ഇന്ത്യയിലെ മുസ്​ലിംകൾക്കെതിരായ അതിക്രമങ്ങൾ: പ്രസ്​താവനയുമായി കുവൈത്ത്​ പാർലമെൻറ്​ അംഗങ്ങൾ

കുവൈത്ത്​ സിറ്റി: ഇന്ത്യയിൽ മുസ്​ലിംകൾക്കെതിരായ അതിക്രമങ്ങൾ ആവർത്തിക്കുന്നതിനെതിരെ സംയുക്​ത പ്രസ്​താവനയുമായി കുവൈത്ത്​ പാർലമെൻറ്​ അംഗങ്ങൾ. അസമിലെ അക്രമങ്ങളുടെ പശ്ചാത്തലത്തിലാണ്​ അന്താരാഷ്​ട്ര സമൂഹം ഇടപെടണമെന്നാവശ്യപ്പെട്ട്​ പ്രസ്​താവന പുറപ്പെടുവിച്ചത്​. മുസ്​ലിംക​ളെ കൊലപ്പെടുത്തുന്നതും ആട്ടിയോടിക്കുന്നതും ഇന്ത്യയിൽ ആവർത്തിക്കുകയാണ്​. ഭരണകൂടം ഇടപെട്ട്​ ഇത്​ അവസാനിപ്പിക്കണം.

സ്വന്തം നാട്ടിൽ സമാധാനത്തോടെ ജീവിക്കാൻ ഇന്ത്യയിലെ മുസ്​ലിംകൾക്കും അവകാശമുണ്ട്​. അത്​ അനുവദിക്കാതെയുള്ള സംഘടിത അക്രമങ്ങൾ യുദ്ധക്കുറ്റമായി കണ്ട്​ അന്താരാഷ്​ട്ര സമൂഹം ഇടപെടണം. ഹിന്ദുത്വ ശക്​തികളുടെ അക്രമണങ്ങളെ ഭരണകൂടം അപലപിക്കുകയോ നടപടികൾ സ്വീകരിക്കുകയോ ചെയ്യുന്നില്ല.

കുവൈത്ത്​ വിദേശകാര്യ മന്ത്രാലയം വിഷയത്തിൽ പ്രസ്​താവന ഇറക്കണം. ഇരകളാക്കപ്പെടുന്നവർക്കായി പ്രാർഥിക്കാൻ ഇമാമുമാരോട്​ ഒൗഖാഫ്​ മന്ത്രാലയം ആവശ്യപ്പെടണം. അന്താരാഷ്​ട്ര മനുഷ്യാവകാശ സംഘടനകളും ഇസ്​ലാമിക സംഘടനകളും വിഷയത്തിൽ ഇടപെട്ട്​ മുസ്​ലിം സഹോദരങ്ങളുടെ സുരക്ഷ ഉറപ്പാക്കണമെന്ന്​ പാർലമെൻറ്​ അംഗങ്ങൾ സംയുക്​ത പ്രസ്​താവനയിൽ പറഞ്ഞു.