നദീം- ശ്രാവൺ: ഈ കൂട്ടുകെട്ടിൽ​ ഇനി ആര്​ പകരം നിൽക്കും

''എന്‍റെ ഷാനു പോയി. ഒരു ആയുസ്സ്​ മുഴുക്കെ ഒന്നിച്ച്​ കഴിഞ്ഞവർ ഞങ്ങൾ. ഏറെ ഉയരങ്ങൾ ഒന്നിച്ചു കണ്ടതാണ്​, ഇറക്കങ്ങളും. പല വഴികളിലും പരസ്​പരം കൂട്ടുനൽകിയായിരുന്നു വളർന്നത്​. ഒരിക്കലും ബന്ധം മുറിഞ്ഞതേയില്ല, ശരീരങ്ങൾ എത്ര അകലത്തിലായപ്പോഴും. വേദന അടക്കാനാകുന്നില്ല. കഴിഞ്ഞ ദിവസങ്ങളിലൊക്കെ വിളിക്കാറുണ്ടായിരുന്നു. തീരെ വയ്യെന്ന്​ പറയും. ഇനി നേരിട്ടുചെന്ന്​ അവസാന യാത്രയാക്കാൻ മനസ്സ്​ അനുവദിക്കുന്നില്ല''- പറയുന്നത്​ ബോളിവുഡ്​ കണ്ട ഏറ്റവും മികച്ച സംഗീത കൂട്ടു​െകട്ടിൽ ബാക്കിയായ നദീം. വ്യാഴാഴ്ച രാത്രി വിടപറഞ്ഞ ഉറ്റസുഹൃത്തി​ന്​ വിട നൽകാൻ മനസ്സനുവദിക്കാതെ നദീം ​സങ്കട​പ്പെട്ടുനിൽക്കു​േമ്പാൾ ചരിത്രത്തിലേക്ക്​ പിന്മടങ്ങുന്നത്​ ലോകം ഏറെ ആദരിച്ച ഇണപിരിയാ കൂട്ടുകെട്ട്​.

രാജസ്​ഥാൻകാരനായ ചതുർഭുജ്​ റാ​ത്തോഡിന്‍റെ മകൻ ശ്രാവണും മുംബൈ സ്വദേശിയായ നദീം അക്​തർ സൈഫിയും ആദ്യം കാണുന്നത്​ 70കളുടെ തുടക്കത്തിലാണ്​. 1997ലാണ്​​ ഇരുവരുടെയും സംഗീത സംവിധാനത്തിൽ ആദ്യ സിനിമ ഇറങ്ങുന്നത്​- സാക്ഷാൽ മുഹമ്മദ്​ റഫി പാട്ടുകാരനായി എത്തി 'ദംഗൽ' എന്ന ഈ ഭോജ്​പൂരി സിനിമയിൽ. അഞ്ചു വർഷം കഴിഞ്ഞ്​ 'മൈനേ ജീനെ സീഖ്​ ലിയാ'യിലൂടെ ബോളിവുഡ്​ അരങ്ങേറ്റം. അതുകഴിഞ്ഞ്​ സഖ്​മി ഇൻസാനും അതേ വർഷം ഇറങ്ങിയെങ്കിലും ആരോരുമറിഞ്ഞില്ല. 1989ൽ മൂന്നു സിനിമകൾക്ക്​ സംഗീതമൊരുക്കി പതിയെ തിരശ്ശീലക്കു പുറത്തെത്തിയ കൂട്ടുകെട്ടിന്​ അവസരങ്ങളുടെ കെട്ടുതുറക്കുന്നത്​​ ഗുൽഷൻ കുമാറിന്‍റെ ടി സീരീസാണ്​. എട്ടു പാട്ടുകളടങ്ങിയ ആൽബത്തിന്‍റെ ട്രാക്ക്​ കേട്ട്​ ആവേശംകയറിയ സംവിധായകൻ മഹേഷ്​ ഭട്ട്​ ഇരുവരെയും 'സിനിമയിലെടുത്തു'. ആ പാട്ടുകൾ​ 1990ൽ 'ആഷിഖി' എന്ന ​േബ്ലാക്​ബസ്റ്റർ സിനിമയിലൂടെ ഇന്ത്യ മുഴുക്കെ മൂളിനടന്നു. രണ്ടു കോടി കാസറ്റുകൾ വിറ്റുപോയി ആ പാട്ടുകൾ.

