കാറുകളും തെരുവുകളുമുണ്ടാവില്ല; സൗദിയിൽ ഉയരുന്നത്​ കാർബൺ രഹിത പരിസ്ഥിതി സൗഹൃദ നഗരം

ജിദ്ദ: കാറുകളോ, തിരക്കുപിടിച്ച തെരുവുകളോ, കാർബൺ പുറന്തള്ളലോ ഇല്ലാത്ത ഒരു നഗരം. പുതിയ കാലത്ത്​ ചിന്തിക്കാൻപോലും കഴിയാത്ത ഇത്തരമൊരു നഗരത്തെ പടുത്തുയർത്താനുള്ള പദ്ധതികളിലാണ്​ സൗദി അറേബ്യ. കാർബൺ രഹിതവും പരിസ്ഥിതി സൗഹൃദവുമായ നഗരമാണ്​ നിയോമിൽ ഉയരുകയെന്ന്​ സൗദി കിരീടാവകാശിയും നിയോം കമ്പനി ഡയറക്​ടർ ബോർഡ്​ ചെയർമാനുമായ അമീർ മുഹമ്മദ്​ ബിൻ സൽമാൻ പ്രഖ്യാപിച്ചു. 'ദി ലൈൻ' എന്ന പേരിലുള്ള ഇൗ നഗരം ഭാവിയിൽ നഗര സമൂഹങ്ങൾ എങ്ങനെയായിരിക്കാമെന്നതി​െൻറ മികച്ച മാതൃകയായിരിക്കുമെന്നും അദ്ദേഹം വ്യക്തമാക്കി. 170 കിലോമീറ്റർ നീളമുള്ള ഈ നഗരം പത്തുലക്ഷം പേർക്ക്​ വസിക്കാൻ കഴിയുന്നതാകും. നിയോമിലെ 95 ശതമാനം പ്രകൃതിയെയും സംരക്ഷിക്കുന്ന ഇൗ നഗര പദ്ധതി പ്രകൃതിയോടൊപ്പം ജീവിക്കാൻ കഴിയുന്നതും സന്തുലിതാവസ്ഥ ഉറപ്പുനൽകുന്നതുമായിരിക്കും. ശബ്​ദമോ മലിനീകരണമോ ഇല്ലാത്ത പരിസ്ഥിതിയായിരിക്കും. വാഹനങ്ങളിൽ നിന്നും അതുണ്ടാക്കുന്ന പരിസ്​ഥിതി മലിനീകരണത്തിൽ നിന്നും ജനതിരക്കുകളിൽ നിന്നും മുക്തമായിരിക്കും.

തകർന്നടിഞ്ഞ അടിസ്ഥാന സൗകര്യങ്ങൾ, പരിസ്ഥിതി മലിനീകരണം, നഗര ജനസംഖ്യ വർധനവ്​ പോലുള്ള മനുഷ്യരാശിയുടെ പു​രോഗതിയെ തടസ്സപ്പെടുത്തുന്ന നഗരവത്​കരണ വെല്ലുവിളികളെ ചെറുക്കുന്നതാവും ഇൗ നഗരം. രാജ്യത്തി​െൻറ സമഗ്ര സാമൂഹിക സാമ്പത്തിക സാംസ്​കാരിക പരിവർത്തന വികസന കാഴ്​ചപ്പാടായ 'വിഷൻ 2030'​െൻറ ലക്ഷ്യങ്ങൾ സാക്ഷാത്​കരിക്കുന്നതായിരിക്കും ഇൗ നഗര പദ്ധതി. വ്യത്യസ്​ത മേഖലകളിലായി 3,380,000 തൊഴിലവസരങ്ങൾ സൃഷ്​ ടിക്കാനാവും ഇൗ പദ്ധതിക്കാവും. ആഭ്യന്തര ഉൽപാദന രംഗത്ത്​ 180 ശതകോടി റിയാലി​െൻറ സംഭാവനകളുണ്ടാകുമെന്നും കിരീടാവകാശി പറഞ്ഞു. 2050 ആകു​േമ്പാഴേക്കും പട്ടണങ്ങളിൽ താമസിക്കുന്നവരുടെ എണ്ണം ഇരട്ടിയാകും.

