യത്തിന് സമ്മാനം നല്‍കും. ഇത്തവണ മാധ്യമ പ്രവര്‍ത്തകര്‍ക്കും ചോദ്യങ്ങള്‍ ചോദിക്കാന്‍ അവസരമുണ്ട്.  ചോദ്യങ്ങള്‍ അയക്കേണ്ട വിലാസം bkspvedi@gmail.com. സമാജം ഓഫിസില്‍ നേരിട്ടും ചോദ്യങ്ങള്‍ ഏല്‍പ്പിക്കാം. തെരഞ്ഞെടുക്കുന്ന ചോദ്യങ്ങളാണ് അനുവദിക്കുക.
സ്ഥിതി വിവരകണക്കുകള്‍, നയപരമായ വിഷയങ്ങള്‍ തുടങ്ങിയവ സംബന്ധിച്ച ചോദ്യങ്ങള്‍ 20ന് മുമ്പ് ലഭിച്ചാല്‍  മാത്രമേ കൃത്യമായ മറുപടി ലഭിക്കൂ എന്ന് മന്ത്രിയുടെ ഓഫിസില്‍  നിന്ന് അറിയിച്ചിട്ടുണ്ട്.  കൂടുതല്‍ വിവരങ്ങള്‍ക്ക് സാഹിത്യവേദി സെക്രട്ടറി സുധി പുത്തന്‍വേലിക്കര (33143351), കണ്‍വീനര്‍ അഡ്വ. ജോയ് വെട്ടിയാടന്‍ (39175836) എന്നിവരുമായി ബന്ധപ്പെടാം. ആര്‍ക്കും മുഖാമുഖത്തില്‍ പങ്കെടുക്കാം.കഴിഞ്ഞ മാസങ്ങളില്‍  ധനകാര്യമന്ത്രി തോമസ് ഐസക്, കൃഷി വകുപ്പ് മന്ത്രി സുനില്‍കുമാര്‍, ഭക്ഷ്യ- സിവില്‍ സപൈ്ളസ് മന്ത്രി പി.തിലോത്തമന്‍ എന്നിവരുമായി സമാജം ഓണ്‍ലൈന്‍ മുഖാമുഖം സംഘടിപ്പിച്ചിരുന്നു. ഇതില്‍ വന്‍ ജനപങ്കാളിത്തമാണുണ്ടായത്.