വീണ്ടും ഹിറ്റായി മോഹന്‍ലാല്‍-ശോഭന ഗാനം; പ്രേക്ഷകർ ഏറ്റെടുത്ത് 'കൺമണിപൂവേ'...

സിനിമാ പ്രേമികള്‍ ഏറെ പ്രതീക്ഷയോടെ കാത്തിരിക്കുന്ന മോഹന്‍ലാല്‍ – തരുണ്‍ മൂര്‍ത്തി ചിത്രം ‘തുടരും’ സിനിമയിലെ എം.ജി. ശ്രീകുമാർ പാടിയ 'കൺമണിപൂവേ' എന്ന ഗാനം ട്രെന്‍റിങ്ങിൽ ഇടം പിടിച്ചിരിക്കുകയാണ്. യൂട്യൂബില്‍ ഇതിനകം 2.3 മില്യണിലധികം കാഴ്ചക്കാരാണ് ഗാനം കണ്ടത്. സംഗീത വിഭാഗത്തിലും ട്രെന്‍റിങ്ങിലാണ്. മോഹന്‍ലാലിന്റെ കരിയറിലെ 360-മത്തെ സിനിമയാണിത്. 15 വര്‍ഷത്തിന് ശേഷം മോഹന്‍ലാല്‍- ശോഭന കോമ്പോ ഒരുമിക്കുന്നു എന്ന പ്രത്യേകത കൂടി ചിത്രത്തിനുണ്ട്. സിനിമയുടെ അപ്‌ഡേറ്റുകളെല്ലാം സിനിമാ പ്രേമികൾ ഏറ്റെടുക്കുന്നുണ്ട്.

കണ്‍മണിപ്പൂവേ എന്നാരംഭിക്കുന്ന ഗാനത്തിന് വരികള്‍ എഴുതിയിരിക്കുന്നത് ഹരിനാരായണന്‍ ബി.കെ ആണ്. ജേക്സ് ബിജോയ് ആണ് സംഗീതം. ടാക്‌സി ഡ്രൈവറുടെ വേഷത്തിലാണ് ചിത്രത്തിൽ മോഹന്‍ലാല്‍ എത്തുന്നത്. രജപുത്ര വിഷ്വല്‍ മീഡിയയുടെ ബാനറില്‍ എം. രഞ്ജിത്ത് ആണ് ചിത്രം നിര്‍മിക്കുന്നത്. തരുണ്‍ മൂര്‍ത്തിയും കെ. ആര്‍ സുനിലും ചേര്‍ന്നാണ് ചിത്രത്തിന് തിരക്കഥയൊരുക്കിയിരിക്കുന്നത്.

ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവര്‍ക്കൊപ്പം നിരവധി പുതുമുഖങ്ങളും ചിത്രത്തില്‍ അഭിനയിക്കുന്നു. ഷാജി കുമാര്‍ ആണ് ഛായാ​ഗ്രഹണം. ചിത്രത്തിന്‍റെ റിലീസ് തീയതി പ്രഖ്യാപിച്ചിട്ടില്ല.