തന്‍റെ പേരിൽ ലോൺ​ വാഗ്​ദാനം​; തട്ടിപ്പുകാരെ ഫോൺ വിളിച്ച അനുഭവം പങ്കുവെച്ച്​ സോനു സൂദ്​

മുംബൈ: തന്‍റെ പേരിൽ വ്യാജ ഭവനവായ്പ പദ്ധതി തുടങ്ങി പണം തട്ടാൻ ശ്രമിച്ച സംഭവത്തിൽ ഞെട്ടലും നിരാശയും രേഖപ്പെടുത്തി ബോളിവുഡ്​ താരം സോനു സൂദ്​. ഓരോ ദിവസവും പുതിയ തട്ടിപ്പുകളാണ്​ തന്‍റെ പേരിൽ കേൾക്കുന്നതെന്നും താരം പറഞ്ഞു. "ഇത്തരം വ്യാജ ഫൗണ്ടേഷനുകളുണ്ടാക്കി സാധാരണക്കാർ കഷ്​ടപ്പെട്ട്​ സമ്പാദിച്ച പണം തട്ടുന്നത്​ വളരെ സങ്കടകരമാണ്. ശസ്ത്രക്രിയക്കായി സാമ്പത്തിക സഹായം തേടുന്ന അല്ലെങ്കിൽ കുട്ടിയുടെ സ്‌കൂൾ ഫീസ് അടയ്‌ക്കാൻ ആഗ്രഹിക്കുന്ന ഒരു വ്യക്തി… അവരെ എങ്ങനെ വഞ്ചിക്കാൻ കഴിയും....?, ദുരിതമനുഭവിക്കുന്ന അത്തരം ആളുകൾ സാമ്പത്തിക സഹായം വാഗ്ദാനം ചെയ്യുന്നവരിലെല്ലാം പ്രതീക്ഷ ​വെക്കും. അഴിമതിക്കാർ ദരിദ്രരെ മുതലെടുക്കുന്നത് മാപ്പർഹിക്കാത്തതാണ്." -സോനു സൂദ്​ വ്യക്​തമാക്കി.

തട്ടിപ്പുകാരിലൊരാളുമായി സംസാരിച്ച അനുഭവവും സോനു സൂദ്​ പങ്കു​വെച്ചു. ''എന്‍റെ പേരിൽ തട്ടിപ്പ്​ നടത്തുന്ന ഒരാളുമായി ഫോണിലൂടെ സംസാരിച്ചത്​ ഞാൻ ഓർക്കുന്നു. ലോൺ ആവശ്യമുള്ള ഒരാളായിട്ടാണ്​ എന്നെ പരിചയപ്പെടുത്തിയത്​. 'നിർബന്ധമായും രജിസ്​ട്രേഷൻ ഫീസ്​ നൽകണമെന്ന്​' അയാൾ പറഞ്ഞു. എന്നാൽ, അപ്പോൾ തന്നെ ഞാനാരാണെന്ന്​ തട്ടിപ്പുകാരോട്​ വെളിപ്പെടുത്തി. പലതരം ആവശ്യങ്ങളുള്ള പാവം പൗരൻമാരെ മേലാൽ പറ്റിക്കരുതെന്ന്​ മുന്നറിയിപ്പ്​ നൽകുകയും ചെയ്​തു. പണത്തിന്​ ആവശ്യമുണ്ടെങ്കിൽ എന്‍റെയടുത്തേക്ക്​ വരാനും ഞാൻ അവരോട്​ പറഞ്ഞു. ഭയന്ന അയാൾ ഒരുപാട്​ തവണ മാപ്പ്​ പറഞ്ഞു. എന്നാൽ, ഞാൻ അവന്​ ജോലി വാഗ്​ദാനം ചെയ്യുകയാണ്​ ചെയ്​തത്​''​. -സോനു സൂദ്​ കൂട്ടിച്ചേർത്തു.

കഴിഞ്ഞ വെള്ളിയാഴ്​ച്ചയായിരുന്നു താരം, തട്ടിപ്പുകാർ തന്‍റെ പേരിൽ വ്യാജ ലോൺ സർവീസ്​ തുടങ്ങി ആളുകളെ പറ്റിക്കുന്നുണ്ടെന്ന മുന്നറിയിപ്പുമായി എത്തിയത്​. 60 മാസങ്ങൾ കൊണ്ട്​ അടച്ചു തീർക്കാവുന്ന രീതിയിൽ അഞ്ച്​ ലക്ഷം രൂപ വരെ ലോൺ ലഭിക്കാനായി 3,500 രൂപ ആളുകളിൽ നിന്ന്​ ആവശ്യപ്പെടുകയാണ്​ ചെയ്യുന്നത്​. സോനു സൂദ്​ ഫൗണ്ടേഷൻ എന്ന പേരിൽ വ്യാജ സമ്മതപത്രമുണ്ടാക്കിയാണ്​ ​കൃത്യം ചെയ്യുന്നത്​. ഈ ഫൗണ്ടേഷന്‍റെ പേരിൽ ഒരു ബാങ്ക്​ അക്കൗണ്ടും നിലവിലുണ്ട്​. സംഭവത്തിന്​ പിന്നാലെ താരം യു.പി പൊലീസിലും മുംബൈ പൊലീസിലും കേസ്​ ഫയൽ ചെയ്​തിട്ടുണ്ട്​.

ഓരോ ദിവസവും പുതിയ പുതിയ തട്ടിപ്പുകളാണ്​ എന്‍റെ പേരിൽ കേൾക്കുന്നത്​. ഇത്​ അവസാനിപ്പിക്കണം. ഇനി അത്തരം സംഭവങ്ങളുണ്ടാകാതിരിക്കാനായി കർശന നടപടികൾ സ്വീകരിക്കണം​. പറ്റിപ്പുകാരെ ഓരോരുത്തരെയായി​ ഞങ്ങൾ ട്രാക്ക്​ ചെയ്​തുകൊണ്ടിരിക്കുകയാണ്​​. ആളുകളെ പറ്റിക്കാനായുള്ള പുതിയ അടവുകളും അതിന്​ വേണ്ടി പ്രവർത്തിക്കുന്നവരുടെ പേരുകളും ഫോൺ നമ്പറുകളും ​ഓരോ ദിവസവും ഞങ്ങൾ കണ്ടെത്തുന്നുമുണ്ട്​. -സോനു സൂദ്​ വെളിപ്പെടുത്തി.

View this post on Instagram

A post shared by Sonu Sood (@sonu_sood)