തീവ്രഹിന്ദുത്വത്തെ വെള്ളപൂശുന്ന, മുസ്​ലിം വിരുദ്ധത പറയുന്ന 'കുരുതി'

'കൊല്ലും എന്ന വാക്ക്; കാക്കും എന്ന പ്രതിജ്ഞ' എന്നാണ് പൃഥ്വിരാജ് നിർമിച്ച് അദ്ദേഹം തന്നെ പ്രധാന വേഷത്തിലെത്തിയ 'കുരുതി'യുടെ ടാ​ഗ് ലൈൻ. ചിത്രം പുറത്തിറങ്ങിയപ്പോൾ ട്രെയിലറിൽ കണ്ട സസ്പെൻസും നി​ഗൂഢതയും ഊതിവീർപ്പിച്ച ബലൂൺ പോലെ പൊട്ടിപോയി എന്നതാണ് യാഥാർഥ്യം. അതേസമയം, ട്രെയിലറിൽ കണ്ട ​ഗംഭീര മേക്കിങും ചടുലതയും കഥാപാത്രങ്ങളുടെ കാസ്റ്റിങും മികച്ചത് തന്നെയായിരുന്നു. എന്നാൽ, ചിത്രം പറഞ്ഞുവെക്കുന്ന പ്രതിലോമകരമായ രാഷ്​ട്രീയം അതിന്‍റെ എല്ലാ മികവിനെയും ഇല്ലാതെയാക്കുന്നു എന്നത്​ പറയാതെ വയ്യ.

തീവ്രഹിന്ദുത്വം പിടിമുറുക്കിയ, ആ ആശയധാരയിലുള്ളവർ ഭരിക്കുന്ന ഒരു രാജ്യത്ത് അവരോട് ഐക്യപ്പെടുന്ന ചിത്രം കൂടിയാകുന്നു 'കുരുതി'. തീവ്രഹിന്ദുത്വവാദിയെ കൊലപ്പെടുത്താൻ വരുന്ന മുസ്​ലിം തീവ്രവാദികളും അവർക്കിടയിൽ പെട്ടുപോകുന്ന മുസ്​ലിം 'മതേതരനും' തമ്മിലുണ്ടാകുന്ന സംഘട്ടനമാണ് സിനിമയെന്ന് ഒറ്റവാക്കിൽ പറയാം. സിനിമകളിൽ ഇസ്​ലാമോഫോബിയ ഒളിപ്പിച്ചുകടത്തുന്നുവെന്ന് പരാതികളുയരുമ്പോൾ, വളരെ വ്യക്തമായി മുസ്​ലിം വിരുദ്ധത പറയുകയും തീവ്രഹുന്ദുത്വ നിലപാടുകളെ വെള്ളപൂശുകയും ചെയ്യുന്നുണ്ട് ചിത്രം. അങ്ങോട്ടും ഇങ്ങോട്ടും ഒരു ബാലൻസ്​ ഒപ്പിച്ചിട്ടുണ്ടെന്ന്​ വരുത്തി തീർക്കുകയും ചെയ്യുന്നുണ്ട്​. മതപരവും വർ​ഗീയവുമായ ഉള്ളടക്കങ്ങളില്ലാതെയാണ് ചിത്രത്തെ സമീപിച്ചിരുന്നതെങ്കിൽ 'കുരുതി' വേറിട്ട് നിന്നേനെ എന്നതിൽ സംശയമില്ല.

