സംഗീത സംവിധായകൻ ശ്രാവണിന്​ കോവിഡ് ബാധിച്ചത്​ കുംഭമേളയിൽ പങ്കെടുത്ത്​ വന്ന ശേഷം

മുംബൈ: കോവിഡ് ബാധിച്ച് മരിച്ച ബോളിവുഡ് ഹിറ്റ്​ സംഗീത സംവിധായകന്‍ ശ്രാവണ്‍ റാത്തോഡിന്​ (66) രോഗം സ്​ഥിരീകരിച്ചത്​ കുംഭമേളയിൽ പങ്കെടുത്ത്​ വന്ന ശേഷം. മകനും സംഗീത സംവിധായകനുമായ സഞ്ജീവ് ആണ്​ മാധ്യമങ്ങളോട്​ ഇക്കാര്യം വെളിപ്പെടുത്തിയത്​. ശ്രാവണിനൊപ്പം ഭാര്യ വിമലദേവിയും കുംഭമേളയിൽ പ​ങ്കെടുത്തിരുന്നു.

'എന്‍റെ പിതാവ്​ കുംഭമേളയിൽ പ​ങ്കെടുത്തിരുന്നു എന്നത്​ സത്യമാണ്​' -സഞ്​ജീവ്​ എ.ബി.പി ന്യൂസിനോട്​ പറഞ്ഞു. 'ഹരിദ്വാറിൽ നിന്ന്​ വന്നശേഷം അദ്ദേഹത്തിന്​ ശ്വാസതടസ്സം നേരിട്ടിരുന്നു. അദ്ദേഹം വളരെ ക്ഷീണിതനാകുകയും ചെയ്​തു. അങ്ങിനെയാണ്​ അദ്ദേഹത്തെ എസ്.എല്‍ റഹേജ ആശുപത്രിയിൽ പ്രവേശിപ്പിച്ചത്​. അവിടെ വെച്ചാണ്​ അ​ദ്ദേഹത്തിന്​ കോവിഡ്​ ബാധിച്ചതായി സ്​ഥിരീകരിച്ചത്​. പതുക്കെ അദ്ദേഹത്തിന്‍റെ അവയവങ്ങളുടെ പ്രവർത്തനം നിലച്ചുതുടങ്ങി. അതാണ്​ അദ്ദേഹത്തിന്‍റെ മരണത്തിന്​ ഇടയാക്കിയത്​' -സഞ്​ജീവ്​ വ്യക്​തമാക്കി.

ശ്രാവണിന്​ കോവിഡ്​ സ്​ഥിരീകരിച്ചതിനെ തുടർന്ന്​ കുടുംബാംഗങ്ങളിലും പരിശോധന നടത്തിയിരുന്നു. 'എനിക്കും അമ്മക്കും രോഗം സ്​ഥിരീകരിച്ചു. എന്‍റെ സഹോദരൻ ദർശൻ നെഗറ്റിവ്​ ആണ്​' -ആശുപത്രിയിൽ ചികിത്സയിൽ കഴിയുന്ന സഞ്​ജീവ്​ പറഞ്ഞു. വീട്ടിൽ ഐസൊലേഷനിൽ കഴിയുന്ന ദർശന്​ ശ്രാവണിന്‍റെ അന്ത്യകർമങ്ങൾ ചെയ്യാൻ അനുമതി ലഭിച്ചിട്ടുണ്ട്​.