'നീ നല്ലൊരു കേസില്ലാ വക്കീൽ ആകട്ടെ' -ദേവരാജൻ മാസ്റ്ററുടെ അനുഗ്രഹം സംഭവിച്ചെന്ന്​ ഗായകൻ സുദീപ്​ കുമാർ

2000 ഡിസംബറിലാണ്​. വക്കീലായി എൻറോൾ ചെയ്യുന്നതിന് രണ്ടു ദിവസം മുമ്പ് ഗുരുവായ ദേവരാജൻ മാസ്റ്ററെ കണ്ട്​ അനുഗ്രഹം വാങ്ങാൻ തിരുവനന്തപുരം കരമനയിലെ വീട്ടിൽ ചെന്നു ഗായകൻ സുദീപ്​ കുമാർ. 'മാസ്റ്റർ... ഇരുപതാം തീയതി ഞാൻ അഡ്വക്കേറ്റ് ആയി എൻറോൾ ചെയ്യുകയാണ്. എറണാകുളത്ത് വെച്ചാണ് ചടങ്ങ്'-സുദീപ്​ പറഞ്ഞപ്പോൾ ഏതാനും നിമിഷത്തേക്ക്​ മറുപടിയൊന്നുമുണ്ടായില്ല മാസ്റ്ററിൽ നിന്ന്​. പിന്നീട്​ അദ്ദേഹം ചോദിച്ചു -'അപ്പോൾ എന്താ നിന്‍റെ ഭാവി പരിപാടി? പാട്ടുകാരൻ ആവാനാണോ അതോ വക്കീൽ ആവാനാണോ തീരുമാനം?'.

സുദീപിന്​ ഒന്നും ആലോചിക്കാൻ ഉണ്ടായിരുന്നില്ല. 'എനിക്ക് പാട്ടുകാരനാകാനാണ് ആഗ്രഹം. നിയമം പഠിച്ചതുകൊണ്ട് എൻറോൾ ചെയ്യുന്നു എന്നേയുള്ളൂ'. മാസ്റ്ററുടെ മറുപടിയും ഒട്ടും വൈകിയില്ല. സുദീപിന്‍റെ തലയിൽ കൈവെച്ചു കൊണ്ട് മാസ്റ്റർ പറഞ്ഞു - 'എങ്കിൽ, നീ എന്നും നല്ലൊരു കേസില്ലാ വക്കീൽ ആയിരിക്കട്ടെ'. അത്​ അങ്ങനെതന്നെ സംഭവിച്ചെന്ന്​ പറയുന്നു സുദീപ്​ കുമാർ. വക്കീൽ ആയി എൻറോൾ ചെയ്​തിട്ട്​ 20 വർഷം തികയുന്ന വേളയിൽ ഫേസ്​ബുക്ക്​ പോസ്റ്റിലൂടെയാണ്​ സുദീപ്​ കുമാർ ഈ 'അനുഗ്രഹ നിമിഷം' ഓർത്തെടുത്തത്​. താൻ ശരിക്കും ഒരു 'കേസില്ലാ വക്കീൽ' ആയെന്ന്​ പറഞ്ഞ സുദീപ്​ കുമാർ ഇനിയും അങ്ങനെ തന്നെ ആയിരിയ്ക്കുമെന്ന്​ പറഞ്ഞാണ്​ കുറിപ്പ്​ അവസാനിപ്പിക്കുന്നത്​. അതിന്‍റെ കാരണവും സുദീപ്​ പറയുന്നുണ്ട്​ - 'എന്നെ അനുഗ്രഹിച്ചത് മറ്റാരുമല്ല, ക്രാന്തദർശിയായ സംഗീത ചക്രവർത്തിയാണ്​'.

2000 ഡിസംബർ 20നാണ് സുദീപ്​ വക്കീൽ ആയി എൻറോൾ ചെയ്തത്. എറണാകുളം ഫൈൻ ആർട്സ് ഹാളിൽ ജസ്റ്റിസ് വി.ആർ. കൃഷ്ണയ്യരുടെ സാന്നിധ്യത്തിൽ നടന്ന ചടങ്ങിൽ കേരള ഹൈകോടതിയിലെ ആദ്യത്തെ വനിത ചീഫ് ജസ്റ്റിസ് ആയിരുന്ന കെ.കെ. ഉഷയിൽ നിന്നാണ്​ സർട്ടിഫിക്കറ്റ് ഏറ്റുവാങ്ങിയത്​. നിയമം പഠിക്കണം, അഭിഭാഷകനാവണം എന്നൊന്നുമുള്ള അദമ്യമായ ആഗ്രഹം കൊണ്ടല്ല താൻ ലോ കോളജിൽ എത്തിയതെന്ന്​ സുദീപ്​ പറയുന്നു. സംഗീതരംഗത്തെ മികച്ച അവസരങ്ങൾക്ക് താരതമ്യേന സാധ്യത കുറവായ ആലപ്പുഴ പട്ടണത്തിൽ നിന്നും തലസ്ഥാനനഗരിയിലേക്ക് ഭാഗ്യാന്വേഷികളിലൊരാളായുള്ള പറിച്ചുനടൽ ആയിരുന്നു അത്​.

നിയമകലാലയത്തിലെ ആദ്യ ദിവസം തന്നെ പി. ഉണ്ണികൃഷ്ണന്‍റെ സംഗീതകച്ചേരി ആസ്വദിക്കാനായതും നടനും തിരക്കഥാകൃത്തുമായ അനൂപ്​ മേനോനെ പരിചയപ്പെട്ടതുമെല്ലാം സുദീപ്​ കുറിപ്പിൽ വിവരിക്കുന്നുണ്ട്​. ഫേസ്​ബുക്ക്​ പോസ്റ്റിന്‍റെ പൂർണ രൂപം വായിക്കാം-