കാർഡ്​ ബോർഡ്​ ബോക്സ്​ നിശ്​ചിത വലിപ്പത്തിലാകണം; ഇല്ലെങ്കിൽ പണി കിട്ടും

മനാമ: കാർഡ്​ ബോർഡ്​ പെട്ടിയുമായി ഗൾഫ്​ എയർ വിമാനത്തിൽ നാട്ടിലേക്ക്​ പോകുന്നവർ സൂക്ഷിക്കുക. എയർലൈൻസ്​ പറഞ്ഞിട്ടുള്ള അളവിലല്ലാത്ത പെട്ടികളുമായാണ്​ പോകുന്നതെങ്കിൽ എയർപോർട്ടിൽവെച്ച്​ വേറെ കാർഡ്​ ബോർഡ്​ പെട്ടിയിലേക്ക്​ സാധനങ്ങൾ മാറ്റി പായ്ക്ക്​ ചെയ്യേണ്ടി വരും. കഴിഞ്ഞ ദിവസങ്ങളിൽ നിരവധി പേർക്ക്​ ഈ അനുഭവമുണ്ടായി.

കഴിഞ്ഞ 22 മുതലാണ്​ ബഹ്​റൈനിൽനിന്ന്​ ഇന്ത്യ, ബംഗ്ലാദേശ്​, പാകിസ്താൻ, ശ്രീലങ്ക എന്നിവിടങ്ങളിലേക്ക്​ കാർഡ്​ ബോർഡ്​ പെട്ടികൾ പരീക്ഷണാടിസ്ഥാനത്തിൽ അനുവദിച്ച്​ തുടങ്ങിയത്​. 76 സെന്‍റീമീറ്റർ നീളവും 51 സെന്‍റീമീറ്റർ വീതിയും 31 സെന്‍റീമീറ്റർ ഉയരവുമാണ്​ പെട്ടികൾക്ക്​ അനുവദിച്ചിരിക്കുന്ന അളവ്​. ഇതിൽ കൂടുതൽ വലിപ്പത്തിലുള്ള കാർഡ്​ ബോർഡ്​ പെട്ടികൾ അനുവദിക്കില്ലെന്നും ഗൾഫ്​ എയർ വ്യക്​തമാക്കിയിരുന്നു.

നിശ്​ചിത അളവിൽ കൂടുതൽ വലിപ്പമുള്ള കാർഡ്​ ബോർഡ്​ പെട്ടികളുമായി എയർപോർട്ടിൽ എത്തിയവരാണ്​ പ്രയാസത്തിലായത്​. ​വേറെ ട്രോളി ബാഗോ കാർഡ്​ ബോർഡ്​ പെട്ടിയോ ലഭ്യമാണെങ്കിൽ അതിലേക്ക്​ സാധനങ്ങൾ മാറ്റി കൊണ്ടുപോകാവുന്നതാണ്​. അല്ലാത്തവർക്കായി ബഹ്​റൈൻ എയർപോർട്ട്​ സർവീസസ്​ കാർഡ്​ ​ബോർഡ്​ പെട്ടികൾ ലഭ്യമാക്കിയിട്ടുണ്ട്​. രണ്ട്​ ദിനാറാണ്​ ഇതിന്​ വില. പെട്ടിയുടെ മുകളിൽ ക്ലിങ്​ ഷീറ്റ്​ പൊതിയുന്നതിന്​ രണ്ട്​ ദിനാർ കൂടി നൽകണം. എയർപോർട്ടിൽനിന്ന്​ ബഹ്​റൈ​െന്‍റ ലോഗോ പതിച്ച കാർഡ്​ ബോർഡ്​ പെട്ടി തന്നെ വാങ്ങണമെന്ന തരത്തിൽ സാമൂഹി മാധ്യമങ്ങളിൽ പ്രചാരണം നടക്കുന്നുണ്ട്​. എന്നാൽ, ഇത്തരത്തിലുള്ള നിബന്ധനകളൊന്നും ഏർപ്പെടുത്തിയിട്ടില്ല.

നിശ്​ചിത വലിപ്പത്തിന്​ പുറമേ കൃത്യമായ ആകൃതിയുമുള്ളതായിരിക്കണം പെട്ടികൾ. ചിലർ ഉയരമുള്ള ബോക്സ്​ മുറിച്ച്​ ചെറുതാക്കി സാധനങ്ങൾ പായ്​ക്ക്​ ചെയ്യാറുണ്ട്​. ഇങ്ങനെ പായ്ക്ക്​ ചെയ്യുമ്പോൾ കൃത്യമായ ആകൃതി ഉണ്ടാകില്ല. ഇത്തരം പെട്ടികളും നിരസിക്കപ്പെടും.

യാത്രക്കാർ എയർലൈൻസ്​ പറഞ്ഞിട്ടുള്ള നിബന്ധനകൾ കൃത്യമായി പാലിക്കണമെന്ന്​ സാമൂഹിക പ്രവർത്തകനായ ഫസലുൽ ഹഖ്​ ആവശ്യപ്പെട്ടു. എയർപോർട്ടിൽ എത്തിയശേഷമുള്ള ബുദ്ധിമുട്ടുകൾ ഒഴിവാക്കാൻ ട്രോളി ബാഗോ സ്യൂട്ട്​കേസോ കൊണ്ടുപോകുന്നതാണ്​ ഉചിതമെന്നും അദ്ദേഹം ചൂണ്ടിക്കാട്ടി. നിശ്​ചിത വലിപ്പത്തിലുള്ള പെട്ടി കിട്ടിയില്ലെങ്കിൽ യാത്ര മുടങ്ങാൻ വരെ സാധ്യതയുണ്ട്​. സ്കൂൾ അവധി, പെരുന്നാൾ എന്നിവയോടനു​ബന്ധിച്ചുള്ള തിരക്ക്​ തുടങ്ങിയതിനാൽ അടുത്ത ദിവസങ്ങളിൽ മറ്റൊരു ടിക്കറ്റ്​ കിട്ടാനും പ്രയാസമാണെന്ന്​ അദ്ദേഹം പറഞ്ഞു.