ഗവർണറും കുടുംബവും 'മിന്നൽ മുരളി'യുടെ ആരാധകർ-സന്തോഷം പങ്കുവെച്ച്​ ടൊവിനോ

തിരുവനന്തപുരം: ഗവർണർ ആരിഫ്​ മുഹമ്മദ്​ ഖാനെ നടൻ ടൊവിനോ തോമസും കുടുംബവും സന്ദർശിച്ചു. ഭാര്യ ലിഡിയ, മക്കളായ ഇസ്സ, തഹാൻ എന്നിവർക്കൊപ്പമാണ്​ ടൊവിനോ രാജ്ഭവനിലെത്തി ഗവർണറുമായി കൂടിക്കാഴ്ച നടത്തിയത്. ഗവർണർക്കും കുടുംബാംഗങ്ങൾക്കുമൊപ്പമുള്ള കൂടിക്കാഴ്ചയുടെ നിമിഷങ്ങൾ ടൊവിനോ സമൂഹമാധ്യമങ്ങളിലൂടെ പങ്കുവച്ചു.

'സംഭവബഹുലവും മനോഹരവുമായിരുന്ന 2021നെ പൂർത്തീകരിക്കാനുള്ള എത്ര വിസ്മയകരമായ മാർഗം! ബഹുമാനപ്പെട്ട കേരള ഗവർണർ ശ്രീ. ആരിഫ്​ മുഹമ്മദ്​ ഖാൻ സാറുമായുള്ള സന്ദർശനം ഏറെ പ്രിയങ്കരമായി. അദ്ദേഹവും അദ്ദേഹത്തിന്‍റെ സ്​നേഹനിർഭരവും അതിമനോഹരവുമായ കുടുംബവും ഞങ്ങൾക്ക്​ സമ്മാനിച്ച ഊഷ്മളതയും ഇഷ്ടവും എന്നെ കീഴ്​പ്പെടുത്തി കളഞ്ഞു. ഉറപ്പാണ്​, ഇസ്സ അവരുടെ ഫാൻ ആയി മാറിയിട്ടുണ്ട്​. അവരെല്ലാം 'മിന്നൽ മുരളി'യെ ഇഷ്ടപ്പെട്ടു എന്നറിഞ്ഞത്​ സന്തോഷം ഇരട്ടിയാക്കുന്നു' -ഗവർണർക്കും കുടുംബത്തിനുമൊപ്പമുള്ള ചിത്രങ്ങൾ പങ്കുവെച്ച്​ ടൊവിനോ ഫേസ്​ബുക്കിൽ കുറിച്ചു.

'വാശി' എന്ന പുതിയ സിനിമയുടെ ചിത്രീകരണത്തിന്​ വേണ്ടിയാണ്​ ടൊവിനോ തിരുവനന്തപുരത്തെത്തിയത്​. രേവതി കലാമന്ദിര്‍ നിർമിക്കുന്ന 'വാശി'യിൽ കീര്‍ത്തി സുരേഷ് ആണ് നായിക. അടുത്തിടെ റിലീസ്​ ചെയ്ത 'മിന്നൽ മുരളി' തരംഗമായതിന്‍റെയും നെറ്റ്ഫ്ലിക്സ്​ ആഗോള സിനിമയിൽ നാലാം സ്​ഥാനത്ത് എത്തിയതിന്‍റെയും സന്തോഷത്തിലാണ്​ ടൊവിനോ​. പതിനൊന്ന്​ രാജ്യങ്ങളിലെ ആദ്യ പത്ത്​ സ്ഥാനങ്ങളിൽ 'മിന്നൽ മുരളി' ഇടംപിടിച്ചിട്ടുണ്ട്​. ​ആഷിഖ്​ അബു സംവിധാനം ചെയ്യുന്ന 'നാരദൻ' ആണ് റിലീസിനൊരുങ്ങുന്ന ടൊവിനോയുടെ പുതിയ പ്രോജക്ട്.