യേശുദാസ്​ വി.എം. കുട്ടിയോട്​ പറഞ്ഞു- 'മാഷേ, അവനെ മെരുക്കിയിട്ടാ ഞാൻ ഉറങ്ങിയത്​'

'പ്രണാമം'-വി.എം. കുട്ടിയുടെ മരണമറിഞ്ഞ്​ ഫേസ്​ബുക്കിൽ ഈ ത്രയാക്ഷരം കൊണ്ട്​ ആദരാഞ്​ജലി അർപ്പിക്കു​േമ്പാൾ ഗാനഗന്ധർവൻ യേശുദാസിന്‍റെ മനസ്സിൽ ഉറപ്പായും ഓർമയുടെ ഇശൽ മഴ പെയ്​തിട്ടുണ്ടാകും. തന്‍റെ സംഗീതവഴിയിൽ മാപ്പിളപ്പാട്ടിന്‍റെ മൈലാഞ്ചിമൊഞ്ച്​ സമ്മാനിച്ച പ്രിയപ്പെട്ട മാഷിന്‍റെ ഓർമകൾ. കാലമേറെ കഴിഞ്ഞിട്ടും മലയാളികളെ ഇന്നും ഇളക്കി മറിക്കുന്ന 'സംകൃതപമഗരി' അടക്കമുള്ള ഗാനങ്ങൾ ദാസിനെ പഠിപ്പിച്ചത്​ വി.എം. കുട്ടിയാണ്​. ​1983ൽ ദാസിന്‍റെ തരംഗിണി പുറത്തിറക്കിയ 'മൈലാഞ്ചി പാട്ടുകൾ വോള്യം–ഒന്നി'ൽ ആയിരുന്നു ഇതടക്കമുള്ള ഹിറ്റ്​ ഗാനങ്ങൾ ഉണ്ടായിരുന്നത്​. വരികളുടെ മനോഹാരിതയും സംഗീതത്തിന്‍റെ ചടുലതയും കൊണ്ട്​ വി.എം. കുട്ടി സംഗീതം പകർന്ന 'മൈലാഞ്ചി പാട്ടുകൾ' കേരളത്തിലും ഗൾഫിലും അക്കാലത്ത്​ വമ്പൻ ഹിറ്റായി.

മാപ്പിളപ്പാട്ട്​ കാസറ്റ്​ ഇറക്കണമെന്ന്​ തോന്നിയപ്പോൾ ദാസിന്‍റെ മനസിലേക്ക്​ ആദ്യമോടിയെത്തിയത്​ വി.എം. കുട്ടിയുടെ പേരാണ്​. ഈ ആവശ്യം കുട്ടിയെ അറിയിക്കാൻ സുഹൃത്തായ ഇമ്പിച്ചിക്കോയ തങ്ങളെയാണ്​ ദാസ്​ നിയോഗിച്ചത്​. മാപ്പിളപ്പാട്ട് ശാഖയെ കുറിച്ചും അറബി സാഹിത്യത്തെ കുറിച്ചും സാധ്യമാകുന്ന ഗവേഷണങ്ങളൊക്കെ നടത്തി തെരഞ്ഞെടുത്ത 12 ഗാനങ്ങളുമായി കുട്ടി തിരുവനന്തപുര​ത്തേക്ക്​ വണ്ടി കയറി ആലപ്പി രംഗനാഥന്‍റെ നേതൃത്വത്തിൽ ഓർക്കസ​്​ട്രേഷൻ നടക്കു​േമ്പാളൊക്കെ വളരെ ആവേശത്തിലായിരുന്നു കുട്ടി. എന്നാൽ, പാട്ട്​ കേൾക്കാൻ ദാസ്​ എത്തിയപ്പോൾ കഥ മാറി. ട്രാക്ക്​ സിസ്റ്റം ഇല്ലാത്തതിനാൽ പാട്ട്​ പഠിച്ചു നേരിട്ട്​ പാടുകയാണ്​ അന്ന്​. 'യേശുദാസിനെ പാട്ട്​ പഠിപ്പിക്കാൻ താൻ വളർന്നോ' എന്ന ചിന്ത കുട്ടിയുടെ ആത്​മവിശ്വാസത്തെ ബാധിച്ചു. 'എനിക്ക്​ മാപ്പിളപ്പാട്ട്​ അറിയില്ല. അത്​ നിങ്ങൾ എന്നെ പഠിപ്പിക്കണം മാഷേ' എന്ന ദാസിന്‍റെ വാക്കുകളാണ്​ ധൈര്യം പകർന്നത്​.

