രാജകീയ അതിഥി മന്ദിരത്തിലെ പാചകക്കാരൻ ജോജി മടങ്ങുന്നു

റിയാദ്​: ലോക രാഷ്​ട്രനേതാക്കളെയെല്ലാം വിരുന്നൂട്ടുന്ന റിയാദിലെ രാജകീയ അതിഥിമന്ദിരത്തിൽ വച്ചുവിളമ്പാൻ ഇനി ജോജി ഇല്ല. മൂന്ന്​ പതിറ്റാണ്ട്​ പാകമായ പ്രവാസം വിളമ്പി തീർത്ത് ജോജി ജോഷ്വ എന്ന ആലുവക്കാരൻ പാചകപ്പുരയിൽനിന്ന്​ പടിയിറങ്ങുകയാണ്​. ​

വിദേശ രാഷ്​ട്രത്തലവന്മാരും ഭരണകർത്താക്കളുമുൾപ്പടെ വിശിഷ്​ടരും പ്രമുഖരുമായ അതിഥികളെ റോയൽ പ്രോ​ട്ടോക്കോളോടെ താമസിപ്പിക്കാൻ സൗദി ഗവൺമെൻറിന്‍റെ ഉടമസ്ഥതയിലുള്ള റിയാദ്​ കോൺഫറൻസ്​ പാലസിലെ ഈ എക്​സിക്യുട്ടീവ്​ ഷെഫ്​ മുൻ അമേരിക്കൻ പ്രസിഡൻറ്​ ഡൊണാൾ ട്രമ്പിനെയും​ ഇന്ത്യൻ പ്രധാനമന്ത്രി നരേന്ദ്ര മോദിയെയും രണ്ടുതവണ ഉൾപ്പടെ ഒട്ടനവധി ലോ​കനേതാക്കളെ അവരുടെ അഭി'രുചി'ക്കനുസരിച്ച്​ വിരുന്നൂട്ടാൻ കഴിഞ്ഞ ഗംഭീരമായ ഓർമകളും ചാരിതാർഥ്യവുമായാണ്​ ജന്മനാട്ടിലേക്ക്​ മടങ്ങുന്നത്​.

1992-ലാണ്​ ജോജി ജോഷ്വ റിയാദിലെത്തി കോൺഫറൻസ്​ പാലസിൽ ഷെഫാകുന്നത്​. മസ്​ക്കത്തിലെ അൽബുസ്​താൻ പാലസിലും ബഹ്​റൈൻ ഇൻറർകോണ്ടിനെൻറൽ ഹോട്ടലിലും നാലുവർഷം വീതം 'സെർവ്​' ചെയ്​ത പരിയവുമായാണ്​ 30 വർഷം മുമ്പ്​ റിയാദിലെത്തുന്നത്​. മസ്​ക്കത്തിലും ഗവൺമെൻറ്​ അതിഥിമന്ദിരമായതിനാൽ നിരവധി ലോക പ്രശസ്​തരായ രാഷ്​ട്രത്തലവന്മാർക്കും നേതാക്കൾക്കും വമ്പുവിളമ്പാനും അവരുമായി അടുത്തിടപഴകാനും അവസരം ലഭിച്ചിരുന്നു. റിയാദിലെത്തിയപ്പോഴും ലഭിച്ചത്​ അതേ അഭിമാനകരമായ അവസരം. രാജകീയ അതിഥികളുടെയെല്ലാം ഭക്ഷണകാര്യങ്ങളുടെ ചുമതല ജോജിക്കായിരുന്നു.

