ആഘോഷമായി ‘സ്നോ ഇന്‍ സമ്മര്‍’ പങ്കെടുത്തത് 28,000 പേര്‍  

മനാമ: കഴിഞ്ഞ ദിവസം സമാപിച്ച ‘സ്നോ ഇന്‍ സമ്മര്‍’ ആഘോഷ പരിപാടികളില്‍ മൊത്തം 28,539 പേര്‍ പങ്കെടുത്തതായി ബഹ്റൈന്‍ ടൂറിസം ആന്‍റ് എക്സിബിഷന്‍ അതോറിറ്റി വൃത്തങ്ങള്‍ വ്യക്തമാക്കി. പെരുന്നാളിനോടനുബന്ധിച്ച് ബഹ്റൈന്‍ എക്സിബിഷന്‍ സെന്‍ററിലാണ് ആഘോഷ പരിപാടികള്‍ സംഘടിപ്പിച്ചത്. ‘മനാമ ഗള്‍ഫ് ടൂറിസം തലസ്ഥാനം-2016’ എന്ന പദ്ധതിയുടെ ഭാഗമായി നടത്തിയ പ്രസ്തുത ആഘോഷത്തില്‍ എല്ലാ വിഭാഗം ജനങ്ങളും എത്തി. ഹാളിനുള്ളില്‍ മഞ്ഞ് സൃഷ്ടിച്ച് ഒരുക്കിയ വിനോദ പരിപാടികള്‍ പുതിയ അനുഭവമായി. ജി.സി.സി രാജ്യങ്ങളില്‍ നിന്ന് ബഹ്റൈന്‍ സന്ദര്‍ശനത്തിനത്തെിയവരും ആഘോഷങ്ങളില്‍ പങ്കാളികളായി.