കലയുടെ ഊടും പാവുമായി  പ്രജോദ് കൃഷ്ണയും സന്ധ്യയും

മനാമ: ബഹ്റൈന്‍ കേരളീയ സമാജത്തിലെ ഭരതനാട്യ കച്ചേരിയില്‍ ദമ്പതികള്‍ ഒന്നിച്ചത് കൗതുകമായി. സംഗീത അധ്യാപകനായ പ്രജോദ് കൃഷ്ണയും നൃത്ത അധ്യാപികയായ സന്ധ്യ പ്രജോദുമാണ് കച്ചേരിയില്‍ ഒന്നിച്ചത്. 
അങ്കമാലി സ്വദേശിയായ പ്രജോദ്കൃഷ്ണ തൃപ്പൂണിത്തറ ആര്‍.എല്‍.വി കോളജില്‍നിന്നാണ് സംഗീതത്തില്‍ ബിരുദാനന്തരബിരുദം നേടിയത്. ഇപ്പോള്‍ ബഹ്റൈന്‍ ഇന്ത്യന്‍ മ്യൂസിക് ആര്‍ട് സെന്‍ററിലെ സംഗീത അധ്യാപകനും പ്രിന്‍സിപ്പലുമാണ്. പ്രശസ്തരായ ജി.ദേവരാജന്‍, ആലപ്പി രംഗനാഥ്, കുമരകം രാജപ്പന്‍ തുടങ്ങിയവരുടെ സംഗീതത്തില്‍ ഒട്ടനവധി പാട്ടുകള്‍ പാടിയിട്ടുണ്ട്. 
എറണാകുളം പള്ളിക്കര സ്വദേശിയാണ് സന്ധ്യ പ്രജോദ്.ചെറുപ്പത്തിലേ നൃത്തം അഭ്യസിച്ച് ആര്‍.എല്‍.വി കോളജില്‍നിന്ന് നൃത്തത്തില്‍ ബിരുദം നേടി. ഇപ്പോള്‍ ഭര്‍ത്താവിനൊപ്പം മ്യൂസിക് സെന്‍ററില്‍ നൃത്ത അധ്യാപികയാണ്. കേരളത്തില്‍ പല വേദികളിലും നൃത്തം അവതരിപ്പിച്ചിട്ടുണ്ട് ഇവര്‍.  ബഹ്റൈന്‍ കലാസ്വാദകര്‍ക്ക് സുപരിചിതമാണ് സന്ധ്യയുടെ നടനവൈഭവം. ഗൗരികൃഷ്ണ, പലവികൃഷ്ണ എന്നിവര്‍ മക്കളാണ്.