ജീവനോടെയിരിക്കുന്നതിന് ദൈവത്തിന് നന്ദി -വിജയ് ബാബു

കൊച്ചി: ജീവനോടെയിരിക്കുന്നതിന് ദൈവത്തിന് നന്ദിയെന്ന്​ നടനും നിർമാതാവുമായ വിജയ് ബാബു. യുവനടിയെ പീഡിപ്പിച്ചെന്ന കേസിൽ ഏഴ് ദിവസത്തെ കസ്റ്റഡി കാലാവധി കഴിഞ്ഞ് ആദ്യമായാണ്​ വിജയ്​ ബാബു പ്രതികരിക്കുന്നത്​.

'ചോദ്യം ചെയ്യൽ അവസാനിച്ചു. സത്യസന്ധമായും സഹകരിച്ചു. കോടതിയുടെ പരിഗണനയിലിരിക്കുന്ന കേസായതിനാൽ മാധ്യമങ്ങളോട് കൂടുതലൊന്നും വെളിപ്പെടുത്താൻ കഴിയില്ല. എഡിറ്റ് ചെയ്യാത്ത തെളിവുകളും വസ്തുതകളും കൈമാറി' -വിജയ് ബാബു സമൂഹമാധ്യമത്തിലെ കുറിപ്പിൽ വ്യക്തമാക്കി.

ഇക്കഴിഞ്ഞ 70 ദിവസവും മനസ്സ്​​ അസ്വസ്ഥമായിരുന്ന എന്നോടൊപ്പം താങ്ങായിനിന്ന് ഈ നിമിഷം വരെ 'ജീവനോടെയിരിക്കാൻ' പ്രേരിപ്പിച്ച ദൈവത്തിന് നന്ദി. അന്തിമ വിജയം സത്യത്തിനു മാത്രമായിരിക്കും. അതുവരെ ഞാനെടുക്കുന്ന സിനിമകൾ എനിക്കുവേണ്ടി സംസാരിക്കും. തൽക്കാലം സിനിമകളെക്കുറിച്ച് മാത്രമേ ഞാൻ സംവദിക്കുകയുള്ളൂ. ഞാൻ എന്നെത്തന്നെ നവീകരിക്കുകയാ​ണെന്നും കുറിപ്പിൽ വ്യക്തമാക്കി.