ബൈഡൻ ബ്രോക്കോളിയും ട്രംപ്​ തന്തൂർ ചിക്കനും; ജി 20 ഉച്ചകോടിയിലെ വിചിത്ര മെനു വൈറലാകുന്നു

പാട്ട്​ വിവാദത്തിന്​ പിന്നാലെ ജി 20 ഉച്ചകോടിയിൽ മെനു വിവാദവും. ഉച്ചകോടിയുടെ മെനുവിന്‍റെ ചിത്രങ്ങൾ സമൂഹമാധ്യമങ്ങളിൽ വൈറലായി. വിചിത്രമായ പേരുകളുള്ള വിഭവങ്ങളുടെ പേരിലാണ്​ ഇപ്പോഴത്തെ വിവാദം. മാന്യമായൊരു ഭക്ഷണ ലിസ്റ്റ്​ പോലും ഉണ്ടാക്കാൻ കഴിയാത്തവരാണ്​ വിശ്വഗുരുവാകാൻ ഒരുങ്ങിപ്പുറപ്പെട്ടിരിക്കുന്നതെന്നാണ്​ വിമർശകർ പറയുന്നത്​.

ഭാരത്​മണ്ഡപത്തിൽ വിദേശ ഡെലിഗേറ്റുകൾക്ക്​ നൽകാനുള്ള ഭക്ഷണ മെനുവിലാണ്​ വിചിത്രമായ പേരുകൾ കടന്നുകൂടിയത്​. മെനുവിലെ ഒരു വിഭവത്തിന്​ ‘ബൈഡൻ തന്തൂരി മലായ് ബ്രോക്കോളി’​ എന്നാണ്​ പേര്​നൽകിയിരിക്കുന്നത്​. നോൺ വെജ്​ മെനുവിൽ നിന്നുള്ള ഒരു വിഭവത്തെ ‘ട്രംപ്​ ഹാഫ്​ തന്തൂർ ചിക്കൻ’ എന്നാണ്​ വിളിച്ചിരിക്കുന്നത്​. ‘വൺ എർത്​ ഹര കബാബ്, ജി-20 അജണ്ട മുർഗ് കസ്തൂരി കബാബ്, ഇക്കണോമി കസുണ്ടി മഹി ടിക്ക, തന്തൂരി ലോബ്‌സ്റ്ററിന്റെ ഹായ് സ്റ്റേക്ക് മീറ്റിങ്​ എന്നിങ്ങനെ വിഭവങ്ങളും മെനുവിലുണ്ട്​.

തൃണമൂൽ കോൺഗ്രസിൽനിന്നുള്ള രാജ്യസഭാ എം.പി സാകേത് ഗോഖലെ മെനുവിന്‍റെ ചിത്രം എക്‌സിൽ പങ്കുവച്ചിട്ടുണ്ട്​. പോസ്റ്റ് വൈറലാകുകയും സോഷ്യൽ മീഡിയയിൽ ചിരി പടർത്തുകയും ചെയ്തു. മെനു രാഷ്ട്രപതിയുടെ അത്താഴവിരുന്നിന്‍റേതല്ലെന്നും വിദേശ പ്രതിനിധികൾക്ക് ഭാരത് മണ്ഡപത്തിൽ ഭക്ഷണം കഴിക്കാനുള്ളതാണെന്നും സാകേത്​ ഗോഘലെ കുറിച്ചു.

വെള്ളിയാഴ്ച വൈകീട്ട് ഏഴുമണിക്കാണ് അമേരിക്കൻ പ്രസിഡന്‍റ്​ ബൈഡൻ ജി20 ഉച്ചകോടിയിൽ പ​ങ്കെടുക്കാൻ ഡൽഹിയിലെത്തിയത്. തുടർന്ന് പ്രധാനമന്ത്രിയുടെ താമസസ്ഥലത്തെത്തി ഡിന്നറും ഹ്രസ്വചർച്ചയും നടത്തി. മൂന്നുവർഷത്തിനു ശേഷമാണ് ജോ ബൈഡൻ ഇന്ത്യയിലെത്തുന്നത്. ആണവോർജ രംഗത്തെ സഹകരണം, 6ജി, ആർട്ടിഫിഷ്യൽ ഇന്റലിജന്‍റ്​സ്​ എന്നിവയും ചർച്ചയിൽ വന്നു.