കറിവെച്ച് കഴിക്കല്ലേ, മരണം ഉറപ്പാ!; ലോകത്തിലെ ഏറ്റവും അപകടകാരികളായ 7 വിഷക്കൂണുകൾ

ചില കൂണുകൾ കാണാൻ അതിമനോഹരവും സാധാരണ കൂണുകൾ പോലെ തോന്നിപ്പിക്കുന്നതുമാണെങ്കിലും അവ മനുഷ്യന്റെ ജീവനെവരെ അപഹരിക്കാൻ തക്കവണ്ണം മാരകമായ വിഷാംശം നിറഞ്ഞവയാണ്. ലോകത്ത് ഏകദേശം 70 മുതൽ 80 വരെ വിഷമുള്ള കൂൺ വർഗങ്ങളുണ്ടെങ്കിലും അവയിൽ വളരെ കുറച്ചുമാത്രമേ കഴിച്ചാൽ മരണം സംഭവിക്കുന്ന തരത്തിലുള്ള മാരക വിഷമുള്ളവയായിട്ടുള്ളൂ. എന്നാൽ ഇവയിൽ പലതും ഭക്ഷ്യയോഗ്യമായ കൂണുകളുമായി രൂപസാദൃശ്യമുള്ളതിനാൽ ആളുകൾ ഇവ മാറി കഴിച്ച് അപകടത്തിൽപ്പെടാറുണ്ട്. അത്തരത്തിലുള്ള ലോകത്തിലെ ഏറ്റവും വിഷാംശമുള്ള കൂൺ ഇനങ്ങളെക്കുറിച്ച് വിശദമായി അറിയാം.

1. ഡെത്ത് ക്യാപ് കൂൺ

കൂണുകളിൽവെച്ച് ഏറ്റവും അപകടകാരിയായി കണക്കാക്കപ്പെടുന്ന ഒന്നാണ് ഡെത്ത് ക്യാപ്. യൂറോപ്പിലുടനീളം കണ്ടുവരുന്ന ഈ കൂണുകൾ നമ്മൾ സാധാരണയായി കഴിക്കുന്ന വൈക്കോൽ കൂണുകളുമായും സീസേഴ്സ് കൂണുകളുമായും വളരെ സാദൃശ്യമുള്ളവയാണ്. ഇവയുടെ പ്രത്യേകത എന്തെന്നാൽ ഇതിലെ ചൂടേറ്റാലും നശിക്കാത്ത അമടോക്സിൻ എന്ന വിഷാംശം പാചകം ചെയ്താലും ഇല്ലാതാവില്ല എന്നതാണ്. ഇത് ശരീരത്തിലെ കോശങ്ങളെ വളരെ പെട്ടെന്ന് നശിപ്പിക്കുന്നു. കൂൺ കഴിച്ച് 6 മുതൽ 12 മണിക്കൂറിനുള്ളിൽ കടുത്ത ഉദരവേദന, ഛർദ്ദി, രക്തം കലർന്ന അതിസാരം എന്നിവ അനുഭവപ്പെടുകയും, ശരീരത്തിൽ നിന്ന് പെട്ടെന്ന് ജലാംശം നഷ്ടപ്പെട്ട് കടുത്ത ദാഹം അനുഭവപ്പെടുകയും ചെയ്യും. പിന്നീട് കരളും വൃക്കകളും കേന്ദ്ര നാഡീവ്യൂഹവും ഗുരുതരമായി തകരാറിലാകുന്നു. ഇത് കോമ അവസ്ഥയിലേക്കും 50 ശതമാനത്തിലധികം ആളുകളിൽ മരണത്തിലേക്കും നയിക്കാറുണ്ട്.

2. കൊനോസൈബ് ഫിലാരിസ്

അമേരിക്കയുടെ പസഫിക് നോർത്ത് വെസ്റ്റ് പ്രദേശങ്ങളിൽ പുൽത്തകിടികളിൽ സാധാരണയായി കണ്ടുവരുന്ന ഈ ചെറിയ കൂൺ കാണാൻ വളരെ നിരുപദ്രവകാരിയായി തോന്നുമെങ്കിലും ജീവനെടുക്കാൻ തക്ക ശക്തിയുള്ള ഒന്നാണ്. ഡെത്ത് ക്യാപ് കൂണുകളിലുള്ള അതേ മാരക വിഷാംശങ്ങൾ തന്നെയാണ് ഇവയിലുമുള്ളത്. ഇത് കഴിച്ചാൽ 6 മുതൽ 24 മണിക്കൂറിനുള്ളിൽ ദഹനവ്യവസ്ഥയെ ബാധിക്കുന്ന ലക്ഷണങ്ങൾ കണ്ടുതുടങ്ങും.