ഗുഡ് മുസ്​ലിം, ബാഡ് മുസ്​ലിം എന്നിങ്ങനെയുള്ള രണ്ടുതരം കഥാപാത്ര നിർമിതികളിലൂടെ നിരവധി സിനിമകൾ പുറത്തിറങ്ങിയിട്ടുണ്ട്. അതിലെ ബാഡ് മുസ്​ലിമിനെ അഞ്ചുനേരം നമസ്കരിക്കുന്ന, പെണ്ണ് പിടിക്കുന്ന കൊടും തീവ്രവാദിയായാണ് ചിത്രീകരിക്കാറുള്ളത്. അതിന്‍റെ നേർവിപരീതമായ ​​ഗുഡ് മുസ്​ലിം വന്ന് ബാഡ് മുസ്​ലിമിനെ വകവരുത്തുന്നതിലൂടെ ആ ചിത്രം ദേശീയ ഐക്യത്തെയും രാജ്യസുരക്ഷയെയും കാത്തുസൂക്ഷിക്കുന്നതായി മാറുന്നു. ഇതേ രീതി തന്നെയാണ് 'കുരുതി'യും ആവർത്തിക്കുന്നത്. എന്നാലിവിടെ ​ഗുഡ് മുസ്​ലിമിൽ ചെറിയ മാറ്റങ്ങൾ കാണാം. അയാൾ അഞ്ചുനേരം നമസ്കരിക്കുന്ന, ദൈവഭയമുള്ളയാളാണ്.

ഇബ്രു എന്ന ​ഗുഡ് മുസ്​ലിമും ലൈഖ്, കരീം എന്നിങ്ങനെയുള്ള ബാഡ് മുസ്​ലിമുകളും തമ്മിലാണ്​ ഇവിടെ സംഘർഷം നടക്കുന്നത്. അതിലേക്ക് വരുന്ന തീവ്രഹിന്ദുത്വവാദിയാക​ട്ടെ മുസ്​ലിം തീവ്രവാദം വളർന്നതുകൊണ്ട് മാത്രം തീവ്രഹിന്ദുവായ യുവാവാണ്. തീവ്രഹിന്ദുവിനെ പോലും സൃഷ്​ടിക്കുന്നത് എപ്പോഴും മതം പറഞ്ഞ് നടക്കുന്ന, പടച്ചവൻ പറഞ്ഞത് മാത്രം ചെയ്യുന്ന മുസ്​ലിംകളാണെന്ന തീർത്തും സം​ഘ്പരിവാർ ഭാഷ്യമാണ് 'കുരുതി' ഏറ്റുപാടുന്നത്. അത്​ മാത്രമല്ല, മുസ്​ലിം വീടുകളിൽ തീവ്ര ആശയത്തിൽ ആകൃഷ്​ടരായി യുവതലമുറ വളർന്നുവരുന്നുണ്ടെന്നും ചിത്രം പറഞ്ഞുവെക്കുന്നു. അതോടൊപ്പം ഭൂരിപക്ഷ വർ​ഗീയതയെ സമീകരിക്കുന്ന ന്യൂനപക്ഷ വർ​ഗീയത എന്ന ആശയവും ചിത്രം പങ്കുവെക്കുന്നു. ന്യൂനപക്ഷ സമുദായങ്ങൾക്ക് നൽകുന്ന സംവരണമാണ് തീവ്രഹിന്ദുത്വത്തിലേക്ക് നയിക്കുന്നതെന്ന കണ്ടെത്തലും സിനിമ നടത്തുന്നു. മുസ്​ലിം ഭീകരത സംഘടിതമാണെന്നും ഹിന്ദുത്വ ഭീകരത ഉണ്ടാകുന്നെങ്കിൽ തന്നെ അത് സാഹചര്യങ്ങളുടെ സമ്മർദം കൊണ്ടുള്ള ഒറ്റപ്പെട്ട സംഭവവും ആണെന്ന്​ പറയാൻ 'കുരുതി' മടിക്കുന്നേയില്ല.

പ്രമേയപരമായ 'കുരിതി കൊടുക്കൽ' മാറ്റി നിർത്തിയാൽ പൃഥ്വിരാജ്​, മുരളി ഗോപി, റോഷൻ, മാമുക്കോയ, ശ്രിന്ദ, ഷൈൻ ടോം ചാക്കോ, നവാസ്​ വള്ളിക്കുന്ന്​, നസ്‌ലൻ, സാഗർ എന്നിവരുടെ പ്രകടനം സിനിമക്ക് പൂർണത നൽകുന്നുണ്ട്. കൂടാതെ അഭിനന്ദൻ രാമാനുജമിന്‍റെ കാമറയും സംഘർഷം നിലനിർത്തുന്ന ജേക്സ് ബിജോയിയുടെ സംഗീതവും സിനിമയുടെ പ്ലസ്​ പോയന്‍റാണ്​.