കലാഭവൻ നസീബിന്​ റിയാദ്​ കലാഭവൻ പുരസ്​കാരം

റിയാദ്​: അറിയപ്പെടുന്ന ഹാസ്യകലാകാരനും പ്രവാസിയുമായ നസീബ്​ കലാഭവന്​​ റിയാദിലെ കലാഭവൻ കലാസാംസ്​കാരിക കൂട്ടായ്​മയുടെ പുരസ്​കാരം. റിയാദ് കലാഭവൻ എല്ലാവർഷവും നൽകിവരാറുള്ള കലാഭവൻ കർമ പുരസ്കാരത്തിനാണ്​ ഈ വർഷം നസീബിനെ തെരഞ്ഞെടുത്തിരിക്കുന്നത്​. മിമിക്രി താരവും സിനിമാ നടനുമായ റിയാസ് നർമകല, സംസ്ഥാന നാടക അവാർഡ് ജേതാവും സംവിധായകനും സിനിമാനടനുമായ ജയൻ തിരുമന, ചെയർമാൻ അഷ്റഫ് മൂവാറ്റുപുഴ, രക്ഷാധികാരി ഷാജഹാൻ കല്ലമ്പലം, വൈസ് ചെയർമാൻ ഷാരോൺ ഷരീഫ്, സെക്രട്ടറി അലക്സ് കൊട്ടാരക്കര, ട്രഷറർ കൃഷ്ണകുമാർ എന്നിവരടങ്ങിയ ജൂറിയാണ്​ പുരസ്​കാര നിർണയം നടത്തിയത്​.

ദീർഘകാലമായി റിയാദിൽ പ്രവാസിയായ നസീബ്​ കലാഭവൻ നാട്ടിലും ഗൾഫ്​ രാജ്യങ്ങളിലും നിരവധി വേദികളിൽ പരിപാടി അവതരിപ്പിച്ചുകൊണ്ടിരിക്കുന്ന അറിയപ്പെടുന്ന കലാകാരനാണ്​. കുന്നംകുളം​ മരതംകോട്​ സ്വദേശിയാണ്​. റിയാദിൽ സ്വകാര്യ കമ്പനിയിൽ അകൗണ്ടൻറാണ്​. 10,000 രൂപയും ഫലകവും അടങ്ങുന്ന പുരസ്​കാരം വ്യാഴാഴ്​ച രാത്രി 7.30 മുതൽ റിയാദ്​ എക്​സിറ്റ്​ 18 ​ലെ യാനബത്​ ഇസ്​തിറാഹയിൽ നടക്കുന്ന ചടങ്ങിൽ സമ്മാനിക്കും. റിയാദ് കലാഭവ​ൻ ഏഴാം വർഷം പൂർത്തിയാക്കിയതി​ന്റെ ഭാഗമായി ഏപ്രിലിൽ നടക്കുന്ന മെഗാ ഇവൻറി​ന്റെ മുന്നോടിയായാണ്​ പുരസ്​കാര ചടങ്ങും ക്രിസ്​മസ്​, പുതുവത്സരാഘോഷവും സംഘടിപ്പിക്കുന്ന​തെന്ന്​ ഭാരവാഹികൾ അറിയിച്ചു.