3. വെബ്കാപ് കൂണുകൾ

കോർട്ടിനാരിയസ് റുബെല്ലസ്, ഫൂൽസ് വെബ്കാപ് എന്നീ രണ്ട് പ്രധാന ഇനങ്ങളാണ് ഈ വിഭാഗത്തിലുള്ളത്. പരസ്പരവും മറ്റ് ഭക്ഷ്യയോഗ്യമായ കൂണുകളുമായും ഇവക്ക് വലിയ സാദൃശ്യമുണ്ട്. ഒറെല്ലാനിൻ എന്ന വിഷവസ്തുവാണ് ഇവയിൽ അടങ്ങിയിരിക്കുന്നത്. സാധാരണ പനിക്ക് സമാനമായ ലക്ഷണങ്ങളാണ് തുടക്കത്തിൽ കാണിക്കുക. എന്നാൽ ഇതിന്റെ പ്രത്യേകത ഈ വിഷത്തിന്റെ ലക്ഷണങ്ങൾ പുറത്തുകാണാൻ 2 ദിവസം മുതൽ 3 ആഴ്ച വരെ സമയമെടുക്കും എന്നതാണ്. അതുകൊണ്ടുതന്നെ തുടക്കത്തിൽ രോഗം തിരിച്ചറിയാൻ പ്രയാസമാണ്. കൃത്യമായ ചികിത്സ ലഭിച്ചില്ലെങ്കിൽ ഇത് വൃക്കകളുടെ പ്രവർത്തനം പൂർണമായി നിലക്കാനും മരണത്തിനും കാരണമാകുന്നു.

4. ഓട്ടം സ്കൽകാപ്

ഉത്തരാർദ്ധഗോളത്തിലും ഓസ്ട്രേലിയയുടെ ചില ഭാഗങ്ങളിലും വ്യാപകമായി കാണപ്പെടുന്ന ഈ കൂൺ മരങ്ങൾ ചീയുമ്പോഴാണ് വളരുന്നത്. ഡെത്ത് ക്യാപ് കൂണുകളിലുള്ള അതേ അമടോക്സിൻ വിഷാംശം ഇതിലുമുണ്ട്. ഇത് കഴിച്ചാൽ അതിസാരം, ഛർദ്ദി, ശരീരത്തിന്റെ താപനില പെട്ടെന്ന് കുറയുക, കരളുകൾ തകരാറിലാകുക തുടങ്ങിയ പ്രശ്നങ്ങൾ ഉണ്ടാകുന്നു. കൃത്യസമയത്ത് ചികിത്സിച്ചില്ലെങ്കിൽ മരണം സംഭവിക്കാം.

5. ഡിസ്ട്രോയിങ് ഏഞ്ചൽസ്

അമനിത ജനുസ്സിൽ പെട്ട, പൂർണ്ണമായും വെളുത്ത നിറത്തിലുള്ള ചില കൂൺ ഇനങ്ങളാണ് ഇവ. പേരിലെ ഭീകരത പോലെത്തന്നെ അതീവ വിഷാംശമുള്ള ഫംഗസുകളാണിവ. നമ്മൾ സാധാരണയായി വിപണിയിൽ കാണുന്ന ബട്ടൺ കൂണുകളുമായും മേൽഡോൺ കൂണുകളുമായും ഇവക്ക് വലിയ രൂപസാദൃശ്യമുണ്ട്. അതിനാൽ അറിയാതെ ഇവ പറിച്ചുപയോഗിച്ച് പലപ്പോഴും അപകടങ്ങൾ ഉണ്ടാകാറുണ്ട്.

6. പോഡോസ്ട്രോമ കോർണു-ഡമായെ

സാങ്കേതികമായി ഇതൊരു കൂൺ അല്ലെങ്കിലും, ഏഷ്യൻ രാജ്യങ്ങളിൽ, പ്രത്യേകിച്ച് ജപ്പാനിലും കൊറിയയിലും നിരവധി ആളുകളുടെ മരണത്തിന് കാരണമായിട്ടുള്ള അപൂർവ്വമായ ഒരു വിഷ ഫംഗസാണിത്. ഇതിന്റെ ചുവന്ന നിറത്തിലുള്ള ശരീരത്തിൽ ട്രൈക്കോതെസീൻ മൈക്കോടോക്സിൻസ് എന്ന അതീവ ശക്തിയേറിയ വിഷങ്ങൾ അടങ്ങിയിരിക്കുന്നു. ഇത് ശരീരത്തിലെ ഒരേസമയം ഒന്നിലധികം ആന്തരികാവയവങ്ങളുടെ പ്രവർത്തനങ്ങളെ തകരാറിലാക്കും.

7. ഡെഡ്‌ലി ഡാപ്‌ലിങ്

അമടോക്സിൻ വിഷാംശം അടങ്ങിയിരിക്കുന്ന മറ്റൊരു കൂൺ വർഗമാണിത്. യൂറോപ്പിലും ഏഷ്യയുടെ ചില ഭാഗങ്ങളിലും വ്യാപകമായി കാണപ്പെടുന്ന ഈ കൂണുകൾ കാണാൻ വളരെ നിരുപദ്രവകാരികളാണെന്ന് തോന്നും. എന്നാൽ ഭക്ഷ്യയോഗ്യമായ മറ്റ് കൂണുകളാണെന്ന് തെറ്റിദ്ധരിച്ച് ഇവ പലപ്പോഴും ആളുകൾ കഴിക്കാറുണ്ട്. കഴിച്ചാൽ ഗുരുതരമായ കരൾ തകരാറുകൾക്കും ഉടനടി ചികിത്സ ലഭിച്ചില്ലെങ്കിൽ മരണത്തിനും ഇത് കാരണമാകും.