ചലച്ചിത്രഗാന രചിയിതാവ്​ അഭിലാഷ്​ അന്തരിച്ചു

മുംബൈ: പ്രശസ്​ത ഗാനരചിയിതാവും തിരക്കഥാകൃത്തുമായ അഭിലാഷ്​ (74) അന്തരിച്ചു. ഗുരുഗാവിലെ വസതിയിൽ വെച്ച്​ തിങ്കളാഴ്​ച രാവിലെയായിരുന്നു മരണം. അർബുദ ബാധയെ തുടർന്ന്​ ചികിത്സയിലായിരുന്നു. മാർച്ചിൽ ഉദര ശസ്​ത്രക്രിയക്ക്​ വിധേയനായിരുന്നുവെങ്കിലും പിന്നീട്​ ആരോഗ്യസ്ഥിതി മോശമായിരുന്നു.

1986ൽ പുറത്തിറങ്ങിയ അങ്കുഷ്​ എന്ന ചിത്രത്തിലെ ''ഇത്നി ശക്തി ഹമേ ദേന ധാതാ മൻ കാ വിശ്വാസ് കംസോർ ഹോ നാ" എന്ന ഗാനം ഉൾപ്പെടെ നിരവധി ഗാനങ്ങൾക്ക്​ അഭിലാഷ്​ തൂലിക ചലിപ്പിച്ചു. ഈ ഗാനം എട്ട്​ ഭാഷകളിലേക്ക്​ ​മൊഴി മാറ്റിയിരുന്നു. ലാൽ ചൂഡ (1984), ഹൽ‌ചുൽ (1995), ജീത് ഹേ ഷാൻ സേ (1988) തുടങ്ങിയ ചിത്രങ്ങൾക്കും ഗാനങ്ങൾ രചിച്ചു.

ഗാനങ്ങൾക്ക്​ പുറമെ അഭിലാഷ്​ നിരവധി സിനിമകൾക്കും ടെലിവിഷൻ പരിപാടികൾക്കും തിരക്കഥ എഴുതിയിരുന്നു. മുൻ രാഷ്​ട്രപതി ഗ്യാനി സെയിൽ സിങ്ങിൽ നിന്നും കല​ശ്രീ അവാർഡ്​ നേടിയിട്ടുണ്ട്​.