കാന്‍സര്‍ രോഗികളെ പരിചരിക്കുന്ന  സര്‍ക്കാര്‍ ജീവനക്കാര്‍ക്ക് പ്രത്യേക അവധി

മനാമ: കാന്‍സര്‍ രോഗികളെ പരിചരിക്കുന്ന, രോഗികളുടെ അടുത്ത ബന്ധുക്കളായ സര്‍ക്കാര്‍ ജീവനക്കാര്‍ക്ക് പ്രത്യേക അവധി അനുവദിക്കുന്നതിനുള്ള പ്രധാനമന്ത്രിയുടെ നിര്‍ദേശം നടപ്പാക്കാന്‍ തീരുമാനിച്ചതായി സിവില്‍ സര്‍വീസ് ബ്യൂറോ വൃത്തങ്ങള്‍ അറിയിച്ചു. രോഗിയുടെ പിതാവ്, മാതാവ്, മക്കള്‍, ഭര്‍തൃ പിതാവ്, ഭര്‍തൃ മാതാവ്, ഭാര്യാപിതാവ് എന്നിവര്‍ക്ക് വേതനത്തോടെ അവധി അനുവദിക്കാനാണ് തീരുമാനം. ബഹ്റൈനിലോ വിദേശത്തോ ചികിത്സക്കായി പോകുമ്പോഴും ചികിത്സയുടെ ഭാഗമായി കൂടെ കഴിയുമ്പോഴും അവധി അനുവദിക്കും. രോഗികള്‍ക്ക് സഹായമാകുന്ന ഉത്തരവിട്ട പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫക്ക് സിവില്‍ സര്‍വീസ് ബ്യൂറോ ചീഫ് അഹ്മദ് ബിന്‍ സായിദ് പ്രത്യേകം നന്ദി അറിയിച്ചു.