ബിഗ് ബിയുടെ ഇഷ്ടവിഭവം നോർത്ത് ഇന്ത്യൻ മാത്രമല്ല...‍?

ഇന്ത്യൻ സിനിമയിലെ ഇതിഹാസതാരം അമിതാബ് ബച്ചനും ഇഷ്ടവിഭവമുണ്ട്. മധുരപ്രിയനായ ബിഗ് ബിക്ക് സാധാരണ നോർത്ത് ഇന്ത്യൻ ഭക്ഷണമാണ് പ്രിയം. പാർട്ടികളിൽ അദ്ദേഹം പാസ്ത സൂപ്പ്, സാലഡ് ഇവയാണ് കൂടുതലും കഴിക്കുന്നത്. സൂപ്പിൽ ഇഷ്​ടം ക്രീം ഓഫ്‌ കോൺ സൂപ്പ് വിത്ത്​ മഷ്റൂം ആണ്. ബച്ചന്‍റെ ഇഷ്​ട സൂപ്പ് തയാറാക്കുന്ന വിധം.

സൂപ്പിന്‍റെ ചേരുവകൾ:

• അമേരിക്കൻ സ്വീറ്റ് കോൺ - 2 കപ്പ്​
• പാൽ - 1 1/2 കപ്പ്​
• വെള്ളം - 1 1/2 കപ്പ്​
• വെളുത്തുള്ളി ചെറുതായി മുറിച്ചത് - 1 ടീസ്പൂൺ
• ചെറുതായി മുറിച്ച ഉള്ളി (Spring onion) -2 ടേബിൾ സ്പൂൺ
• ചെറുതായി മുറിച്ച കാരറ്റ് - 4 ടേബിൾ സ്​പൂൺ
• ചെറുതായി മുറിച്ച ബീൻസ് - 2 ടേബിൾ സ്പൂൺ
• ചെറുതായി മുറിച്ച സെലറി - 1 ടേബിൾ സ്പൂൺ
• ചെറുതായി മുറിച്ച മഷ്റൂം - 4 ടേബിൾ സ്പൂൺ
• ചെറുതായി മുറിച്ച കാപ്സിക്കം -2 ടേബിൾ സ്പൂൺ
• ബട്ടർ -1 ടേബിൾ സ്പൂൺ
• ഉപ്പ് -ആവശ്യത്തിന്​
• ഗാർണിഷിന് ചെറുതായി മുറിച്ച സെലറി അല്ലെങ്കിൽ സ്പ്രിങ് ഒനിയൻ ഗ്രീൻസ്.

തയാറാക്കുന്ന വിധം:

കോൺ വേവിച്ചെടുക്കുക. തണുത്ത ശേഷം പാലൊഴിച്ചു ബ്ലെൻഡറിൽ അരച്ചെടുക്കുക. പാൻ ചൂടാവുമ്പോൾ ബട്ടർ ചേർക്കുക. ഇതിലേക്ക് വെളുത്തുള്ളി ഇട്ടു വഴറ്റുക.

ചെറുതായി മുറിച്ചു വെച്ച എല്ലാ പച്ചക്കറികളും ചേർക്കുക. ഇത് ഏഴ്​ മുതൽ എട്ട്​ മിനിറ്റ്​ വരെ ചെറിയ തീയിൽ വഴറ്റുക. ഇതിലേക്ക് മുറിച്ചുവെച്ച സെലറി ചേർക്കുക. അതിലേക്ക് അരച്ചു ​െവച്ചിരിക്കുന്ന കോൺ ചേർക്കുക.

ഒമ്പത്​ മിനിറ്റോളം വേവിച്ച ശേഷം 1/2 കപ്പ് പാലും 1 1/2 കപ്പ് വെള്ളവും ചേർത്ത് ഉപ്പിട്ട് ചൂടാവുമ്പോൾ ഇറക്കി കുരുമുളക് ചതച്ചു ചേർക്കുക. ഒരു ബൗളിലേക്ക് മാറ്റി ഗാർനിഷ് ചെയ്യുക. കുറച്ചു ഫ്രഷ് ക്രീം ചേർത്താൽ സൂപ്പ് റെഡി.