യാത്രാ സമിതി ഭാരവാഹികള്‍ എ. സമ്പത്ത്  എം.പിയുമായി കൂടിക്കാഴ്ച നടത്തി 

മനാമ: യാത്രാസമിതി ഭാരവാഹികള്‍ എ. സമ്പത്ത് എം.പി. യുമായി കൂടിക്കാഴ്ച നടത്തി. പ്രവാസികളുടെ യാത്രയുമായി ബന്ധപ്പെട്ട വിവിധ വിഷയങ്ങള്‍ ചര്‍ച്ചചെയ്തു. ഇത്തരം പ്രശ്നങ്ങളില്‍ നല്‍കിയ സഹകരണത്തിന് സമിതി നന്ദി രേഖപ്പെടുത്തി. എണ്ണയുടെ വിലയിടിവിന് ആനുപാതികമായി യാത്രാനിരക്ക് കുറയാത്ത അവസ്ഥ, തിരുവനന്തപുരത്തേക്ക് എയര്‍ ഇന്ത്യ സര്‍വീസ് പുനസ്ഥാപിക്കാത്തത് തുടങ്ങി ബഹ്റൈന്‍ പ്രവാസികളുടെ നിരവധി പരിഭവങ്ങള്‍ കൂടിക്കാഴ്ചയില്‍ ഉന്നയിച്ചു. 
ഈ വിഷയങ്ങളില്‍ പാര്‍ലമെന്‍റിലും പുറത്തും എല്ലാവിധ പിന്തുണയും നല്‍കുമെന്ന് എം.പി.അറിയിച്ചു.  
യാത്രാസമിതി ചെയര്‍മാന്‍ കെ.ടി.സലിം, വൈസ് ചെയര്‍മാന്‍ അജി ഭാസി, ജോ.കണ്‍വീനര്‍ വി.കെ.അനീസ്, എക്സിക്യൂട്ടീവ് കമ്മിറ്റി അംഗം ലത്തീഫ് ആയഞ്ചേരി  എന്നിവരാണ് കൂടിക്കാഴ്ചയില്‍ പങ്കെടുത്തത്.