സൗദി അറേബ്യയിൽ വീണ്ടും അന്താരാഷ്​ട്ര വിമാന സർവിസിന്​ വിലക്ക്​; കര, നാവിക, വ്യോമ മാർഗങ്ങൾ ഒരാഴ്​ചത്തേക്ക്​ അടച്ചു

ജിദ്ദ: ഒരാഴ്​ചത്തേക്ക്​ അത്യാവശ്യ സർവിസൊഴികെ എല്ലാ അന്താരാഷ്​ട്ര വിമാന സർവിസുകളും വിലക്കിയതായി സൗദി ആഭ്യന്തര മന്ത്രാലയം അറിയിച്ചു. വിവിധ രാജ്യങ്ങളിൽ പുതിയ കോവിഡ്​ റിപ്പോർട്ട്​ ചെയ്​തതിനെ തുടർന്ന്​ ആരോഗ്യ മന്ത്രാലയത്തി​െൻറ ശിപാർശയുടെ അടിസ്ഥാനത്തിലാണ്​ തീരുമാനം. ഇതേ തുടർന്ന്​ താഴെ കൊടുത്ത മുൻകരുതൽ നടപടികളെടുക്കാൻ സൗദി ഗവൺമെൻറ്​ തീരുമാനിച്ചു.

1. എല്ലാ അന്താരാഷ്​ട്ര വിമാന സർവിസുകളും താൽകാലികമായി ഒരാഴ്​ചത്തേക്ക്​ നിർത്തലാക്കും. അസാധാരണ കേസുകളുമായി ബന്ധപ്പെട്ട വിമാന സർവിസുകൾ മാത്രം അനുവദിക്കും. അതോടൊപ്പം നിലവിൽ സൗദിയിലുള്ള വിദേശ വിമാനങ്ങൾക്ക്​ പോകാൻ അനുവാദമുണ്ടാകും. ഇൗ തീരുമാനം വീണ്ടും ഒരാഴ്​ചത്തേക്ക്​ വരെ നീട്ടാം.

2. കര, നാവിക, വ്യോമമാർഗങ്ങളിലൂടെ രാജ്യത്തേക്കുള്ള പ്രവേശനം ഒരാഴ്​ചത്തേക്കും വിലക്കും. ഇതും വീണ്ടും ഒരാഴ്​​ച കൂടി നീട്ടിയേക്കാം​.

3. ഡിസംബർ എട്ട് മുതൽ ഏതെങ്കിലും യൂറോപ്യൻ രാജ്യങ്ങളിൽ നിന്നോ, പകർച്ചവ്യാധി പ്രത്യക്ഷപ്പെട്ട ഏതെങ്കിലും രാജ്യത്തു നിന്നോ സൗദിയിലെത്തിയവർ താഴെ പറയുന്ന കാര്യങ്ങൾ പാലിക്കണം​.

- രാജ്യത്തേക്ക്​ പ്രവേശിച്ച തീയതി മുതൽ രണ്ടാഴ്​ചത്തേക്ക്​ ഹോം ക്വാറൻറീനിൽ കഴിയണം.

- ക്വാറൻറീൻ കാലയളവിൽ കോവിഡ്​ പരിശോധന നടത്തണം. ഒരോ അഞ്ച്​ ദിവസത്തിലും പരിശോധന ആവർത്തിക്കണം.

- കഴിഞ്ഞ മൂന്ന്​ മാസത്തിനിടയിൽ ഏതെങ്കിലും യൂറോപ്യൻ രാജ്യത്ത്​ നിന്ന്​ മടങ്ങിയെത്തിയവർ അല്ലെങ്കിൽ പകർച്ചവ്യാധി പ്രത്യക്ഷപ്പെട്ട ഏതെങ്കിലും രാജ്യങ്ങളിലൂടെ കടന്നുപോയവർ കോവിഡ്​ പരിശോധന നടത്തണം.

ഗതാഗത മന്ത്രാലയവുമായി ആ​രോഗ്യ മന്ത്രി നടത്തിയ ആലോചനയെ തുടർന്ന്​ പുതിയ വൈറസ്​ ബാധ റിപ്പോർട്ട്​ ചെയ്യാത്ത രാജ്യങ്ങളിൽ നിന്നുള്ള ചരക്ക്​ ഗാതഗതത്തെ വിലക്കിൽ നിന്ന്​ ഒഴിവാക്കി. പുതിയ വൈറസി​െൻറ സ്വഭാവം വ്യക്തമാകുന്നതുവരെയും പൊതുജനാരോഗ്യ സുരക്ഷ കണക്കിലെടുത്തുമാണ്​ വിലക്കിനുള്ള തീരുമാനമെന്നും കോവിഡുമായി ബന്ധപ്പെട്ട പുതിയ സംഭവവികാസങ്ങളുടെ വെളിച്ചത്തിൽ തീരുമാനം പുനപരിശോധിക്കുമെന്നും ആഭ്യന്തര മന്ത്രാലയ വൃത്തങ്ങൾ അറിയിച്ചു.