വർധിച്ചുവരുന്ന കാർബൺ പുറംതള്ളലും സമുദ്ര ജലം ഉയരലും കാരണം ശതകോടി ജനങ്ങൾ പട്ടണം വിടുമെന്നും കിരീടാവകാശി പറഞ്ഞു. ഇടുങ്ങിയ ഇടങ്ങളിൽ ആളുകളെ സംരക്ഷിക്കുന്നതിനാണ്​ നഗരങ്ങൾ നിർമിച്ചത്​. വ്യാവസായിക വിപ്ലവത്തിന്​ ശേഷം നഗരങ്ങളിൽ കാറുകളും ഫാക്​ടറികളും മനുഷ്യരാശിക്ക്​ മുമ്പിൽ സ്ഥാപിതമായി. വികസനത്തിനായി പ്രകൃതിയെ ത്യജിക്കുകയാണ്​. മലിനീകരണം മൂലം പ്രതിവർഷം ഏഴ്​ ദശലക്ഷം ആളുകൾ മരിക്കുന്നു. വാഹനാപകട മരണത്തിൽ പ്രതിവർഷം ഒരു ദശലക്ഷം ആളുകൾ നമുക്ക്​ നഷ്​ടപ്പെടുകയാണ്​. ഇതെല്ലാം എന്തുകൊണ്ടാണെന്നും കിരീടാവകാശി ചോദിച്ചു.

ദി ലൈൻ നഗരം നഗരവികസനത്തെ പുനർനിർവചിക്കും. ജീവിത നിലവാരം ഉയർത്തും. അഞ്ച്​ മിനിറ്റ്​​ നടത്തത്തിനിടയിൽ മെഡിക്കൽ കേന്ദ്രങ്ങൾ, സ്​കൂളുകൾ, വിനോദ സ്ഥാപനങൾ, ഹരിത ഇടങ്ങൾ എന്നിവിടങ്ങളിലെത്താൻ കഴിയും. യാത്രക്ക്​ ഏറ്റവും ​അതിവേഗ മാർ​ഗങ്ങളുണ്ടാകും. ഏറ്റവും വിദൂര യാത്ര​ 20 മിനിറ്റ്​​ മാത്രമേ എടുക്കുകയുള്ളൂ. നഗരത്തിലെ ആളുകളുടെ അഭൂതപൂർവമായ കഴിവുകൾ മുൻകൂട്ടി അറിയാനും അവരുമായി ഇടപഴകാനും പ്രാപ്​തരാക്കുന്ന ആശയവിനിമയ സംവിധാനങ്ങളുണ്ടാകും. ഇതിനായി ആർട്ടിഫിഷ്യൽ ഇൻറലിജൻസ്​ ടെക്​നോളജിയെ ഉപയോഗപ്പെടുത്തും. ആളുകൾ വെർച്വൽ സംവിധാനത്തിലുടെ പരസ്​പരം ബന്ധപ്പെട്ടിരിക്കുന്ന വിധം എല്ലാം ആധുനി​േകാത്തരമാകുമെന്നും കിരീടാവകാശി പറഞ്ഞു.

ദി ലൈൻ ജീവിതത്തിന്​ പുതിയൊരു അർഥം നൽകും. ഭാവി നഗരങ്ങളെ പ്രകൃതിയുമായി പൊരുത്തപ്പെടുന്നതി​െൻറ​ സമാനതകളില്ലാത്ത മാതൃകയാകും. 100 ശതമാനം ശുദ്ധമായ ഉൗർജത്തെയായിരിക്കും ആശ്രയിക്കുക. നഗരവത്​കരണത്തി​െൻറ വെല്ലുവിളികൾക്ക്​ പരിഹാരം കാണാൻ ലോകമെമ്പാടുമുള്ള ​വിദഗ്​ധരുമായി നിയോം സഹകരിച്ചു പ്രവർത്തിക്കും. പുതുമ തേടുന്നവർക്കും സംരംഭകർക്കും നിക്ഷേപകർക്കും ആകർഷകമായ അന്തരീക്ഷം ഒരുക്കും. 2021 ആദ്യ പാദത്തിൽ ദി ലൈൻ പദ്ധതി ആരംഭിക്കും. നിയോമിൽ നടന്നുകൊണ്ടിരിക്കുന്ന വലിയ വികസനത്തി​െൻറ സുപ്രധാന ഭാഗമാണിതെന്നും കിരീടാവകാശി പറഞ്ഞു.