'സംകൃതപമഗരി'യാണ് ആദ്യം പഠിപ്പിച്ചത്. 'മാഷ്​' പ്രതീക്ഷിച്ചതിനേക്കാൾ വേഗത്തിൽ ദാസ് അതു പഠിച്ചെടുത്ത്​ പാടുകയും ചെയ്​തു. 1962ൽ എച്ച്.എം.വിയുടെ ആൽബത്തിനുവേണ്ടി കുട്ടി പാടിയ പാട്ടാണ് ഇത്​. വാഴപ്പുള്ളി മുഹമ്മദ് രചിച്ച ഈ പാട്ട്​ അമ്മായി ഫാത്തിമക്കുട്ടിയിൽനിന്നാണു കുട്ടി ആദ്യം കേൾക്കുന്നത്​. പിന്നീട്​ സുഹൃത്ത് പി.എൻ. മൂസ എഴുതിക്കൊടുത്ത വരികൾക്ക്​ സംഗീതം നൽകി കുട്ടി ഇന്നു നാം കേൾക്കുന്ന 'സംകൃതപമഗരി'യാക്കി. ദാസിന്‍റെ മാസ്​മരികത അതിനെ​ വേറിട്ട തലത്തിലെത്തിക്കുകയും ലോകമെങ്ങുമുള്ള മലയാളികൾ ഏറ്റെടുക്കുകയും ചെയ്​തു.

'മൈലാഞ്ചിപാട്ടുകളി'ലെ 'പതിപലതിലും തുതിയേറും...' എന്ന പാട്ടാണ്​ ദാസിനെ അൽപം കുഴപ്പിച്ചത്​. പല തവണ പഠിപ്പിച്ചിട്ടും ഉച്ചാരണം വഴങ്ങിയില്ല. എട്ടോ പത്തോ തവണ പാടി കേട്ടിട്ടും കുട്ടിക്ക്​ തൃപ്തിയായില്ല. പക്ഷേ, ദാസിനോട്​ പറയാനും മടി. ഒടുവിൽ രംഗനാഥ്​ വഴി​ ഇക്കാര്യം ദാസിനെ അറിയിച്ചപ്പോൾ 'പാടിയത്​ ശരിയായില്ലെങ്കിൽ അത്​ നേരിട്ട്​ എന്നോട്​ പറയാനുള്ള അവകാശം മാഷിനുണ്ട്​. ഇത്​ ശരിയാക്കിയിട്ട്​ മതി ബാക്കി റെക്കോഡിങ്​' എന്നായിരുന്നു മറുപടി. അദ്ദേഹം കുട്ടിയെ കൊണ്ട്​ ആ പാട്ട്​ പാടിച്ച്​ ഒരു കാസെറ്റിൽ റെക്കോഡ്​ ചെയ്തു. ആ കാസറ്റുമായി പോയത്​ കടപ്പുറത്തേക്കാണ്​. പിറ്റേന്ന്​ രാവിലെ ഏഴുമണിക്ക്​ കുട്ടിക്ക്​ ഫോൺകോളെത്തി.​ ദാസ്​ പറഞ്ഞത്​ ഇതാണ്​-'മാഷേ, അവൻ എന്‍റെ പിടിയിൽ ഒതുങ്ങി. അവനെ മെരുക്കിയിട്ടാണ് ഇന്നലെ രാത്രി ഞാൻ ഉറങ്ങിയത്. രാവിലെ എട്ടിന്​ ഞാനെത്തും. നമുക്ക്​ ഇത്​ റെക്കോഡ് ചെയ്തേക്കാം.'