അബൂദബി കിരീടാവകാശിയുമായി ഇസ്രായേൽ പ്രധാനമന്ത്രി ചർച്ച നടത്തി

അബൂദബി: യു.എ.ഇയിൽ ആദ്യമായി സന്ദർശനത്തിനെത്തിയ ഇസ്രായേൽ പ്രധാനമന്ത്രി നഫ്​താലി ബെന്നറ്റ്​ അബൂദബി കിരീടാവകാശിയും യു.എ.ഇ സായുധ സേന ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നെഹ്​യാനുമായി ചർച്ച നടത്തി. ഇരുരാജ്യങ്ങളും തമ്മിലുള്ള സഹകരണവും മേഖലയിലെ സുരക്ഷ പ്രശ്​നങ്ങളുമാണ്​ പ്രധാനമായും ചർച്ച ചെയ്​തത്​.

ഭക്ഷ്യ സുരക്ഷ, കാർഷികം, പുനരുജ്ജീവിപ്പിക്കാവുന്ന ഊർജം, സാ​ങ്കേതിക മേഖല, ആരോഗ്യം, സാമ്പത്തികം, വ്യാപാരം എന്നീ മേഖലകളിലെ ന​ിക്ഷേപം സംബന്ധിച്ച്​ വിലയിരുത്തുകയും നിക്ഷേപം വർധിപ്പിക്കാൻ തീരുമാനിക്കുകയും ചെയ്​തു.

പരസ്പര ബഹുമാനം, സഹകരണം, സഹവർത്തിത്വം, സമാധാനം എന്നീ മൂല്യങ്ങൾ ഉയർത്തിപ്പിടിക്കുന്ന തത്വങ്ങളിൽ അധിഷ്​ഠിതമാണ്​ യു.എ.ഇയുടെ വിദേശബന്ധങ്ങളെന്നും ജനങ്ങളുടെ അഭിലാഷങ്ങൾ സാക്ഷാത്​കരിക്കാനുള്ള ഏറ്റവും നല്ല മാർഗമാണിതെന്നും​ ​ൈ​ശഖ്​ മുഹമ്മദ്​ ബിൻ സായിദ്​ പറഞ്ഞു.

പരിധികളില്ലാത്ത വ്യാപാര ബന്ധമാണ്​ യു.എ.ഇയും ഇസ്രായേലും തമ്മിലുള്ളതെന്ന്​ ബെന്നറ്റ്​ പറഞ്ഞു. അനന്തമായ വ്യാപാര സാധ്യതകളാണ്​ ഈ സഹകരണ​ത്തിലൂടെ ഉരുത്തിരിഞ്ഞുവരുന്നത്​.

ഇരുരാജ്യങ്ങൾക്കും മാത്രമല്ല, നിരവധി രാജ്യങ്ങൾക്ക്​ ഇതി​െൻറ ഗുണമുണ്ടാകും. എണ്ണ ഇതര മേഖലയിൽ ഒരു വർഷത്തിനിടെ 700 ദശലക്ഷം ഡോളറി​െൻറ വ്യാപാരമാണ്​ നടന്നത്​. സാ​ങ്കേതിക മേഖല, നിർമിത ബുദ്ധി, വിനോദ സഞ്ചാരം, ഗതാഗതം, ആരോഗ്യം, ഊർജം എന്നീ മേഖലകളിലായി 60 സുപ്രധാന കരാറുകൾ ഒപ്പുവെച്ചു. മേഖലയിൽ സ്ഥിരതയും സമൃദ്ധിയും വർദ്ധിപ്പിക്കുന്നതിനുള്ള ഘടകമാണ്​ ഈ സഹകരണം. എക്​സ്​പോയിലെ ഇസ്രായേലി പവലിയൻ ഏവരെയും ആഷർഷിക്കുന്നതാണെന്നും അദ്ദേഹം കൂട്ടിചേർത്തു.

ഞായറാഴ്​ച രാത്രിയാണ്​ ബെന്നറ്റ്​ അബൂദബിയിൽവിമാനമിറങ്ങിയത്​. വിദേശകാര്യ-അന്താരാഷ്​ട്ര സഹകരണ മന്ത്രി ശൈഖ്​ അബ്​ദുല്ല ബിൻ സായിദ്​ ആൽ നഹ്​യാനാണ്​ വിമാനത്താവളത്തിലെത്തി ബെന്നറ്റിനെ സ്വീകരിച്ചത്​.