കാലാവസ്​ഥ വ്യതിയാനം; 30 വർഷം കൊണ്ട്​ 20 കോടിയാളുകൾ കുടിയേറ്റക്കാരാകുമെന്ന്​ ​റി​പ്പോർട്ട്​

വാഷിങ്​ടൺ ഡി.സി: കാലാവസ്​ഥ വ്യതിയാനം കാരണം അടുത്ത മൂന്ന്​ പതിറ്റാണ്ടിനുള്ളിൽ 20 കോടിയിലധികം ആളുകൾ സ്വന്തം നാടും വീടും വിട്ട്​ പലായനം ചെയ്യേണ്ടി വരുമെന്ന്​ ലോക ബാങ്ക്​ റിപ്പോർട്ട്​. വ്യാവസായിക വിഷവാതകങ്ങളുടെ പുറന്തള്ളൽ കുറക്കുകയും വികസന വിടവ്​ നികത്തുകയും ചെയ്​തില്ലെങ്കിൽ ഇത്​ സംഭവിക്കുമെന്നാണ്​ റിപ്പോർട്ട്​ മുന്നറിയിപ്പ്​ നൽകുന്നത്​.

തിങ്കളാഴ്ച പ്രസിദ്ധീകരിച്ച ഗ്രൗണ്ട്​ ലെവൽ റിപ്പോർട്ടിന്‍റെ രണ്ടാം ഭാഗം മന്ദഗതിയിലുള്ള കാലാവസ്ഥാ വ്യതിയാനത്തിന്‍റെ പ്രത്യാഘാതങ്ങളായ ജലദൗർലഭ്യം, വിളയുടെ ഉൽപാദനക്ഷമത കുറയുക, സമുദ്രനിരപ്പ് ഉയരുക എന്നിവ 2050ഓടെ 'കാലാവസ്ഥ കുടിയേറ്റക്കാർ' എന്ന വിഭാഗത്തെ സൃഷ്​ടിക്കുമെന്നാണ്​ പറയുന്നത്​. വടക്കേ ആഫ്രിക്ക, ഉപ സഹാറൻ ആഫ്രിക്ക, കിഴക്കൻ യൂറോപ്പ്​, മധ്യേഷ്യ, ദക്ഷിണേഷ്യ, കിഴക്കൻ ഏഷ്യ, പസിഫിക്ക്​ എന്നീ മേഖലകളാണ്​​ പഠന വിധേയമാക്കിയത്​.

ഏറ്റവും താഴ്ന്ന തോതിലുള്ള മലിനീകരണവും സുസ്ഥിര വികസനവും കാലാവസ്​ഥക്ക്​ അനുയോജ്യമായ സാഹചര്യത്തിലും ലോകത്ത്​ 44 ദശലക്ഷം ആളുകൾ വീട് വിടാൻ നിർബന്ധിതരാകുന്നതായി കാണാം.

രാജ്യത്തിനകത്ത് കുടിയേറ്റം സൃഷ്ടിക്കുന്നതിനുള്ള കാലാവസ്ഥയുടെ ശക്തി വീണ്ടും സ്ഥിരീകരിക്കുകയാണെന്ന്​ റിപ്പോർട്ട്​ ഉദ്ധരിച്ച്​ ലോക ബാങ്കിലെ സീനിയർ കാലാവസ്​ഥ വ്യതിയാന വിദഗ്​ധനായ വെയ്​ ചെൻ ക്ലെമന്‍റ്​ പറഞ്ഞു.

ഉപ സഹാറൻ ആഫ്രിക്കയെയാണ്​ കാലാവസ്​ഥ വ്യതിയാനം ഏറ്റവും ഗുരുതരമായി ബാധിക്കുക. മരുവൽക്കരണം, ദുർബലമായ തീരപ്രദേശങ്ങൾ, കൃഷിയെ ആശ്രയിക്കുന്ന ജനസംഖ്യ എന്നിവ കാരണം 86 ദശലക്ഷം പേർ രാജ്യാതിർത്തിക്കുള്ളിൽ തന്നെ കുടിയേറ്റക്കാരായി മാറും.

കാലാവസ്ഥാ കുടിയേറ്റക്കാരുടെ ഏറ്റവും വലിയ അനുപാതം വടക്കേ ആഫ്രിക്കയിലാകുമെന്ന് റിപ്പോർട്ട്​ പ്രവചിക്കുന്നു. വടക്കു കിഴക്കൻ തുണീഷ്യ, വടക്കുപടിഞ്ഞാറൻ അൾജീരിയ, പടിഞ്ഞാറൻ-തെക്കൻ മൊറോക്കോ എന്നിവിടങ്ങളിൽ ജലക്ഷാമം വർധിച്ചതിനാൽ 19 ദശലക്ഷം (ജനസംഖ്യയുടെ 9% ) ആളുകൾ പലായനം ചെയ്യപ്പെടേണ്ടി വരും.

ദക്ഷിണേഷ്യയിൽ ബംഗ്ലാദേശിലാണ്​ ഏറ്റവും മോശം സാഹചര്യം വരാൻ പോകുന്നത്​. വെള്ളപ്പൊക്കവും വിളനാശവുമാണ്​ അവരെ രൂക്ഷമായി ബാധിക്കുക. സ്​ത്രീകൾ ഉൾപ്പെടെ 19.9 ദശലക്ഷം ആളുകൾ മൂന്ന്​ പതിറ്റാണ്ടിനുള്ളിൽ സ്വന്തം നാടും വീടും വിട്ട്​ മറ്റ്​ സ്​ഥലങ്ങളിലേക്ക്​ നീങ്ങേണ്ടി വരും.

'ഇതാണ് ഇപ്പോൾ ഞങ്ങളുടെ മാനുഷിക യാഥാർഥ്യം, ഇത് കൂടുതൽ മോശമാകുമെന്ന് ഞങ്ങൾ ആശങ്കപ്പെടുന്നു'- ഇന്‍റർനാഷനൽ റെഡ്​ക്രോസ്​ റെഡ്​ക്രസന്‍റ്​ ക്ലൈമറ്റ്​ സെന്‍റർ ഡയരക്​ടറായ പ്രഫ. മാർടിൻ വാൻ ആൽസ്​ പറഞ്ഞു.

അടുത്ത പതിറ്റാണ്ടിൽ 'മൈഗ്രേഷൻ ഹോട്ട് സ്പോട്ടുകൾ' രൂപപ്പെടുകയും 2050 ഓടെ അവ കൂടുകയും ചെയ്യുമെന്നും റിപ്പോർട്ട് മുന്നറിയിപ്പ് നൽകുന്നു. ആളുകൾ കുടിയേറുന്ന സ്ഥലങ്ങളിലും അവർ ഉപേക്ഷിച്ച്​ പോകുന്ന സ്​ഥലങ്ങളിൽ അവശേഷിക്കുന്നവരെ സഹായിക്കാനും ആസൂത്രണം ആവശ്യമാണെന്നും റിപ്പോർട്ട്​ നിർദേശിക്കുന്നു.