ഈസ്റ്റ് എക്കറില്‍ ബോംബ് സ്ഫോടനം:  കാറില്‍ സഞ്ചരിക്കുകയായിരുന്ന  സ്ത്രീ മരിച്ചു; മൂന്ന് കുട്ടികള്‍ക്ക് പരിക്ക് 

മനാമ: ഈസ്റ്റ് എക്കറിലുണ്ടായ ബോംബ് സ്ഫോടനത്തില്‍ ഒരു ബഹ്റൈനി വനിത കൊല്ലപ്പെട്ടു. ഇന്നലെ കാലത്താണ് സംഭവം. ഇവരുടെ മൂന്ന് കുട്ടികള്‍ക്ക് പരിക്കേറ്റതായും ആഭ്യന്തര മന്ത്രാലയം സ്ഥിരീകരിച്ചു. ബോംബ് സ്ഫോടനമുണ്ടായ വേളയില്‍ ഇതുവഴി കാര്‍ ഓടിച്ചുവന്ന സ്ത്രീയാണ് മരിച്ചത്. സംഭവത്തെക്കുറിച്ച് അന്വേഷണം ആരംഭിച്ചു. 
ഇവിടെയുള്ള ഒരു ബാങ്ക് എ.ടി.എമ്മിന് പരിസരത്തോ ഉള്ളിലോ ബോംബ് സ്ഥാപിച്ചിരിക്കാനാണ് സാധ്യതയെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. നാടന്‍ ബോംബാണ് പൊട്ടിയത് എന്ന് കരുതുന്നു. ബോംബ് സ്ഫോടനത്തെ തുടര്‍ന്ന് ഈ പ്രദേശമാകെ പൊലീസ് വളഞ്ഞു. ഇവിടെ ഗതാഗതവും തടസപ്പെട്ടു. ഈസ്റ്റ് എക്കറില്‍ നടന്ന ഭീകരാക്രമണത്തെ ശൂറ കൗണ്‍സില്‍ ശക്തിയായ ഭാഷയില്‍ അപലപിച്ചു. അക്രമപാത ബഹ്റൈന്‍ സംസ്കാരത്തിന് അന്യമാണെന്നും ദേശീയ സുരക്ഷ അട്ടിമറിക്കാനും നിരപരാധികളെ കൊന്നൊടുക്കാനുമുള്ള ഒരു നീക്കവും അനുവദിക്കില്ളെന്നും കൗണ്‍സില്‍ പ്രസ്താവനയില്‍ പറഞ്ഞു. മരിച്ച സ്ത്രീയുടെ കുടുംബത്തിന് അനുശോചനമറിയിച്ചു. രാജ്യത്തിനെതിരായ ഏത് നീക്കവും നേരിടാനുള്ള കരുത്ത് ബഹ്റൈനുണ്ടെന്ന് പ്രസ്താവനയില്‍ തുടര്‍ന്നു. 
വിവിധ നേതാക്കളും സംഘടനകളും രാഷ്ട്രങ്ങളും സ്ഫോടനത്തെ ശക്തിയായി അപലപിച്ചു. സൗദി അറേബ്യ, യു.എ.ഇ, ഖത്തര്‍, ജോര്‍ഡന്‍ തുടങ്ങിയ രാജ്യങ്ങളാണ് സ്ഫോടനത്തെ അപലപിച്ചത്. 
സംഭവത്തിന് ഉത്തരവാദികളായവരെ നിയമത്തിന് മുന്നില്‍ ഹാജരാക്കുമെന്ന് കാപിറ്റല്‍ ഗവര്‍ണറേറ്റ് പൊലീസ് ജനറല്‍ ഡയറക്ടറേറ്റ് വ്യക്തമാക്കി.