രാജീവ് രവി ചിത്രം ‘തുറമുഖം’ ഒ.ടി.ടിയിലേക്ക്

രാജീവ് രവി സംവിധാനം ചെയ്ത ‘തുറമുഖം’ ഒ.ടി.ടിയിലേക്ക്. മാർച്ച് 10 നു തിയേറ്ററുകളിലെത്തിയ ചിത്രം ഏപ്രിൽ 28 മുതൽ സോണി ലിവിൽ സ്ട്രീം ചെയ്യും. നിവിൻ പോളി ആണ് ചിത്രത്തിലെ കേന്ദ്ര കഥാപാത്രത്തെ അവതരിപ്പിക്കുന്നത്. 2019ൽ ചിത്രീകരണം കഴിഞ്ഞ ചിത്രം നാല് വർഷങ്ങൾക്കുശേഷമാണ് റിലീസിനെത്തിയത്.

മട്ടാഞ്ചേരിയുടെ പോരാട്ടചരിത്രത്തെ സത്യസന്ധമായി സമീപിക്കുന്ന ചിത്രമാണ് ‘തുറമുഖം.’ കൊച്ചിയില്‍ 1962 വരെ നിലനിന്നിരുന്ന ചാപ്പ തൊഴില്‍ വിഭജന സമ്പ്രദായവും അത് അവസാനിപ്പിക്കാനായി പതിറ്റാണ്ടുകളോളം തൊഴിലാളികള്‍ നടത്തിയ പോരാട്ടവുമാണ് ചിത്രത്തിന്റെ പ്രമേയം.

ജോജു ജോർജ്, പൂർണിമ ഇന്ദ്രജിത്ത്, അർജുൻ അശോകൻ, നിമിഷ സജയൻ, ദർശന രാജേന്ദ്രൻ, ഇന്ദ്രജിത്ത് എന്നിവരാണ് ചിത്രത്തിലെ മറ്റു പ്രധാന വേഷങ്ങൾ ചെയ്യുന്നത്. സുകുമാർ തെക്കേപ്പാട്ട്, ജോസ് തോമസ് എന്നിവർ ചേർന്നാണ് നിർമാണം.