യു.എസുമായുളള സൈനിക സഹകരണം  മേഖലക്ക് അനിവാര്യം –ഹമദ് രാജാവ്

മനാമ: അമേരിക്കയുമായുള്ള സൈനിക സഹകരണം മേഖലക്ക് അനിവാര്യമാണെന്ന് രാജാവ് ഹമദ് ബിന്‍ ഈസ ആല്‍ഖലീഫ വ്യക്തമാക്കി. 
ബഹ്റൈന്‍ സന്ദര്‍ശനത്തിനത്തെിയ യു.എസ് പ്രതിരോധ മന്ത്രി ആഷ്തന്‍ കാര്‍ട്ടറെ സാഫിരിയ്യ പാലസില്‍ സ്വീകരിക്കുകയായിരുന്നു അദ്ദേഹം. 
ഇരുരാജ്യങ്ങളൂം തമ്മില്‍ വിവിധ മേഖലകളില്‍ നിലനില്‍ക്കുന്ന സഹകരണം ആശാവഹമാണെന്നും സഖ്യരാഷ്ട്രങ്ങളെന്ന നിലയില്‍ വിവിധ അന്താരാഷ്ട്ര പ്രശ്നങ്ങളില്‍ ഏകാഭിപ്രായം സ്വീകരിക്കുന്നത് ആശാവഹമാണെന്നും അദ്ദേഹം പറഞ്ഞു. മേഖല അഭിമുഖീകരിക്കുന്ന വിവിധ പ്രശ്നങ്ങളെക്കുറിച്ച് ഇരുവരും ചര്‍ച്ച ചെയ്തു. മേഖലയില്‍ സമാധാനം സ്ഥാപിക്കുന്നതിനുള്ള ശ്രമങ്ങള്‍ ശക്തിപ്പെടുത്തേണ്ടത് അനിവാര്യമാണെന്ന് ആഷ്തന്‍ വ്യക്തമാക്കി. ഇക്കാര്യത്തില്‍ ബഹ്റൈന്‍െറ നിലപാടുകളും സഹകരണവും ഏറെ ആശാവഹവും പ്രതീക്ഷയുണര്‍ത്തുന്നതുമാണ്. 
തീവ്രവാദത്തിനും ഭീകരതക്കുമെതിരായി സമാധാനത്തിന്‍െറ ഭാഗത്ത് നിലകൊള്ളാന്‍ ബഹ്റൈന്‍ എന്നും മുന്നിലാണെന്നും ഹമദ് രാജാവ് കൂട്ടിച്ചേര്‍ത്തു. ഹമദ് രാജാവിന്‍െറ കീഴില്‍ രാജ്യം കൂടുതല്‍ മേഖലകളില്‍ വളര്‍ച്ചയും വികാസവും നേടിക്കൊണ്ടിരിക്കുന്നതിനെ ആഷ്തന്‍ പ്രത്യേകം പ്രകീര്‍ത്തിച്ചു.