പിന്നെ ബോളിവുഡിൽ നീണ്ട ഏഴുവർഷം നദീം- ശ്രാവൺ കൂട്ടുകെട്ട്​ മാത്രമേ ഉള്ളൂവായിരുന്നു.

സാജൻ, ഫൂൽ ഓർ കാണ്ഡേ, രാജ ഹിന്ദുസ്​ഥാനി എന്നീ മൂന്നു സിനിമകൾ മാത്രം ഇരുവർക്കും നൽകിയത്​ സംഗീത ലോകത്തെ താരപദവി. ദീവാന, പായൽ, ഹം ഹേ രഹി പ്യാർ കേ, ദിൽവാലേ, ബർസാത്ത്​, മുഹബ്ബത്ത്​, പർദേസ്​, റാസ്​, ഹം തുമാരെ ഹൈ സനം, സഡക്​ തുടങ്ങി പിന്നെയും എണ്ണമറ്റ ഹിറ്റുകൾ. സമീർ, ആനന്ദ്​ ബക്ഷി, കുമാർ സാനു, ഉദിത്​ നാരായൺ, അൽക യഗ്​നിക്​ തുടങ്ങി അക്കാലത്തെ ഗാന മാന്ത്രികരെല്ലാം മൂളിയത്​ ഇവർ സംഗീതം നൽകിയ വരികൾ.

യുവ തലമുറ എത്തിയ പുതിയ പതിറ്റാണ്ടുകളിൽ പോലും ഇരുവർക്കും അവസരം കുറഞ്ഞില്ല. അതിനിടെ 1997ൽ ഗുൽഷൻ കുമാറിന്‍റെ മരണവുമായി ബന്ധപ്പെട്ട്​ നദീമിന്‍റെ പേര്​ ഉയർന്നുവന്നതോടെ ലണ്ടനിലായിരുന്ന നദീം പിന്നെ മടങ്ങിവന്നില്ല​. നാട്ടിലില്ലാതിരുന്നിട്ടും ഇരുവരും കൂട്ടായി സിനിമകൾ പിന്നെയും വന്നു. 2005ൽ ഇരുവരും പിരിഞ്ഞു​. 'ദോസ്​തി: ഫ്രണ്ട്​സ്​ ഫോറെവർ' ആയിരുന്നു കൂട്ടുകെട്ടിൽ പിറന്ന അവസാന സിനിമ. അതുകഴിഞ്ഞ്​ 2009ൽ പിന്നെയും ഇരുവരും ഒന്നായി.

66 കാരനായ ശ്രാവൺ ദിവസങ്ങളായി മാഹിമിലെ ആശുപത്രിയിലായിരുന്നു​. അവസാന നാളുകളിൽ വെന്‍റിലേറ്ററിലും. നേരത്തെ പ്രമേഹവും മറ്റ്​ അസുഖങ്ങളുമുണ്ടായിരുന്ന ശ്രാവണിന്​ രോഗം വന്നതോടെ ശ്വാസകോശത്തിൽ അണുബാധ സാരമായി ബാധിച്ചിരുന്നു. ഹൃദയ രോഗവും കലശലായി. ഒടുവിൽ വിയോഗവും.

മരണം ബോളിവുഡിനെ കടുത്ത ദുഃഖത്തിലാഴ്​ത്തി. ''മഹാമാരി കൊണ്ടുപോയ മറ്റൊരു മഹാ നഷ്​ടമാണിതെന്നും വിനയവും സത്യസന്ധതയും ജീവിതത്തോടു ചേർത്തുവെച്ച മഹാനായ സംഗീത സംവിധായകനായിരുന്നുവെന്നും'' ഗായിക ശ്രേയ ഘോഷാൽ പറഞ്ഞു. സംഗീതജ്​ഞനെന്നതിലുപരി ഏറെ സ്​നേഹമുള്ള മനുഷ്യനും സുന്ദരമായ ഹൃദയവുമായിരുന്നു ശ്രാവണെന്ന്​ അദ്​നാൻ സമി അനുശോചിച്ചു.