തമിഴ് ഗായകൻ ബംബ ബാക്കിയ അന്തരിച്ചു

ചെന്നൈ: സിനിമാലോകത്തെ കണ്ണീരിലാഴ്ത്തി പ്രശസ്ത ഗായകൻ ബംബ ബാക്കിയ (49) അന്തരിച്ചു. ഹൃദയാഘാതത്തെ തുടർന്ന് ​ചെന്നെയിലെ ആശുപത്രിയിലായിരുന്നു അന്ത്യം. മണിരത്‌നത്തിന്റെ 'പൊന്നിയിൻ സെൽവൻ' എന്ന സിനിമയിലെ പൊന്നി നദി പാക്കണുമേ എന്ന ​ഗാനമാണ് ബംബ അവസാനമായി പാടിയത്. ​ഇതുൾപ്പെടെ നിരവധി ഹിറ്റ് ഗാനങ്ങൾ ആലപിച്ച ഗായകന്റെ വേർപാട് ഉൾക്കൊള്ളാനാവാ​തെ ദുഃഖത്തിലാണ് തമിഴ്സിനിമ ലോകം.

ചലച്ചിത്രഗാന രംഗത്ത് അറിയപ്പെടുന്നതിന് മുമ്പ് ഭക്തിഗാനങ്ങൾ ആലപിച്ചാണ് ബംബ ശ്രദ്ധേയനായത്. രജനികാന്ത് അഭിനയിച്ച `2.0` എന്ന ചിത്രത്തിലെ `പുള്ളിനങ്ങൾ`, വിജയ് നായകനായ `സർക്കാർ` എന്ന ചിത്രത്തിലെ `സിംതാംഗരൻ` തുടങ്ങിയവ ബംബയുടെ എക്കാലത്തെയും ശ്രദ്ധേയ ഗാനങ്ങളായിരുന്നു. ഗായകന്റെ അകാലമരണത്തിൽ തമിഴ് സിനിമാ ലോകത്തെ നിരവധി താരങ്ങൾ അനുശോചനം രേഖപ്പെടുത്തി.

"ബംബാ ബാക്കിയയുടെ പെട്ടെന്നുള്ള വിയോഗത്തിൽ ഏറെ ദുഖമുണ്ട്. ഈ വലിയ നഷ്ടം താങ്ങാനുള്ള ശക്തി അദ്ദേഹത്തിന്റെ കുടുംബത്തിനും സുഹൃത്തുക്കൾക്കും ഉണ്ടാകട്ടെയെന്ന് പ്രാർത്ഥിക്കുന്നു" എന്ന് നടൻ കാർത്തി ട്വീറ്റ് ചെയ്തു. നടൻ ശാന്തനു ഭാഗ്യരാജും ട്വിറ്ററിലൂടെ അനുശോചനം രേഖപ്പെടുത്തി.