'ഇപ്പോൾ നിങ്ങൾക്കവിടെ ഒരു കൂട്ടായല്ലോ..... മിസ്​ യൂ സച്ചി' -ഹൃദയത്തിൽ തൊടുന്ന കുറിപ്പുമായി പൃഥ്വിരാജ്​

മലയാള ചലച്ചിത്രലോകത്തെയാകെ സങ്കടത്തിലാഴ്​ത്തിയാണ്​ ഈ വർഷത്തെ ക്രിസ്​മസ്​ ദിനം കഴിഞ്ഞ്​ പോയത്​. ചുരുങ്ങിയ കാലം കൊണ്ട്​ ഒരുപിടി മികച്ച കഥാപാത്രങ്ങളിലൂടെ മലയാള സിനിമ ലോകത്തിന്​ പ്രതീക്ഷ നൽകിയ അനിൽ നെടുമങ്ങാട്​ എന്ന നടന്‍റെ വിയോഗ വാർത്ത ഞെട്ടലോടെയാണ്​ ഏവരും കേട്ടത്​.

അനിലിന്‍റെ കരിയറിൽ വഴിത്തിരിവായ 'അയ്യപ്പനും കോശിയും' എന്ന ചിത്രത്തിലെ സി.ഐ സതീഷ്​ എന്ന കഥാപാത്രം സമ്മാനിച്ച സച്ചിയുടെ ജന്മദിവസം തന്നെയായിരുന്നു അനിലിന്‍റെയും മരണമെന്നത്​ യാദൃശ്ചികതയായി മാറി. ഇപ്പോൾ ഹൃദയത്തിൽ തൊടുന്ന കുറിപ്പുമായി ഇരുവരെയും ഓർമിക്കുകയാണ്​ ചിത്രത്തിലെ നായകൻമാരിൽ ഒരാളായ പൃഥ്വിരാജ്​.

'ജന്മദിനാശംസകൾ സഹോദരാ. ഇപ്പോൾ നിങ്ങൾക്ക് അവിടെ ഒരു കൂട്ടുണ്ട്... നിങ്ങൾ രണ്ടുപേരും ഒരുമിച്ച് ഒരു ഡ്രിങ്ക് കഴിക്കുകയാണെന്ന് പ്രതീക്ഷിക്കുന്നു. ചിയേഴ്സ്. ഐ മിസ് യു സച്ചി' -പൃഥ്വി ഇൻസ്റ്റഗ്രാമിൽ കുറിച്ചു.

സംവിധായകൻ സച്ചിയെ അനുസ്​മരിച്ച്​ ഫേസ്​ബുക്കിൽ പോസ്റ്റിട്ട്​ മണിക്കൂറുകൾക്കകമാണ്​ നടൻ അനിൽ നെടുമങ്ങാട്​ വിടവാങ്ങിയത്. വെള്ളിയാഴ്ച രാവിലെയായിരുന്നു അനിൽ നെടുമങ്ങാടിന്‍റെ പോസ്റ്റ്​​. വൈകീട്ട്​ ആറോടെ ഇടുക്കി തൊടുപുഴ മുട്ടത്തിന് സമീപം മലങ്കര അണക്കെട്ടിലെ കയത്തിൽ താരം മുങ്ങിമരിക്കുകയായിരുന്നു.

'ഈ ദിവസം ഇങ്ങേരെ കുറിച്ചാണ് എഴുതേണ്ടത് .. ഒന്നും എഴുതാനും കഴിയുന്നില്ല. ഞാനും മരിക്കുവോളം എഫ്.ബി യിലെ കവർ ഫോട്ടോയായിട്ട് നിങ്ങളിങ്ങിനെ ....ഷൂട്ടിനിടയിൽ ഒരു ദിവസം എ​േന്‍റതല്ലാത്ത കുറ്റം കൊണ്ട് എത്താൻ ലേറ്റായപ്പോ കുറച്ച് സെക്കന്‍റ്​ എന്‍റെ കണ്ണിൽ നോക്കിയിരുന്നിട്ട് നീയും സ്റ്റാറായി അല്ലേ .? ഞാൻ പറഞ്ഞു ആയില്ല ആവാം. ചേട്ടൻ വിചാരിച്ചാൽ ഞാൻ ആവാം....സി.ഐ സതീഷ് എന്ന കഥാപാത്രത്തിനെ സച്ചിച്ചേട്ടനെ ഞാൻ നിരീക്ഷിച്ച് അവതരിപ്പിച്ചതാണ്. സച്ചിയുടെ സംസാരവും പെരുമാറ്റവും ഒക്കെ ഞാൻ ചേട്ടനോട് പറയാതെ അനുകരിക്കുകയായിരുന്നു' -അനിൽ ഫേസ്​ബുക്കിൽ കുറിച്ചു.

ജോജു നായകനാവുന്ന 'പീസ്​' എന്ന ചിത്രത്തിന്‍റെ ചിത്രീകരണത്തിനായാണ് അനിൽ തൊടുപുഴയിൽ എത്തിയത്. ഷൂട്ടിങ്​ ഇടവേളയിൽ സുഹൃത്തകൾക്കൊപ്പം ജലാശയത്തിൽ കുളിക്കാനിറങ്ങുകയായിരുന്നു. ജലാശയത്തിലെ ആഴമുള്ള കയത്തിലേക്ക് അബദ്ധത്തിൽ അനിൽ വീണു പോയെന്നാണ് വിവരം.