'ജയ്​ ഭീം' പേര്​ പാ രഞ്​ജിത്​ രജിസ്റ്റർ ചെയ്​തത്​​; തരുമോ എന്ന്​ ചോദിച്ചപ്പോൾ ഇതായിരുന്നു മറുപടി -സൂര്യ

മികച്ച പ്രേക്ഷക പ്രതികരണവും നിരൂപക പ്രശംസയുംനേടി പ്രദർശനം തുടരുന്ന 'ജയ്​ ഭീം' സിനിമയുടെ ടൈറ്റിൽ വിശേഷങ്ങൾ വെളിപ്പെടുത്തി നടൻ സൂര്യ. ചിത്രത്തിന്റെ പേരിന് തങ്ങള്‍ കടപ്പെട്ടിരിക്കുന്നത് സംവിധായകന്‍ പാ രഞ്ജിത്തിനോടാണെന്ന്​ സിനിമയിലെ നായകനും നിർമാതാവുമായ സൂര്യ പറയുന്നു. ചിത്രത്തിന് ജയ് ഭീം എന്ന പേര് നിശ്ചയിച്ച ശേഷമാണ് സംവിധായകന്‍ പാ രഞ്ജിത് ആ പേര് രജിസ്റ്റര്‍ ചെയ്തതായി അറിയുന്നത്. അങ്ങനെ താന്‍ അദ്ദേഹത്തേട് ഇക്കാര്യം സംസാരിക്കുകയായിരുന്നു.

ഞങ്ങള്‍ ഒരു സിനിമ ചെയ്യുന്നുണ്ട്, സിനിമയ്ക്ക് ജയ് ഭീം എന്ന് പേര് നല്‍കാം എന്ന് കരുതുമ്പോഴാണ് താങ്കള്‍ നേരത്തെ ആ പേര് ബുക്ക് ചെയ്തത് അറിയുന്നത്. ആ ടൈറ്റില്‍ തങ്ങള്‍ക്ക് തരാന്‍ പറ്റുമോ എന്ന് ചോദിച്ചു. 'ഇത് എല്ലാത്തിനും ചേര്‍ന്ന, എല്ലാ വിഷയവും സംസാരിക്കാന്‍ പറ്റിയ ടൈറ്റിലാണെന്നും, നിങ്ങള്‍ ധൈര്യമായി എടുത്തുകൊള്ളൂ' എന്നുമായിരുന്നു രഞ്ജിത്തിന്‍റെ മറുപടിയെന്ന്​ സൂര്യ പറയുന്നു. രണ്ടാമതൊന്ന് ചിന്തിക്കാതെയാണ് നിങ്ങളത് എടുത്തോളൂ സാര്‍ എന്ന് അദ്ദേഹം പറഞ്ഞത്. അത് തന്നെ അത്ഭുതപ്പെടുത്തിയെന്നും അദ്ദേഹം കൂട്ടിച്ചേർത്തു. ഒരു സിനിമ ചെയ്യുമ്പോള്‍ തങ്ങള്‍ക്കിഷ്ടപ്പെട്ടതെല്ലാം ആ സിനിമയ്ക്കുവേണ്ടി മാറ്റി വെക്കുന്നവരാണ് നമ്മള്‍. എന്നാല്‍ അദ്ദേഹത്തിന്റെ വലിയ മനസ് കാരണമാണ് ആ പേര് കിട്ടിയതെന്നും സൂര്യ പറഞ്ഞു.

ടി.ജെ. ജ്ഞാനവേലിന്റെ സംവിധാനത്തിൽ പുറത്തിറങ്ങിയ കോര്‍ട്ട് റൂം ഡ്രാമയാണ്​ ജയ് ഭീം.പൊലീസ് കള്ളക്കേസ് ചുമത്തി ലോക്കപ്പ് മര്‍ദ്ദനത്തിന് വിധേയമാക്കിയ ഭര്‍ത്താവിനെ അന്വേഷിച്ചിറങ്ങിയ ഇരുള വിഭാഗത്തില്‍ പെട്ട സെങ്കണി എന്ന യുവതിയുടെയും അവര്‍ക്കുവേണ്ടി പ്രവര്‍ത്തിച്ച ചന്ദ്രുവെന്ന അഭിഭാഷകന്റെയും പോരാട്ടത്തിന്റെ കഥയാണ് ജയ് ഭീം പറയുന്നത്. 1993-95 കാലഘട്ടത്തില്‍ തമിഴ്‌നാട്ടില്‍ നടന്ന യഥാര്‍ഥ സംഭവങ്ങളെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നത്. ഹൈക്കോടതി ജഡ്ജിയായി വിരമിച്ച ജസ്റ്റിസ് ചന്ദ്രു എഴുതിയ 'ലിസൺ ടു മൈ കേസ്​' എന്ന പുസ്തകമാണ്​ ചിത്രത്തിന്​ ആധാരമായത്​.