'വാരിയംകുന്നനി'ൽ നിന്ന്​ പിൻമാറിയത്​ വിമർശനങ്ങളെ ഭയന്നല്ല -ആശിഖ്​ അബു

ദുബൈ: വിമർശനങ്ങളെയോ പലരൂപത്തിലുള്ള പ്രചാരണങ്ങളെയോ ഭയന്നല്ല 'വാരിയംകുന്നൻ' സിനിമയിൽ നിന്ന്​ പിൻമാറിയതെന്ന്​ സംവിധായകൻ ആശിഖ്​ അബു. ദുബൈയിൽ മാധ്യമങ്ങളോട്​ സംസാരിക്കവെയാണ്​ ഇക്കാര്യം അദ്ദേഹം വ്യക്​തമാക്കിയത്​.

വലിയ സാമ്പത്തിക ബാധ്യതയുള്ളതും ചരിത്രത്തോട്​ നീതി പുലർത്തി ചെയ്യേണ്ടതുമായ സിനിമയായിരുന്നു 'വാരിയംകുന്നൻ'. പ്രൊജക്​ട് പൂർത്തിയാക്കാൻ കഴിയു​മോ എന്ന ​ആശങ്ക തുടക്കം മുതൽ ഉണ്ടായിരുന്നു. നിർമാതാക്കൾക്ക്​ അത്​ മികച്ച രീതിയിൽ പൂർത്തിയാക്കാൻ ആഗ്രഹവുമുണ്ട്​. അവരതുമായി മുന്നോട്ടു പോകുമെന്ന്​ അറിയിച്ചിട്ടുമുണ്ട്​. സംവിധായകനെന്ന നിലയിലെ പിൻമാറ്റത്തിൽ ബാഹ്യസമ്മർദങ്ങളൊന്നും സ്വാധീനിച്ചിട്ടില്ല-അദ്ദേഹം വ്യക്​തമാക്കി.

പൃഥ്വിരാജിനെ നായകനാക്കി ആശിഖ്​ അബു പ്രഖ്യാപിച്ച മലബാർ സമരനായകൻ വാരിയംകുന്നത്ത്​ കുഞ്ഞഹമ്മദ്​ ഹാജിയെ കുറിച്ച 'വാരിയംകുന്നൻ' സിനിമ വിവാദമാക്കാൻ വിവിധ കോണുകളിൽ നിന്ന്​ ശ്രമം നടന്നിരുന്നു. തുടർന്ന്​ സെപ്​റ്റംബറിൽ ഇരുവരും സിനിമയിൽ നിന്ന്​ പിൻമാറിയതായി അറിയിച്ചു. ഇത്​ സംബന്ധിച്ച്​ ആദ്യമായാണ്​ ആശിഖ്​ അബു മാധ്യമങ്ങളോട്​ പ്രതികരിക്കുന്നത്​.