ഇ​താ, ബ​സു​മ​തി ചോ​റി​ന്‍റെ ഗ്രാ​മം

പ​ര​പ്പ​ന​ങ്ങാ​ടി: ഒ​രു ന​ഗ​ര​സ​ഭ​ക്ക​ക​ത്ത് അ​മ്പ​തി​ലേ​റെ കാ​റ്റ​റി​ങ് സ​ർ​വി​സു​ക​ൾ, അ​റു​നൂ​റി​ല​ധി​കം പാ​ച​ക വി​ദ​ഗ്ധ​ർ. പ​ര​പ്പ​ന​ങ്ങാ​ടി​യു​ടെ രു​ചി​വൈ​വി​ധ്യം തീ​ര​ക്കാ​റ്റി​ൽ പ​ര​ന്നൊ​ഴു​കു​ക​യാ​ണ്. ഫ്രെ​യ്ഡ് റെ​യ്സ്, ക​ബ്സ, കു​ഴി​മ​ന്തി, മ​ജ്മൂ​സ്, സെ​ഷ​ൽ അ​റേ​ബ്യ​ൻ, ഹൈ​ദ​രാ​ബാ​ദി ബി​രി​യാ​ണി തു​ട​ങ്ങി​യ വി​ഭ​വ​ങ്ങ​ളി​ൽ നീ​ള​മേ​റി​യ ബ​സു​മ​തി അ​രി വെ​ന്തു​മ​റി​യു​ക​യാ​ണ്. പ​ര​ദേ​ശ​ത്ത് നി​ന്നെ​ത്തി​യ ഈ ​വി​ഭ​വ​ങ്ങ​ളി​ലെ തു​ട​ക്ക​ക്കാ​ര​നാ​ണ് ഫ്രെ​യ്ഡ് റെ​യ്സ്. ഇ​ന്ത്യ ഗേ​റ്റ്, പോ​സ്റ്റ്മാ​ൻ തു​ട​ങ്ങി ബ്രാ​ൻ​ഡു​ക​ളി​ലെ ഫ്രെ​യ്ഡ് റെ​യ്സ് അ​രി​യു​ടെ ഏ​റ്റ​വും വ​ലി​യ വി​പ​ണി​ക​ളി​ലൊ​ന്നാ​ണ് പ​ര​പ്പ​ന​ങ്ങാ​ടി.

വി​ഭ​വ സൗ​ന്ദ​ര്യം കൊ​ണ്ട് തി​ള​ച്ചു​മ​റി​യു​ന്ന പ​രി​പാ​ടി​ക​ളി​ൽ നീ​ള​മേ​റി​യ ബ​സു​മ​തി അ​രി​ക​ൾ ചി​ക്ക​നും മ​ട്ട​നും കു​ട്ട​നും ചേ​ർ​ന്ന് വി​വി​ധ നാ​മ​ങ്ങ​ളി​ൽ നി​റ​ഭേ​ദ​ങ്ങ​ളേ​റ്റു​വാ​ങ്ങി നി​റ​ഞ്ഞൊ​ഴു​കു​ന്ന തീ​ൻ മേ​ശ​ക​ളു​ടെ കാ​ഴ്ച വി​ശ​ക്കു​ന്ന വ​യ​റി​നെ മാ​ത്ര​മ​ല്ല, കൊ​തി​ക്കു​ന്ന മ​ന​സ്സി​നെ​യും നി​റ​ക്കു​ന്ന​താ​ണ്.

അ​ന്ത​രി​ച്ച പാ​ച​ക വി​ദ​ഗ്ധ​ൻ ഉ​സ്താ​ദ് എ​ന്ന പേ​രി​ൽ അ​റി​യ​പ്പെ​ടു​ന്ന വെ​ട്ടി​യാ​ട്ടി​ൽ ഹം​സ​ക്ക​യു​ടെ കൈ​പു​ണ്യം പ​ര​പ്പ​ന​ങ്ങാ​ടി​യി​ലെ നൂ​റു​ക​ണ​ക്കി​ന് മ​നു​ഷ്യ​രെ​യാ​ണ് പാ​ച​ക വി​ദ​ഗ്ധ​രാ​ക്കി മാ​റ്റി​യ​ത്. ഉ​സ്താ​ദി​ന്റെ പൈ​തൃ​ക​വു​മാ​യി മ​ക​ൻ വെ​ട്ടി​യാ​ട്ടി​ൽ മു​നീ​റും ശി​ഷ്യ പ​ര​മ്പ​ര​യി​ലെ ഓ​റ​ഞ്ച് ഇ​ബ്രാ​ഹീം കു​ട്ടി​യും അ​ത്യാ​ധു​നി​ക ഇ​വ​ന്റു​ക​ളു​മാ​യി ര​ണ്ടു​വ​ഴി തി​രി​ഞ്ഞ​തോ​ടെ രു​ചി​യു​ടെ വാ​ശി​യും വീ​റും പു​ക​ഞ്ഞ് അ​മ്പ​തി​ലേ​റെ സ്ഥാ​പ​ന​ങ്ങ​ൾ പ​ര​പ്പ​ന​ങ്ങാ​ടി​യി​ൽ മു​ള​പൊ​ട്ടി.

മ​ത്സ്യ​ബ​ന്ധ​നം ക​ഴി​ഞ്ഞാ​ൽ പ​ര​പ്പ​ന​ങ്ങാ​ടി​യി​ലെ ഏ​റ്റ​വും വ​ലു​തും വ​രു​മാ​ന​മേ​റി​യ​തു​മാ​യ തൊ​ഴി​ൽ​രം​ഗം പാ​ച​ക​മാ​ണ്. പ​ഴ​യ ത​ല​മു​റ​യി​ലെ ക​രി​ങ്ക​ല്ല​ത്താ​ണി സ്വ​ദേ​ശി പ​ള്ളി​പ്പു​റ​ത്ത് അ​ബൂ​ബ​ക്ക​ർ, അ​ഞ്ച​പ്പു​ര​യി​ൽ മു​ഹ​മ്മ​ദ്കു​ട്ടി, ചു​ക്കാ​ൻ ഇ​ബ്രാ​ഹീം എ​ന്നി​വ​രാ​ണ് പാ​ച​ക രം​ഗ​ത്തെ മു​തി​ർ​ന്ന​വ​രെ​ങ്കി​ലും ആ​രോ​ഗ്യ​ക​ര​മാ​യ കാ​ര​ണ​ങ്ങ​ളാ​ൽ ഇ​വ​ർ ഇ​പ്പോ​ൾ സ​ജീ​വ​മ​ല്ല.