അമേരിക്കൻ പ്രസിഡൻറുമാരായിരുന്ന ജോർജ്​ ബുഷ്​, അദ്ദേഹത്തിന്‍റെ പിതാവ്​ ബുഷ്​, ഡൊണാൾഡ്​ ട്രമ്പ്​, മുൻ പാക്​ പ്രസിഡൻറ്​ സിയാവുൽ ഹഖ്, ഇന്ത്യയുടെ മുൻ പ്രധാനമന്ത്രി ഡോ. മൻമോഹൻസിങ്​, മുൻ പ്രതിരോധമന്ത്രി എ.കെ. ആൻറണി, ധനമന്ത്രിയായിരിക്കെ സൗദിയിലെത്തിയ മുൻ രാഷ്​ട്രപതി പ്രണബ്​ കുമാർ മുഖർജി, ഇന്ത്യൻ പ്രധാനമന്ത്രി നരേന്ദ്രമോദി​​ തുടങ്ങി ലോകത്തെ വമ്പൻ നേതാക്കൾക്കെല്ലാം അവർക്കിഷ്​ട​പ്പെട്ട ഭക്ഷണങ്ങൾ വച്ചുവിളമ്പാനായി. വിഭവസമൃദ്ധവും ചാരിതാർഥ്യവുമായ പ്രവാസം.

മുപ്പതാണ്ടൊക്കെ വലിയ കാലയളവാണെന്നും ഇനി വയ്യ എന്ന്​ തോന്നി സ്വന്തം ഇഷ്​ടപ്രകാരമാണ്​ പ്രവാസം അവസാനിപ്പിക്കാൻ തീരുമാനിച്ചതെന്നും ജോജി ജോഷ്വ 'ഗൾഫ്​ മാധ്യമ'ത്തോട്​ പറഞ്ഞു. ആദ്യകാലം മുതൽ തന്നെ സഹധർമിണി ലിസ ജോജി റിയാദിൽ ഒപ്പമുണ്ട്​. ഏറെ ഫോളോവർമാരുള്ള ഫുഡ്​ വ്ലോഗറും അറിയപ്പെടുന്ന പാചകവിദഗ്​ധയുമാണ് അവർ. സൗദിയിലും കേരളത്തിലും നടന്ന നിരവധി പാചകമത്സരങ്ങളിൽ വിജയിയായിട്ടുണ്ട്​. കഴിഞ്ഞ മാസം റിയാദിൽ നടന്ന സൗദി ഭക്ഷ്യമേളയിൽ കേരളീയ വിഭവങ്ങളുമായി പാചക മത്സരത്തിൽ പ​ങ്കെടുത്തിരുന്നു.

മക്കളും ദമ്പതിമാരുടെ പാത പിന്തുടർന്ന്​ പാചകരംഗവും ഹോട്ടലുമൊക്കെയായി ബന്ധപ്പെട്ട മേഖലയിലാണ്​ ജോലി ചെയ്യുന്നത്​. മകൻ ദീപക്​ കാറ്ററിങ്ങിൽ ഉന്നത വിദ്യാഭ്യാസം നേടിയ ശേഷം കൊച്ചിയിലെ ഹോളിഡേ ഇൻ ഹോട്ടലിൽ റവന്യൂ മാനേജർ ആയി സേവനം അനുഷ്​ഠിക്കുന്നു. മകൾ ചെന്നൈ ഗ്രാൻഡ്​ ചോളൈ ഹോട്ടലിൽ പേസ്​ട്രി ഷെഫ്​ ആണ്​. മരുമകൻ സന്ദീപ്​ കപൂറും ഇതേ ഹോട്ടലിൽ ആണ് ജോലി ചെയ്യുന്നത്​​. മരുമകൾ ബബിത, തൃശൂരിലെ ഇൻറർനാഷനൽ ജർമോളജി ഇൻസ്​റ്റിറ്റ്യൂട്ടിൽ ഉദ്യോഗസ്​ഥയാണ്​. ജോജി ജോഷ്വയും ലിസ ജോജിയും വ്യാഴാഴ്​ച രാവിലെ 10-ഓടെ സൗദി എയർലൈൻസ്​ വിമാനത്തിൽ നാട്ടിലേക്ക്​ തിരിക്കും.