ഇതാ മും​ബൈയിലെ രജനീകാന്ത്​ ദോശ; കണ്ടത്​ ഏഴര കോടിയിലേറെ പേർ

മുംബൈ: ചടുല നീക്കങ്ങൾ കാരണമാണ്​ രജനീകാന്ത് സ്​റ്റൈൽ ലക്ഷക്കണക്കിന്​ ആരാധകർക്ക്​ പ്രിയപ്പെട്ടതായത്​. അപ്പോൾ പിന്നെ ചടുല നീക്കങ്ങളിലൂടെ ഉണ്ടാക്കുന്ന ദോശക്ക്​ മറ്റെന്ത്​ പേരിടാൻ? സമൂഹ മാധ്യമങ്ങളിൽ അടുത്തിടെ ഹിറ്റായ പറക്കും ദോശക്ക്​ പിന്നാലെ ആഹാരപ്രേമികൾ ഏറ്റെടുത്തിരിക്കുകയാണ്​ മുംബൈയിലെ രജനീകാന്ത്​ ദോശയെ.

വഴിയോര ഭക്ഷണശാലകളിലെ പാചകക്കാരുടെ സ്​റ്റൈലുകൾ എന്നും വൈറലാണ്​. ആ ഹിറ്റ്​ ചാർട്ടിൽ ഇടംപിടിച്ചിരിക്കുകയാണ്​ മുംബൈ ദാദറിലെ രജനീകാന്ത്​ ദോശയും. മുത്തു അണ്ണ ദോശ സെന്‍ററിന്‍റെ ഉടമ മുത്തുവാണ്​ രജനീകാന്ത്​ സ്​റ്റൈലിൽ ദോശ പാചകം ചെയ്യുന്നതും വിളമ്പുന്നതും. കടുത്ത രജനി ആരാധകൻ ആയ മുത്തു ദോശയ്ക്കുള്ള മാവ് പരത്തുന്നതും വെണ്ണയും പച്ചക്കറികളും മസാലയുമുള്‍പ്പെടെയുള്ളവ നിറയ്ക്കുന്നതുമൊക്കെ വളരെ വേഗത്തിലാണ്​. ചുട്ട ശേഷം ദോശ മുറിച്ചെടുത്ത് പാത്രങ്ങളിലാക്കി ദോശക്കല്ലിലൂടെ തന്നെ തെന്നിച്ച്​ സഹായിയുടെ കൈകളിലെത്തിക്കുന്നതും തനി രജനി സ്​റ്റൈലിൽ തന്നെ.

മസാല ദോശകള്‍ക്ക് പേരുകേട്ട മുത്തു അണ്ണ ദോശ സെന്‍റർ 30 വർഷം മുമ്പാണ്​ മുംബൈയിൽ ആരംഭിച്ചത്​. രജനീകാന്ത്​ സ്​റ്റൈൽ ദോശ പരിചയപ്പെടുത്തിയിരിക്കുന്നത്​ സ്ട്രീറ്റ് ഫുഡ് റെസിപീസ് എന്ന ഫേസ്ബുക് ഗ്രൂപ്പാണ്​. 'മുംബൈയ്​സ്​ ഫേയ്​മസ്​ രജനീകാന്ത്​ സ്​റ്റെൽ ദോശ' എന്ന തലക്കെട്ടിൽ ഇട്ടിരിക്കുന്ന വിഡിയോ ഇതിനകം 7.7 കോടിയി​ലേറെ പേരാണ്​ കണ്ടിരിക്കുന്നത്​.

ഭക്ഷണത്തിന്‍റെ രുചി മാത്രമല്ല അത്​ വിളമ്പുന്നതിലെ ശൈലിയും ഭക്ഷണപ്രേമികൾക്ക്​ എന്നും പ്രിയ​പ്പെട്ടതാണ്​. മുംബൈയിലെ തന്നെ 'പറക്കും ദോശ' അടുത്തിടെ വൈറലായിരുന്നു. ദക്ഷിണ മു​ംബൈയിലെ മംഗൾദാസ്​ മാർക്കറ്റിൽ മസാലദോശയുണ്ടാക്കുന്ന യുവാവ്​ വളരെ ചടുലമായി ദോശയുണ്ടാക്കുന്നതും ശേഷം അത് മൂന്ന്​ മടക്കാക്കി ചട്ടുകം കൊണ്ട്​ കുത്തി മുറിച്ച്​ രണ്ട്​ കഷണമാക്കിയ ശേഷം പിന്നിലേക്ക്​ വലിച്ചെറിയുന്നതാണ്​ വിഡിയോയിലുള്ളത്​. ഇങ്ങനെ എറിയുന്ന ദോശ പിന്നിൽ ​നിൽക്കുന്ന സഹായിയുടെ പ്ലേറ്റിൽ കൃത്യമായി വീഴുന്നുമുണ്ട്​.