ഹമദ് രാജാവ്  വിവിധ നേതാക്കളുമായി ചര്‍ച്ച നടത്തി

മനാമ: ബഹ്റൈന്‍ ഭരണാധികാരി കിങ് ഹമദ് ബിന്‍ ഈസ ആല്‍ഖലീഫ കഴിഞ്ഞ ദിവസം റിയാദില്‍ ആരംഭിച്ച ജി.സി.സി സംയുക്ത ഉച്ചകോടിയില്‍ പങ്കെടുത്തു. വിവിധ രാജ്യങ്ങളില്‍ നിന്നുള്ള നേതാക്കളും അമേരിക്കന്‍ പ്രസിഡന്‍റ് ബറാക് ഒബാമയുമായി സൗഹൃദം പങ്കിട്ട ഹമദ് രാജാവ്, സൗദി ഭരണാധികാരി സല്‍മാന്‍ രാജാവിന്‍െറ നിലപാടുകള്‍ അറബ് മേഖലക്ക് ഏറെ ഗുണകമരായി മാറുന്ന സാഹചര്യമാണുള്ളതെന്ന് അഭിപ്രായപ്പെട്ടു. മേഖലയില്‍ സമാധാനം സ്ഥാപിക്കുന്നതിനും വെല്ലുവിളികള്‍ നേരിടുന്നതിനും ഉച്ചകോടി ഫലപ്രദമാകുമെന്നാണ് കരുതുന്നത്. സംയുക്ത ഉച്ചകോടി സംഘടിപ്പിക്കുന്നതിന് നേതൃത്വം നല്‍കിയ സല്‍മാന്‍ രാജാവിനെ അദ്ദേഹം പ്രശംസിച്ചു. 
മേഖലയില്‍ സമാധാനം സ്ഥാപിക്കുന്നതിന് തീവ്രവാദം ഇല്ലാതാക്കേണ്ടത് അനിവാര്യമാണെന്ന് തെളിയിക്കുന്നതായിരുന്നു ഉച്ചകോടിയിലെ നേതാക്കളുടെ അഭിപ്രായങ്ങള്‍. മേഖലയുടെ പുരോഗതിക്ക് സൗദിയുടെ കീഴില്‍ ഉറച്ചു നില്‍ക്കുന്നതില്‍ സന്തോഷമുണ്ടെന്ന് ഹമദ് രാജാവ് കൂട്ടിച്ചേര്‍ത്തു. ഉച്ചകോടിയില്‍ പങ്കെടുത്ത നേതാക്കളോടുള്ള ആദര സൂചകമായി സല്‍മാന്‍ രാജാവ് സംഘടിപ്പിച്ച വിരുന്നിലും അദ്ദേഹം പങ്കെടുത്തു.