മുഖങ്ങള്‍ പകര്‍ത്തി; ആപ്പിള്‍ തങ്കശ്ശേരി ലിംക ബുക്കിലേക്ക് നടന്നുകയറി

മനാമ: ഫെയ്സ്ബുക്ക് സുഹൃത്തുക്കളായ ആയിരത്തിലേറെ പേരുടെ മുഖങ്ങള്‍ വരച്ച പ്രവാസി ‘ലിംക ബുക് ഓഫ് റെക്കോര്‍ഡ്സി’ല്‍ ഇടം നേടി.
ബഹ്റൈനില്‍ ജോലി ചെയ്യുന്ന കൊല്ലം സ്വദേശി ആപ്പിള്‍ തങ്കശ്ശേരി എന്ന ആല്‍ബര്‍ട്ട് ആന്‍റണിയാണ് ഈ നേട്ടം കൈവരിച്ചത്. കഴിഞ്ഞ ദിവസം ഇത് സംബന്ധിച്ച് ലിംക ബുക് അധികൃതരുടെ സന്ദേശം അദ്ദേഹത്തിന് ലഭിച്ചു. സുഹൃത്തുക്കളുടെയും പ്രശസ്ത വ്യക്തികളുടെയും ചിത്രങ്ങള്‍ വരച്ച് ഫെയ്സ്ബുക്കില്‍ പോസ്റ്റ്ചെയ്യുകയുമായിരുന്നു ആപ്പിളിന്‍െറ രീതി. ഇതിന് മാധ്യമമായി തെരഞ്ഞെടുത്തതാകട്ടെ പെന്‍സിലും. മുഴുവന്‍ ചിത്രങ്ങളും പെന്‍സില്‍ ഡ്രോയിങിലാണ് പൂര്‍ത്തിയാക്കിയത്. 
1014 ചിത്രങ്ങളാണ് ആല്‍ബര്‍ട്ട് ഇതുവരെ പോസ്റ്റ് ചെയ്തത്. കഴിഞ്ഞ ജൂണ്‍ 30 വരെയുള്ള 450ഓളം ചിത്രങ്ങള്‍ പരിഗണിച്ചപ്പോള്‍ തന്നെ ഇദ്ദേഹം റെക്കോര്‍ഡിന് അര്‍ഹത നേടിയിരുന്നുവെന്ന് ലിംക ബുക് അധികൃതരുടെ സന്ദേശത്തില്‍ പറയുന്നു. കഴിഞ്ഞ വര്‍ഷം ജൂലൈ മുതലാണ് ഇദ്ദേഹം വര തുടങ്ങിയത്. ജനുവരി അവസാനം ലിംക റെക്കോര്‍ഡ്സിന്‍െറ ഹരിയാനയിലെ ആസ്ഥാനത്ത് നേരിട്ട് ചെന്ന് സര്‍ട്ടിഫിക്കറ്റ് ഏറ്റുവാങ്ങണമെന്ന് അദ്ദേഹത്തിനെ അറിയിച്ചിട്ടുണ്ട്.
ബഹ്റൈനിലെ ഇന്‍ഡക്സ് അഡ്വര്‍ടൈസിങ് കമ്പനിയില്‍ പ്രൊഡക്ഷന്‍ സൂപ്പര്‍ വൈസറായി ജോലി ചെയ്യുന്ന ഇദ്ദേഹം ഭാര്യയുടെ പോര്‍ട്രെയ്റ്റ് വരച്ച് ഫെയ്സ്ബുക്കിലിട്ടാണ് ഈ ഉദ്യമം തുടങ്ങിയത്.  
കൊല്ലം ജില്ലയിലെ തങ്കശ്ശേരി കടല്‍പ്പുറത്തെ മത്സ്യത്തൊഴിലാളിയായ ആന്‍റണിയുടെയും ഫ്രാന്‍സിനയുടെയും ആറ് ആണ്‍ മക്കളില്‍ ഇളയ മകനാണ് ആല്‍ബര്‍ട്ട് ആന്‍റണി. നാട്ടില്‍ നഴ്സായ ജോനയാണ് ഭാര്യ. മക്കള്‍ ആഞ്ചലോ, എബി.