ബുള്ളറ്റ്​ വേണോ; ഈ നോൺവെജ്​ താലി ഒരു മണിക്കൂറിനുള്ളിൽ കഴിച്ചുതീർത്താൽ മതി

ബുള്ളറ്റ്​ വാങ്ങാൻ കാശില്ലാതെ വിഷമിക്കുകയാണോ. എങ്കിൽ നേരെ പൂനെക്ക്​ വണ്ടി കയറിക്കോളൂ. അവിടെ ഒരു റസ്​റ്റോറന്‍റിൽ രസകരമായ ഒരു മത്സരം നടക്കുന്നുണ്ട്​. അവിടുത്തെ നാല്​ കിലോ നോൺ വെജ്​ താലി 60 മിനിറ്റിനുള്ളിൽ കഴിച്ചുതീർത്താൽ ബുള്ളറ്റാണ്​ സമ്മാനമായി ലഭിക്കുന്നത്​.

പൂനെ നഗരപ്രാന്തത്തിൽ വഡ്​ഗാവ്​ മാവൽ പ്രദേശത്തുള്ള ശിവ്​രാജ്​ ഹോട്ടലിലാണ്​ ഈ മത്സരം നടക്കുന്നത്​. 2500 രൂപ വിലയുള്ള ബുള്ളറ്റ്​ താലി ഒരു മണിക്കൂറിനുള്ളിൽ കഴിച്ചുതീർത്താൽ 1.65 ലക്ഷം രൂപ വിലവരുന്ന ബുള്ളറ്റാണ്​ സമ്മാനമായി നൽകുന്നത്​. കോവിഡിന്‍റെ പശ്​ചാത്തലത്തിൽ കച്ചവടം കുറവായ സാഹചര്യത്തിൽ ഉപഭോക്​താക്ക​ളെ ആകർഷിക്കാനാണ്​ ഈ വേറിട്ട മത്സരം ഏർപ്പെടുത്തിയതെന്ന്​ ഉടമ അതുൽ വാൾക്കർ പറയുന്നു.

ഇതിനായി അഞ്ച്​ പുതിയ റോയൽ എൻഫീൽഡ്​ ബുള്ളറ്റുകളാണ്​ അതുൽ വാങ്ങിയത്​. ഇവ ഹോട്ടലിന്​ മുന്നിൽ പ്രദർശിപ്പിച്ചിട്ടുണ്ട്​. ബുള്ളറ്റ്​ താലിയുടെ മെനുവും മത്സരത്തിന്‍റെ പ്രത്യേകതകളുമെല്ലാം ആകർഷകമായ വിധത്തിൽ ഇതോടൊപ്പം പ്രദർശിപ്പിച്ചിരിക്കുന്നു. ഇതുവരെ ഒരാൾ മാത്രമാണ്​ മത്സരത്തിൽ വിജയിച്ച്​ ബുള്ളറ്റ്​ സ്വന്തമാക്കിയത്​. മഹാരാഷ്​ട്രയിലെ സോളാപുർ ജില്ലക്കാരനായ സോമനാഥ്​ പവാർ.

മട്ടൻ, ചിക്കൻ, മീൻ എന്നിവ കൊണ്ടുള്ള നാല്​ കിലോ വിഭവങ്ങളാണ്​ ബുള്ളറ്റ്​ താലിയിലുള്ളത്​. ​ഫ്രൈഡ്​ സുർമയ്​, പോം​ഫ്രെറ്റ്​ ​ഫ്രൈഡ് ഫിഷ്​, ചിക്കൻ തന്തൂരി, ഡ്രൈ മട്ടൻ, ഗ്രേ മട്ടൻ, ചിക്കൻ മസാല, കൊഞ്ച്​ ബിരിയാണി തുടങ്ങിയ വിഭവങ്ങളാണ്​ താലിയിലുള്ളത്​. 55 പാചകക്കാർ ചേർന്നാണ്​ വിഭവങ്ങൾ തയാറാക്കുന്നത്​.

മത്സരത്തോടുള്ള ഉപഭോക്​താക്കളുടെ പ്രതികരണം മികച്ചതായിരുന്നെന്ന്​ അതുൽ പറയുന്നു. ദിവസം 65​ലേറെ താലികളാണ്​ വിറ്റുപോകുന്നത്​. കോവിഡ്​ മാനദണ്ഡങ്ങളെല്ലാം പാലിച്ചാണ്​ മത്സരം നടത്തുന്നതെന്നും അതുൽ വ്യക്​തമാക്കി. ബുള്ളറ്റ്​ താലി കൂടാതെ അഞ്ച്​ ഭീമൻ താലികൾ കൂടി ശിവ്​രാജ്​ ഹോട്ടലിൽ ലഭ്യമാണ്​. അവയുടെ പേരും വളരെ കൗതുകകരമാണ്​. സ്​പെഷൽ രാവൺ താലി, മൽവാനി ഫിഷ്​ താലി, ഫയൽവാൻ മട്ടൻ താലി, ബകാസുർ ചിക്കൻ താലി, സർക്കാർ മട്ടൻ താലി എന്നിവയാണത്​.

എട്ട്​ വർഷം മുമ്പാണ്​ അതുൽ ശിവ്​രാജ്​ ​ഹോട്ടൽ ആരംഭിക്കുന്നത്​. ഇതിന്​ മുമ്പും ഇവിടെ രസകരമായ മത്സരങ്ങൾ നടന്നിട്ടുണ്ട്. എട്ട്​ കിലോയുള്ള രാവൺ താലി നാലുപേർ ചേർന്ന്​ ഒരു മണിക്കൂറിനുള്ളിൽ കഴിച്ചു തീർക്കുകയെന്ന മത്സരമാണ്​ ഇതിന്​ മുമ്പ്​ നടന്നതിൽ പ്രധാനം. അയ്യായിരം രൂപയാണ്​ അന്ന്​ വിജയികൾക്ക്​ നൽകിയത്​. മാത്രമല്ല, താലിയുടെ വില ഈടാക്കിയിരുന്നുമില്ല. അപ്പോൾ എങ്ങിനെയാ, പൂനെക്ക്​ വണ്ടി വിടുകയല്ലേ...