10 ദിവസത്തിനുള്ളിൽ 13 ഹൊറർ സിനിമകൾ കാണാൻ റെഡിയാണോ? വൻതുക വാഗ്​ദാനം ചെയ്​ത്​ കമ്പനി

ന്യൂയോർക്ക്​: 10 ദിവസം കൊണ്ട്​ 13 ഹൊറർ സിനിമകൾ കണ്ട്​ തീർക്കാമെന്ന്​ ആത്മവിശ്വാസമുള്ള വ്യക്തിയാണോ നിങ്ങൾ?. ഉത്തരം അതെ എന്നാണെങ്കിൽ നിങ്ങളെ കാത്ത്​ കിടിലൻ ഓഫറുണ്ട്​. ഒക്​ടോബറിൽ 13 ഹൊറർ ചിത്രങ്ങൾ കാണുന്നയാൾക്ക്​ 1300 ഡോളർ (ഏകദേശം 95000 രൂപ) വാഗ്​ദാനം ചെയ്​തിരിക്കുകയാണ്​ ഫിനാൻസ്​ ബസ്​ എന്ന സാമ്പത്തിക സ്​ഥാപനം.

ചിത്രത്തിന്‍റെ വലിപ്പവും ബജറ്റും പ്രേക്ഷകരിൽ വല്ല സ്വാധീനവും ചെലു​ത്തുന്നുണ്ടോ എന്ന്​ പഠിക്കാൻ വേണ്ടിയാണ്​ കമ്പനിയുടെ ശ്രമമെന്ന്​ സി.എൻ.എൻ റിപ്പോർട്ട്​ ചെയ്​തു.

ഹൊറർ മൂവി ഹാർട്​ റേറ്റ്​ അനലിസ്റ്റ്​ എന്നാണ്​ തസ്​തികയുടെ പേര്​. ഇതുവരെ ഇറങ്ങിയതിൽ വെച്ച്​ ഏറ്റവും പേടിപ്പെടുത്തുന്ന 13 ചിത്രങ്ങൾ കാണുന്ന വേളയിൽ വ്യക്തിയുടെ ഹൃദയമിടിപ്പ്​ ഫിറ്റ്​ബിറ്റ്​ എന്ന ഉപകരണം വെച്ച്​ അളക്കുമെന്ന്​ കമ്പനി വ്യക്തമാക്കി. ഉയർന്ന ബജറ്റിലുള്ള ഹൊറർ ചിത്രങ്ങൾ ചെറുബജറ്റിലുള്ള ചിത്രങ്ങളേക്കാൾ ആളുകളെ പേടിപ്പിക്കുന്നുണ്ടോ എന്നാണ്​ കമ്പനിക്ക്​ അറിയേണ്ടത്​.

ചിത്രങ്ങൾ സ്വരൂപിക്കാനായി 50 ഡോളർ കമ്പനി വേറെ നൽകും. സോ, അമിറ്റിവില്ലെ ഹൊറർ, എ ക്വയറ്റ്​ പ്ലേസ്​, എ ക്വയറ്റ്​ പ്ലേസ്-2, കാൻഡിമാൻ, ഇൻസിഡ്യസ്​, ദ ബ്യെർ വിച്ച്​ പ്രൊജക്​ട്​ സിനിസ്റ്റർ, ഗെറ്റ്​ ഔട്ട്​, ദ പർജ്​, ഹാലോവീൻ (2018), പാരാനോർമൽ ആക്​ടിവിറ്റി, അനബല്ലെ എന്നീ ചിത്രങ്ങളാണ്​ കാണേണ്ടത്​.

ഈ വർഷം സെപറ്റംബർ 26 വരെ അപേക്ഷിക്കാം. അമേരിക്കയിൽ താമസക്കാരായ 18 വയസിന്​ മുകളിൽ പ്രായമുള്ളയാളുകൾക്ക്​ മാത്രമാണ്​ അവസരം. ഒക്​ടോബർ ഒന്നിനാണ്​ തെ​രഞ്ഞെടുക്കപ്പെട്ടയാളെ പ്രഖ്യാപിക്കുക. ഒക്​ടോബർ നാലിന്​ ഫിറ്റ്​ബിറ്റ്​ അയച്ചുകൊടുക്കും. ഒക്​ടോബർ ഒമ്പത്​ മുതൽ ഒക്​ടോബർ 18 വരെയാണ്​ സിനിമ കാണേണ്ടത്​.