ഹമദ് രാജാവ് ബി.ഡി.എഫ് ആസ്ഥാനം സന്ദര്‍ശിച്ചു

മനാമ: രാജാവ് ഹമദ് ബിന്‍ ഈസ ആല്‍ ഖലീഫ ബഹ്റൈന്‍ പ്രതിരോധ സേന (ബി.ഡി.എഫ്) ആസ്ഥാനത്ത് സന്ദര്‍ശനം നടത്തി. രാജാവിനെ ചീഫ് ഓഫ് സ്റ്റാഫ് ലഫ്.ജനറല്‍ ദിയാബ് ബിന്‍ സഖ്ര്‍ അല്‍ നുഐമി, റോയല്‍ ഗാര്‍ഡ് കമാന്‍റര്‍ ബ്രിഗേഡിയര്‍ ശൈഖ് നാസിര്‍ ബിന്‍ ഹമദ് ആല്‍ ഖലീഫ, മുതിര്‍ന്ന ഉദ്യോഗസ്ഥര്‍ തുടങ്ങിയവര്‍ ചേര്‍ന്ന് സ്വീകരിച്ചു. തുടര്‍ന്ന് രാജാവ് ബി.ഡി.എഫ് നേതൃത്വവുമായി ചര്‍ച്ച നടത്തി. രാജ്യത്തിന്‍െറ അഭിമാനമാണ് ബി.ഡി.എഫ് എന്ന് അദ്ദേഹം പറഞ്ഞു. ബി.ഡി.എഫ് സേവനങ്ങള്‍ വിലമതിക്കാനാകാത്തതാണ്. ആധുനിക ഉപകരണങ്ങളും കാലത്തിനൊത്ത പരിശീലവുമായുള്ള ബി.ഡി.എഫിന്‍െറ വികസന പദ്ധതികളില്‍ രാജാവ് സംതൃപ്തി രേഖപ്പെടുത്തി. വിവിധ ദൗത്യങ്ങളില്‍ ഭടന്‍മാര്‍ കാഴ്ചവെച്ച പ്രകടനം അഭിമാനകരമാണ് എന്നും അദ്ദേഹം പറഞ്ഞു. സമാധാന, സേവന ദൗത്യങ്ങളിലെ ബി.ഡി.എഫ് പങ്കാളിത്തം തുടരും. മേഖലയുടെ സുരക്ഷക്കായി ജി.സി.സി രാജ്യങ്ങളുമായുള്ള സൈനിക ബന്ധം നിലനിര്‍ത്തും. ബഹ്റൈന്‍ എക്കാലവും ഐക്യവും അഖണ്ഡതയും കാത്തുസൂക്ഷിക്കുമെന്നും ഇക്കാര്യത്തില്‍ ജനങ്ങളോട് നന്ദിയുണ്ടെന്നും രാജാവ് കൂട്ടിച്ചേര്‍ത്തു.