വിമാനം വൈകി; യാത്രക്കാര്‍ വലഞ്ഞു

മനാമ: ബഹ്റൈനില്‍ നിന്ന് ഇന്നലെ മസ്കത്ത് വഴി തിരുവനന്തപുരത്തേക്ക് യാത്ര തിരിച്ച ‘ഒമാന്‍ എയറി’ലെ യാത്രക്കാര്‍ക്ക് മസ്കത്ത് വിമാനത്താവളത്തില്‍ ദുരിതം. ഇന്നലെ കാലത്ത് പത്തു മണിക്ക് പുറപ്പെടേണ്ട വിമാനം 10.45 നാണ് ബഹ്റൈനില്‍ നിന്ന് പറന്നത്. മസ്കത്തില്‍ നിന്ന് തിരുവനന്തപുരത്തേക്കുള്ള ഡബ്ള്യു. വൈ 0215 വിമാനത്തിന് സാങ്കേതിക തകരാര്‍ ശ്രദ്ധയില്‍ പെട്ടതോടെ ഉച്ച 1.40ന് പുറപ്പെടേണ്ട വിമാനം വൈകീട്ട് 4.40നാണ് പുറപ്പെട്ടത്. ഇത്രയും നേരം യാത്രക്കാര്‍ക്ക് വിമാനത്തില്‍ എ.സിപോലുമില്ലാതെ കഴിയേണ്ടി വന്നു. കൊടും ചൂടില്‍ കുട്ടികള്‍ കരയുന്നുണ്ടായിരുന്നെന്ന് വിമാന യാത്രികനായിരുന്ന തേവലക്കര ബാദുഷ പറഞ്ഞു. വിവിധ ജി.സി.സി രാജ്യങ്ങളിലുള്ള യാത്രികര്‍ ഇതിലുണ്ടായിരുന്നു. ഇവരെല്ലാം ദുരിതത്തിലായി.